မဲခေါင်၊ ဒီဇင်ဘာ ၂၈

တရုတ်နိုင်ငံတောင်ပိုင်းဇူးဟိုင်မြို့မှာ နိုဝင်ဘာ ၁၁ ရက်က လူအုပ်ထဲ ကားနဲ့ အရှိန်ပြင်းစွာ မောင်းနှင်လိုက်တိုက်ခဲ့လို့ အနည်းဆုံး ၃၅ ယောက် သေဆုံးခဲ့ရမှုအတွက် တရားခံအမျိုးသားကို မြို့တော်တရားရုံးက ဒီဇင်ဘာ ၂၇ ရက်နေ့မှာပဲ သေဒဏ် ချမှတ်လိုက်ပါတယ်။

တရားရုံးကြေညာချက်မှာ အများသူငှာ ဘေးကင်းရေးကို အန္တရာယ်ဖြစ်စေအောင် လုပ်ဆောင်ခဲ့မှု တရားခံက အပြစ်ရှိတယ်လို့ ဝန်ခံခဲ့လို့ ပြစ်ဒဏ်ချမှတ်လိုက်ကြောင်း ဖော်ပြပါရှိပါတယ်။

တရားခံဟာ ဇနီးသည်နဲ့ အိမ်ထောင်ကွာရှင်းမှုမှာ ဒေါသထွက်ပေါက်ကွဲမှု၊ ပိုင်ဆိုင်မှု ခွဲခြမ်းရေးမှာ မကျေနပ်မှုတွေကြောင့် မြင်မြင်ရာ ကားနဲ့လိုက်တိုက်သတ်ခဲ့တာဖြစ်ပြီး အခင်းစဖြစ်ပြီးနောက် အာဏာပိုင်တွေဟာ ၂၄ နာရီနီးပါးကြာမှ စတင်သိရှိခဲ့လို့ အနည်းဆုံး ၃၅ ယောက်သေဆုံး၊ ၄၃ ယောက် ဒဏ်ရာရခဲ့တာ ဖြစ်ပါတယ်။

နိုဝင်ဘာ ၁၂ ရက်နေ့မှာ တရုတ်ရဲ့ လူမှုကွန်ရက် Weibo မှာ မျက်မြင်တွေ ဖုန်းမှတ်တမ်းတင်ရိုက်ကူးထားတဲ့ ကားနဲ့လိုက်တိုက်မှု ဗီဒီယိုတွေ ပျံ့နှံ့ခဲ့ပေမယ့်လည်း တရုတ်အစိုးရဟာ ဒီဖြစ်စဉ် တင်တဲ့သူတွေအကောင့်ကနေ မြင်ကွင်းတွေကို ဆင်ဆာဖြတ်တောက် ပိတ်ပင်ခဲ့သလို ကားတိုက်ရာ Zhuhai Sports Centre မှာ လွမ်းသူ့ပန်းခွေ၊ ပန်းစည်းတွေလာချတဲ့ ပြည်သူတွေ ဗီဒီယိုမှတ်တမ်းကိုလည်း ဆင်ဆာပိတ်တဲ့အပြင် ပန်းတွေလာမချဖို့ပါ တားဆီးမောင်းထုတ်ခဲ့ပါသေးတယ်။

တရားခံကတော့ ကားနဲ့ မြင်မြင်ရာလိုက်တိုက်ပြီး ကိုယ့်ကိုယ်ကိုယ်လည်း အဆုံးစီရင်ခြင်းအဖြစ် ကားကို နံရံဝင်တိုက်ခဲ့ရာမှာ ဖမ်းဆီးစဉ် မသေဆုံးပေမယ့် ခေါင်းဒဏ်ရာကြောင့် သတိမရဘဲ ကိုမာ ဝေဒနာခံစားခဲ့ရတယ်လို့ သိရှိရပါတယ်။

ပြီးခဲ့တဲ့ လပိုင်းတွေအတွင်း တရုတ်နိုင်ငံ နေရာအနှံ့အပြားမှာ အကြမ်းဖက်တိုက်ခိုက်မှုတွေ ဆက်တိုက်ရှိခဲ့လို့ တရုတ်အစိုးရဟာ ဒီလိုအကြမ်းဖက်ခဲ့တဲ့ Fan Weiqiu ကို သေဒဏ်ချမှတ်ပြီး အကြမ်းဖက်မှုတွေ ရပ်တန့်ဖို့ စံပြစီရင်ခဲ့တာဖြစ်ကြောင်း သုံးသပ်မှုတွေ ရှိနေခဲ့ပါတယ်။

အောက်တိုဘာ ၂၈ ရက်နေ့က အသက် ၅၀ အရွယ် တန်ဆိုတဲ့ အမျိုးသား ဓားနဲ့လိုက်ထိုးလို့ ကလေး ၃ ယောက်အပါ အနည်းဆုံး ၅ ယောက်သေ၊ အများအပြား ဒဏ်ရာရမှု ဖြစ်ခဲ့သလို နိုဝင်ဘာ ၁၆ ရက်က တရုတ်အရှေ့ပိုင်း ကျန်းစုက ကောလိပ်ကျောင်းထဲ ဇူ ဆိုတဲ့ ၂၁ နှစ် အရွယ် တရုတ်အမျိုးသား ဓားနဲ့လိုက်ထိုးလို့ ၈ ယောက်သေ၊ ၁၇ ယောက်ဒဏ်ရာရခဲ့ပါတယ်။

နိုဝင်ဘာ ၁၉ ရက်နေ့ကလည်း ဟူနန်ပြည်နယ်မှာ ကားသမားတစ်ယောက် မူလတန်း ကျောင်းအပြင် လူထူထပ်ရာနေရာထဲ ဝင်တိုက်လို့ အရေအတွက် အတိအကျမသိရတဲ့ ဒဏ်ရာရသူတွေ အများအပြားရှိခဲ့ပါတယ်။

တရုတ်ကွန်မြူနစ်ပါတီရဲ့ စီမံအုပ်ချုပ်မှု ညံ့ဖျင်းချက်တွေကြောင့် စီးပွားရေးကျဆင်းခြင်း၊ စိတ်ဖိစီးမှုများပြားခြင်းတွေ ဖြစ်ပေါ်စေမှုက ခုလို မကြာခဏဆိုသလို လှိုင်းအလား အကြမ်းဖက်တိုက်ခိုက်မှုတွေကို တရုတ်မှာ ဆက်တိုက်ဖြစ်ပေါ်နေစေခဲ့တာလည်း ဖြစ်ပါတယ်။

Ref: ntd
MKF-001
#MeKongNews
#အိမ်ထောင်ကွဲ
#ကားတိုက်
#ဇူးဟိုင်မြို့
#သေဒဏ်ပေး
#တရုတ်တောင်ပိုင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)