မဲခေါင်၊ ဒီဇင်ဘာ ၂၈
ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ဗန်းမောက်ဒေသမှာ နေရပ်ပြန်လာတဲ့ အရပ်သားတွေကို ပအိုဝ်းပြည်သူ့စစ် (PNO) ကဖမ်းဆီးကာ စစ်သင်တန်းပေးပြီး ရှေ့တန်းပို့ဆောင်နေတယ်လို့ ဒေသတွင်းသတင်းရင်းမြစ်တွေထံကနေ သိရပါတယ်။
ဒီဇင်ဘာလထဲမှာ ၁၀ ဦးကျော် ရှေ့တန်းပို့ခံရပြီးပြိလို့ သတင်းအရင်းအမြစ်က ပြောပါတယ်။
ပင်လောင်းနဲ့ ဖယ်ခုံအစပ်ရှိ ဗန်းမောက်ကျေးရွာနဲ့ အနီးတဝိုက်မှာ PNO နဲ့ စစ်ကောင်စီတပ်က ပူးပေါင်းကာ စစ်ရေးလှုပ်ရှားနေတာဖြစ်ပြီး စစ်ဘေးရှောင်ရာက ပြန်လာတဲ့အရပ်သားတွေကို PNO က ကျေးရွာလုံခြုံရေးအတွက်ဟုဆိုကာ အခြေခံစစ်သင်တန်း ၁၅ ရက် တက်ရောက်ခိုင်းပြီး ကျေးရွာလုံခြုံရေးမယူရပဲ မိုးဗြဲမြို့ကို ထိုးစစ်ဆင်နေတဲ့ PNO၊ စစ်ကောင်စီ ပူးပေါင်းတပ်နဲ့အတူ ရှေ့တန်းစစ်မြေပြင်ကို ပို့ဆောင်ခံနေရတာဖြစ်ပြီး အဆက်အသွယ်မရသူတွေလည်း ရှိနေတယ်လို့ သိရပါတယ်။
“မပြန်လာဖို့ အကြိမ်ကြိမ်သတိပေးတယ်၊ တချို့ကလည်း အရဲစွန့်ပြီး ပြန်လာကြတာ၊ ပြန်ရောက်တာနဲ့ တိုက်နိုင်ခိုက်နိုင်တဲ့သူ၊ ကိုယ်လက်အင်္ဂါကောင်းတဲ့သူဆိုရင် စာရင်းလာကောက်သွားတယ်။ နောက်ရက်ကြတော့ သင်တန်းတက်ဖို့ လာပြောတယ်၊ ပြီးတော့ရှေ့တန်းပို့လိုက်တာပဲ ”လို့ သတင်းရင်းမြစ်တစ်ဦးက မဲခေါင်သတင်းဌာနကို ပြောပါတယ်။
ကရင်နီအမျိုးသားများ ကာကွယ်ရေးတပ် (KNDF)ရဲ့ ဒုစစ်ဦးစီးချုပ် မာဝီကလည်း မိုးဗြဲ၊ ဖက်ခုံနဲ့ ကရင်နီဒေသ တိုက်ပွဲတွေအတွင်း စစ်မှုထမ်းသင်တန်းတက်ရောက်ပြီးနောက် ရှေ့တန်းပို့ခံရတဲ့ PNO တပ်သားသစ်တွေ ဖမ်းဆီးရမိတာရှိသလို တိုက်ပွဲအတွင်း သေဆုံးတာတွေလည်း တွေ့ရတယ်လို့ ဒီဇင်ဘာလအတွင်းမှာ ထုတ်ဖော်ပြောကြားဖူးပါတယ်။
ဗန်းမောက်ဒေသမှာ ပြီးခဲ့တဲ့ စက်တင်ဘာလကတည်းက PNO နဲ့ စစ်ကောင်စီပူးပေါင်းတပ်က ထိုးစစ်ဆင်လာတာကြောင့် ကရင်နီပူးပေါင်းတပ်ဖွဲ့တွေနဲ့ တိုက်ပွဲပြင်းထန်ခဲ့ပြီး အရပ်သား ၁၀၀၀ ကျော် ဘေးလွတ်ရာကို စစ်ဘေးရှောင်ခဲ့ပါတယ်။ နိုဝင်ဘာလကစလို့ တိုက်ပွဲတွေ အနည်းငယ်ငြိမ်သက်သွားတာကြောင့် နေရပ်ပြန်သူတွေ ရှိနေတာပါ။
CJ-003
#MekongNews
#ဗန်းမောက်ဒေသ
#PNO
#နေရပ်ပြန်
#စစ်သင်တန်း
#၁၀ဦးကျော်
