မဲခေါင်၊ ဒီဇင်ဘာ ၂၄
အာဏာရ ဖွေထိုင်းပါတီ မဲဆွယ်စဉ်ကတည်းက ကတိပြုခဲ့တဲ့ ထိုင်းနိုင်ငံတစ်ဝန်း တစ်နေ့အနည်းဆုံး လုပ်ခလစာ ဘတ် ၄၀၀ သတ်မှတ်ပေးရေးကို ဒီဇင်ဘာ ၂၄ ရက်နေ့မှာပဲ ဝန်ကြီးချုပ် ပေထောင်တန်ဦးဆောင်တဲ့ အစိုးရအဖွဲ့ဟာ လာမယ့် ဇန်နဝါရီလကစလို့ ခရိုင်သတ်မှတ်ချက်နဲ့ တိုးမြှင့်ပေးအပ်သွားဖို့ အတည်ပြုထုတ်ပြန်လိုက်ပါတယ်။
ဖွေထိုင်းပါတီက တစ်နိုင်ငံလုံး အနိမ့်ဆုံးအခြေခံတစ်ရက်လုပ်ခကို လက်ရှိ ဘတ် ၃၃၀ ကနေ ၃၇၀ အထိ တစ်ဆင့်တိုးပေးထားရာက ဘတ် ၄၀၀ ပေးဖို့ အဆိုမှာတော့ စီးပွားရေးလုပ်ငန်းရှင်တွေက တတ်နိုင်စွမ်းမရှိသေးဘူး လို့ အများစုက ကန့်ကွက်လို့ နိုင်ငံခြားခရီးသွားလုပ်ငန်းတွေရဲ့ အဓိက ဗဟိုချက်ဖြစ်တဲ့ ဖူးခက်၊ ချာချိုအန်ဆအို၊ ချွန်ဘူရီ၊ ရာယောင်း ခရိုင်တွေနဲ့ ဆူရတ်ဌာနီခရိုင်က ခရီးသွားကျွန်း ဆမွီတို့က ဝန်ထမ်းတွေကိုသာ ဇန်နဝါရီလ ကစလို့ တစ်ရက်အနည်းဆုံး လုပ်ခ ဘတ် ၄၀၀ ပေးဖို့ အတည်ပြုလိုက်တာဖြစ်ပါတယ်။
ကျန် နိုင်ငံတဝန်းက လုပ်သားတွေကိုတော့ လက်ရှိ အနိမ့်ဆုံးလုပ်ခသတ်မှတ်ချက်ဖြစ်တဲ့ တစ်ရက် ၃၃၇ ဘတ်ကနေ ပျမ်းမျှ ၂ ရာခိုင် နှုန်းတိုးပေးပြီး တစ်ရက် ဘတ် ၃၈၀ အထိသာ စတင်တိုးပေးသွားဖို့ အတည်ပြုလိုက်ကြောင်း ဝန်ကြီးချုပ် ပေထောင်တန်ကိုယ်တိုင်က ထုတ်ပြန်ပြောဆိုသွားခဲ့ပါတယ်။
ဒါ့အပြင် ဇန်နဝါရီ ၁၆ ရက်ကနေ ဖေဖော်ဝါရီ ၂၈ ရက်အတွင်း ပြည်တွင်းခရီးသွားလုပ်ငန်းမှ အပ ကျန်တဲ့ အသုံး စားရိတ်တွေမှာ ဘတ် ၅၀၀၀၀ အထိ သုံးစွဲသူတွေကို အခွန်ကောက်ခံခြင်း မပြုဘဲ အသုံးစားရိတ် မြင့်တက်လာ စေဖို့ ရည်ရွယ်ပြဌာန်းတယ်လို့ ဆိုပါတယ်။
ဖွေထိုင်းပါတီ မဲဆွယ်စဉ်က ပြည်သူ ၄၅ သန်းစလုံးကို တစ်ယောက် ဘတ် ၁၀၀၀၀ အခမဲ့ ပေးသွားရေးအစီအစဉ်အတွက် ဒုတိယအသုတ် အဖြစ် ဇန်နဝါရီလမှာ ဘတ်ဘီလီယံ ၄၀ သုံးပြီး သက်ကြီးရွယ်အိုတွေအတွက် ထုတ်ပေးသွားဖို့လည်း အတည်ပြုခဲ့ပါတယ်။ ပထမအသုတ်အဖြစ် စက်တင်ဘာ လက လူဦးရေ ၁၄ . ၅ သန်းအတွက် တစ်ကြိမ် ထုတ်ပေးခဲ့ပြီးဖြစ်ပါတယ်။
ဒီလို ပြည်သူကို တစ်ယောက် ဘတ် ၁၀၀၀၀ ထုတ်ပေးခြင်းဟာ အသုံးစားရိတ်ပြန်လည်မြင့်တက်လာပြီး ပြည်တွင်းစီးပွားရေး တိုးတက်မှုနှုန်းကို ၂၀၂၆ မှာ ၃ . ၃ ရာခိုင်နှုန်းတိုးတက်စေဖို့၊ ငွေကြေး ဖောင်းပွမှုနှုန်းကို ၁ . ၇ ရာခိုင်နှုန်းကနေ ၀ . ၇ ရာခိုင်နှုန်း အထိ လျှော့ချနိုင်ဖို့ ရည်ရွယ်ပြီး အသုတ်အားလုံးပေါင်းရင် အစိုးရဘတ်ဂျက် ဘတ် ၃ . ၇၈ ထရီလီယံအထိ သုံးစွဲမှာ ဖြစ်ကြောင်းလည်း ထိုင်းအစိုးရအဖွဲ့က ထုတ်ပြန်သွားပါတယ်။
Ref: bangkokpost
MKF-001
#MeKongNews
#ထိုင်း
#လုပ်ခလစာ
#သတ်မှတ်ချက်
#ဘတ်
#အစိုးရ
#ဖွေထိုင်း
