မဲခေါင်၊ ဒီဇင်ဘာ၂၂
မြန်မာနိုင်ငံထဲကို အရည်အသွေးနိမ့်ကုန်ပစ္စည်းတွေသာ တင်သွင်းလေ့ရှိတဲ့ တရုတ်နိုင်ငံက အခုလည်း အရည်အသွေးနိမ့် ကျည်ကာဦးထုတ်တွေ ထုတ်လုပ်ကာ တော်လှန်ရေးဈေးကွက်ထဲကို တင်သွင်းနေပါတယ်။
ကျည်ကာအဆင့် Level 4 ဆိုပြီး တရုတ်နိုင်ငံက သက်သာတဲ့စျေးနဲ့ အရည်အသွေးနိမ့်ကျည်ကာဦးထုတ်တွေကို မြန်မာတော်လှန်ရေးဈေးကွက်ထဲ ရောင်းချနေတာပါ။ တော်လှန်ရေး တပ်ရင်းတပ်ဖွဲ့တွေက ဈေးသက်သာတာကိုရွေးချယ်ပြီး ယုံကြည်စွာ ဝယ်ယူအသုံးပြုရင် အသက်အန္တရာယ်ရှိတာမို့ အသုံးမပြုကြဖို့ သတင်းအရင်းအမြစ်တွေက တိုက်တွန်းပါတယ်။
ကျည်ကာတွေမှာ Level 1 နဲ့ 2 က ညံ့တဲ့အဆင့်ဖြစ်ပါတယ်။ Level 3 က လှုပ်ရှားလို့ကောင်းပြီး အနည်းငယ်ကောင်းမွန်တဲ့အဆင့်ပါ။ Level 4 က လေးလွန်းပေမယ့် လုံခြုံစိတ်ချရတဲ့အဆင့်ဖြစ်တယ်လို့ ပအိုဝ်းအမျိုးသားဖက်ဒရယ်ကောင်စီ (PNFC) ရဲ့ အတွင်းရေးမှူး-၂ ခွန်ဝေထူး က မဲခေါင်ကိုပြောပါတယ်။
သူက “ဝိသမသမားတွေကြောင့်ကျွန်တော်တို့ ရဲဘော်တွေ ထိခိုက်သေဆုံးမှာကို မလိုလားဘူးဆိုရင် ဝယ်တဲ့အခါ အာမခံချက်ပါ အချက်တွေအတိုင်း ဦး၊ ရေး၊ ထောက်တွေက သေချာစမ်းသပ်ဖို့ အကြံပြုချင်ပါတယ်” လို့ မဲခေါင်ကိုပြောပါတယ်။
အရည်အသွေးနိမ့် ကျည်ကာဦးထုပ်ဖြစ်ကြောင်းကို ပအိုဝ်းအမျိုးသားကာကွယ်ရေးတပ်ဖွဲ့ PNDF (KK)တာဝန်ခံ ခွန်မြတ်က ပစ်ခတ်စမ်းသပ်ခဲ့တာဖြစ်ပါတယ်။
PNDF (KK)တာဝန်ခံ ခွန်မြတ်က “ကျနော်တို့ ကျည်ကာဦးထုပ်ကို အတွင်းကပဲ မှာလိုက်တယ်၊ အကုန်စမ်းကြည့်တော့ အဲလောက်ကြီး သိပ်မခံဘူးဗျ၊ ပေါက်တာပဲပေါ့နော်၊ နည်းနည်းဝေးတဲ့အနေအထားလောက်မှာပဲခံတယ်၊ အတုတွေကတော့ ရှိမှာပဲ၊ ကျွန်တော်တို့နိုင်ငံအနေအထားနဲ့ ပတ်ဝန်းကျင်နိုင်ငံတွေက လုပ်မှာပဲ၊ အဲကိစ္စမဟာမိတ်တွေဘက်လည်း မမေးကြည့်ရသေးဘူး” လို့ ပြောပါတယ်။
ကျည်ကာတွေကို 9mm, M16, AK47 အစရှိတဲ့ လက်နက်ငယ်တွေနဲ့မီတာ ၂၀ ၊ မီတာ ၅၀ အကွာအဝေးကနေ ပစ်ခတ်စမ်းသပ်နိုင်တယ်လို့ ဆိုပါတယ်။
ကရင်နီနယ်မှာ တိုက်ပွဲဝင်နေတဲ့ ဖယ်ခုံ PDF( ၁၀၀၆)တပ်ရင်းရဲ့ သတင်းနဲ့ပြန်ကြားရေး တာဝန်ခံကတော့ ကျည်ကာအတုတွေ ဝယ်မိပါက ရောင်းချသူ၊ ပွဲစားတွေကို ကွင်းဆက်လိုက်ပြီး ရအောင်ဖော်ထုတ်ကာ လိုအပ်တဲ့အရေးယူတာမျိုး ပြုလုပ်သွားမှာဖြစ်သလို ကရင်နီဘက်မှာ ကျည်ကာဦးထုပ်သာမက အခြားတော်လှန်ရေးနဲ့ပတ်သက်တဲ့ ပစ္စည်းပစ္စယတွေအပေါ် အမြတ်ကြီးစားပြီး အခွင့်ကောင်းယူနေတာတွေကို လွှတ်မထားပဲ အရေးယူဆောင်ရွက်စေချင်တယ်လို့ ပြောပါတယ်။
သူက “စစ်ရေး တန်ဆာပလာတွေကိုလွယ်လွယ်နဲ့တပ်ဆင်နိုင်တာမဟုတ်ဘူး၊ ပြည်သူတွေထည့်ဝင်ငွေတွေနဲ့ ဝယ်ရတာ။ ကုန်သည်၊ ပွဲစားတွေက ရဲဘော်တွေရဲ့နောက်ဆက်တွဲအသက်တွေကို ထိခိုက်စေတာဖြစ်လို့ ဒီလုပ်ရပ်ကို ရှုတ်ချတယ်။ တပ်ရင်းတပ်ဖွဲ့တွေကလည်း ဒီလိုလိမ်လည်တာတွေကို အမြန်စုံစမ်းစစ်ဆေးဖို့ အကြံပြုချင်တယ်” လို့ ပြောပါတယ်။
စျေးကွက်မှာ ကျည်ကာအရည်အသွေး အစားစားရှိပြီး Level 4 ကျည်ကာဦးထုပ်က ကျပ်ခုနှစ်သိန်း(၇၀၀၀၀၀ကျပ်)၊ ကိုယ်ဝတ်စွပ်ကျယ်(vest) ကျည်ကာက ကျပ် ၁၂သိန်းအထိရှိနေပြီး တိုက်ပွဲတွေမှာ ဦးခေါင်းနဲ့ ဝမ်းဗိုက်ပိုင်းထိခိုက်လို့ ကျဆုံးတာ၊ ပြင်းထန်ဒဏ်ရာတွေရတာကြောင့် ခေါင်းနဲ့ ဗိုက်ကိုကာကွယ်နိုင်ဖို့ ကျည်ကာ ဦးထုပ်နဲ့ ကိုယ်ဝတ်ဟာ အဓိကကျတယ်လို့ သိရပါတယ်။
လက်ရှိမှာ စစ်ကောင်စီဟာ ရှမ်းတောင်နဲ့ ကရင်နီနယ်စပ်ကို အင်အားအလုံးအရင်း ဖြည့်တင်းလာနေတာဖြစ်ပြီး မကြာခင်မှာ ကြီးမားပြင်းထန်တဲ့တိုက်ပွဲတွေ ဖြစ်လာနိုင်ချေရှိလို့ ကျည်ကာနဲ့ခဲယမ်းတွေလိုအပ်နေတယ်လို့ PNDF(KK)က မဲခေါင်ကို ပြောထားပါတယ်။
တော်လှန်ရေးတပ်ရင်းတပ်ဖွဲ့တွေအနေနဲ့ တော်လှန်ရေးအတွက် အသက်ပေးတိုက်ပွဲဝင်နေကြတဲ့ တပ်ဖွဲ့ဝင်တွေအတွက် တိုက်ပွဲမှာ ဦးခေါင်း၊ ရင်ဘတ်နဲ့ အဆုတ်၊ ကျောက်ကပ်ပိုင်းတွေ မထိမှန်စေဖို့ ကျည်ကာဦးထုပ်၊ ကျည်ကာပြား၊ ကျည်ကာအင်္ကျီတွေ ဝယ်ယူတပ်ဆင်နိုင်ရန်အတွက် ကမ်ပိန်းရန်ပုံငွေ အမျိုမျိုးကိုပြုလုပ်ပြီး တော်လှန်ပြည်သူတွေထံ အကူအညီတောင်းကာ ဝယ်ယူဖြည့်တင်းနေကြရတယ်လို့ သိရပါတယ်။
MK-012
#MekongNews
#တရုတ်
#ကျည်ကာဦးထုပ်
#အတု
#တော်လှန်ရေး
#level4
