မဲခေါင်၊ ဒီဇင်ဘာ ၁၉
စစ်ကောင်စီရဲ့ တပ်ဖွဲ့ဝင်တွေဟာ မူးယစ်ဆေးကို ကိုယ်တိုင်သုံးစွဲရုံမျှမကပဲ ရောင်းဝယ်သူနဲ့သုံးစွဲသူ(ရောင်းသုံး)တွေကိုပါ သတင်းပေးအဖြစ်မွေးမြူကာ ရောင်းသုံးခွင့်ပြုထားခဲ့ပါတယ်။
မန္တလေးတိုင်း၊ မိုးကုတ်ဒေသကို စစ်ကောင်စီထိန်းချုပ်စဉ်က ညီနောင်မဟာမိတ်တွေရဲ့ သတင်းအချက်အလက်တွေ ရယူပေးပို့ဖို့ မူးယစ်ဆေးဝါး ရောင်းဝယ် သုံးစွဲသူတွေကို မွေးမြူခိုင်းစေကာ ရောင်းသုံးခွင့်လည်းပြုထားပါတယ်။ အဲ့ဒိရောင်းသုံးတွေကို TNLA က ဖမ်းဆီရမိခဲ့ပါတယ်။
စစ်ကောင်စီရဲ့ တပ်ဖွဲ့ဝင်တွေဟာ ပင်ကိုယ်အသိဉာဏ်နဲ့ ထိန်းချုပ်နိုင်စွမ်းကင်းမဲ့ပြီး ဒေသခံတွေရဲ့ နေအိမ်တွေကို မီးရှို့ရဲဖို့၊ လူမဆန်စွာသတ်ဖြတ်ရဲဖို့၊ မုဒိန်းကျင့်ရဲဖို့၊ ခိုးဆိုးလုရဲစေဖို့နဲ့ တိုက်ပွဲအတွင်း ရဲရဲတက် ရဲရဲတိုက်ရဲစေဖို့အတွက် စစ်ကြောင်းအကြီးအကဲကိုယ်တိုင်က အောက်လက်ကို မူးယစ်ဆေးသုံးစွဲဖို့ ခွင့်ပြုထားသလို သူကိုယ်တိုင်လည်း သုံးစွဲတယ်လို့ စစ်သုံ့ပန်းတွေက ဝန်ခံထွက်ဆိုထားပါတယ်။
စစ်ကောင်စီတပ်ဖွဲ့ဝင်တွေ မူးယစ်ဆေးသုံးကြောင်းကို စစ်ကောင်စီရဲ့ တပ်မ(၆၆) လက်အောက်ခံ ခမရ(၈၀) က တပ်ရင်းတစ်ရင်းလုံးနီးပါး သေဆုံးတဲ့ လွိုင်ကော်မြို့နယ်၊ လင်ဖုံလေး တိုက်ပွဲမှာ ဖမ်ဆီးရမိတဲ့ စစ်သုံ့ပန်း ငါးဦးက ထွက်ဆိုတာပါ။ နိုဝင်ဘာ ၂၅ နဲ့ ၂၆ မှာ ခမရ(၈၀)နဲ့ တော်လှန်ရေးအင်အားစုတွေ တိုက်ပြင်းထန်ခဲ့တာပါ။
မန္တလေးတိုင်း၊ မိုးကုတ်မြို့နယ်မှာ TNLA မိုးကုတ်တရားဥပဒေစိုးမိုးရေးတပ်ဖွဲ့က ရောင်းသုံး ၃၀၀ ကို ဖမ်းဆီးထိန်းသိမ်းထားနိုင်ခဲ့တယ်လို့ TNLA က မနေ့က( ဒီဇင်ဘာ ၁၉)မှာ ထုတ်ပြန်ပါတယ်။
TNLA က အခုနှစ် ဇူလိုင်ကနေ ဒီဇင်ဘာ ၁၉ ရက်အထိ မိုးကုတ်မြို့နယ်အတွင်း မူးယစ်ဆေးဝါးတားဆီးတိုက်ဖျက်ရေးလုပ်ငန်း ဆောင်ရွက်စဉ် ဖမ်းဆီးရမိတဲ့ ရောင်းသုံး ၃၀၀ ထဲမှာ သတင်းပေးအဖြစ် မွေးခံထားရတဲ့ ရောင်းသုံးသူ အများအပြားပါဝင်တယ်လို့ TNLA က မနေ့ကထုတ်ပြန်ပါတယ်။ အရည်အတွက်အတိအကျကိုတော့ ထည့်သွင်းဖေါ်ပြမထားပါဘူး။
ဖမ်းဆီးရမိတဲ့ မူးယစ်ဆေးသုံးစွဲသူတွေကို အကျင့်စာရိတ္တပြုပြင်ရေးကျောင်းမှာ ၆ လတိတိ အကျင့်စာရိတ္တပြုပြင်ပေးသွားမှာဖြစ်ပြီး ရောင်းဝယ်သူတွေကို မူးယစ်ဆေးဝါးတိုက်ဖျက်ရေးဥပဒေအရ အရေးယူဆောင်ရွက်သွားမယ်လို့ ထုတ်ပြန်ချက်မှာ ဖေါ်ပြပါတယ်၊။
ရောင်းသုံးတွေကို PSLF/TNLA ရဲ့ တရားဥပဒေစိုးမိုးရေးတပ်ဖွဲက ဖမ်းဆီးခဲ့တာဖြစ်ပြီး အဲ့ဒိအဖွဲ့ဟာ ရပ်ရွာအေးချမ်းသာယာရေး၊ တရားဥပဒေစိုးမိုးရေး၊ ပြည်သူ့အကျိုးပြု လုပ်ငန်းတွေဆောင်ရွက်ရေး၊ မူးယစ်ဆေးဝါး တားဆီးတိုက်ဖျက်ရေး၊ ပြည်သူ့ လုံခြုံရေး ဆိုတဲ့ လုပ်ငန်းစဉ် ငါးရပ် ဆောင်ရွက်နေတဲ့ တပ်ဖွဲ့တစ်ဖွဲ့ဖြစ်တယ်လို့ သိရပါတယ်။
စစ်ကောင်စီထိန်းချုပ်ထားတဲ့ မိုးကုတ်မြို့ကို TNLA က ၂၀၂၄ ခုနှစ် ၊ ဇူလိုင်လ ၂၄ ရက် ညနေပိုင်းမှာ သိမ်းပိုက်နိုင်ခဲ့တာပါ။
MK-012
#MekongNews
#စစ်ကောင်စီ
#မူးယစ်ဆေး
#ရောင်းသုံး၃၀၀
#TNLA
#ဖမ်းမိ
