မဲခေါင်၊ ဒီဇင်ဘာ ၁၂
ထိုင်းနဲ့’ဝ’ကိစ္စသွားရောက်တဲ့ စစ်ကောင်စီရဲ့ ရှမ်းအရှေ့ကျိုင်းတုံအခြေစိုက်၊ တြိဂံဒေသတိုင်းစစ်ဌာနချုပ်တိုင်းမှူးဟာ မြန်မာ-ထိုင်းနယ်စပ် မုံးထော်၊ မုံးထကနေ ဒီနေ့( ဒီဇင်ဘာ ၁၂) ညနေ ၄ နာရီခန့်က ပြန်လာတယ်လို့ နားကောင်းမူးနေဒေသခံတစ်ဦးထံက သိရပါတယ်။
ဒီဇင်ဘာ ၁၀ ရက် နေ့လည်ပိုင်းက စစ်တိုင်းမှူး ဗိုလ်ချုပ်စိုးလှိုင်ဟာ စစ်ယာဉ်တန်းနဲ့ ‘ဝ’တောင်ပိုင်းစစ်ဒေသ ၁၇၁ ရှိရာ ဟွေအောဘက်ကနေ နယ်စပ်အငြင်းပွားနေရာနဲ့ အနီးဆုံးဖြစ်တဲ့ မုံးထော်၊ မုံးထဘက်ကို သွားရောက်ခဲ့ပြီး ၂ ရက်အကြာမှာ ပြန်လာတာဖြစ်ပါတယ်။
တိုင်းမှူးခရီးစဉ်နဲ့စပ်လျဉ်းပြီး “ဝ” ပြောခွင့်ရ တာဝန်ခံ ဦးညီရန်းကတော့ “တိုင်းမှူးလာတာ မှန်ပါတယ်၊ နယ်မြေတပ်တွေ သွားရောက်စစ်ဆေးတာဖြစ်မှာပါ၊ ကျွန်တော်တို့နဲ့ တွေ့ဆုံဖို့ မရှိပါ၊ ထိုင်းနဲ့လည်း တွေ့ဆုံဖို့ မရှိပါ၊ ထိုင်းနယ်စပ်ကိစ္စရပ် လောလောဆယ် ငြိမ်သွားပါပြီ၊ ကျွန်တော်တို့ဖက်ကတော့ အားလုံးပုံမှန်ပါပဲ” လို့ မီဒီယာတွေကို ပြောထားပါတယ်။
အဲဒီပုဂ္ဂိုလ်သွားရောက်တဲ့သတင်းကို မဲခေါင်မှာ မနေ့(ဒီဇင်ဘာ ၁၁)က သတင်းဖေါ်ပြခဲ့ပါတယ်။
“ဘယ်သူတွေနဲ့တွေ့ပြီး ဘာတွေပြောတယ်လို့တော့ မသိရဘူး၊ အရှေ့ဘက် ဟိုပန်၊ ဟိုရွက်ဘက်က’ ဝ’ တပ်အချို့တော့ မုံးထဘက် တက်တာတွေ့ရတယ်” လို့ နားကောင်းမူးဒေသခံက မဲခေါင်ကိုပြောပါတယ်။
ထိုင်းနဲ့ ‘ဝ’တပ်ကြား စစ်ရေးတင်းမာမှု သတင်းတွေအပေါ် UWSA က ဒီဇင်ဘာ ၈ ရက်က ငြိမ်းချမ်းရေးသည်သာ အဓိကဖြစ်တာကြောင့် စစ်ရေးသတင်းတွေကို ဖန်တီးရေးသားကြတဲ့အပေါ် ပြင်းပြင်းထန်ထန် ရှုံ့ချတယ်လို့ စာထုတ်ပြန်ခဲ့ပါတယ်။
‘ဝ’တပ်နဲ့ ထိုင်းတပ်ကြား ပြီးခဲ့တဲ့ နိုဝင်ဘာ ၂၅ က ထိုင်း -မြန်မာနယ်စပ်၊ မယ်ဟောင်ဆွန် ခရိုင်အတွင်းရှိတဲ့ နယ်စပ်မျဥ်းက UWSA ရဲ့ စစ်တပ်စခန်း ၇ ခုကို ဒီဇင်ဘာ ၁၈ ရက် နောက်ဆုံးထားပြီး ဖယ်ပေးဖို့ ထိုင်းတော်ဝင်စစ်တပ်က ထုတ်ပြန်ခဲ့ပြီး နယ်မြေအငြင်းပွားမှုနဲ့ ပတ်သက်လို့ မီဒီယာတွေက သတင်းရေးသားဖော်ပြနေကြတာ ဖြစ်ပါတယ်။
နယ်စပ်အငြင်းပွားမှုကြောင့် စစ်ရေးတင်းမာနေတယ်လို့ သတင်းတွေ ထွက်ပေါ်ခဲ့ပြီးနောက် ထိုင်းတပ်ဗိုလ်ချုပ် ပါနာကလူးပလော့တက်က ဒေသခံတွေကို စိုးရိမ်စရာအခြေအနေ မရှိကြောင်း နိုဝင်ဘာ ၂၆ ရက်မှာ အသိပေးထုတ်ပြန်ခဲ့ပါတယ်။
အဆိုပါ စခန်းကုန်းတွေဟာ မြန်မာနိုင်ငံနယ်စပ်နားမှာ တည်ရှိတဲ့ RCSS ဌာနချုပ် လွိုင်တိုင်းလျန်းနဲ့ ၁၀ ကီလိုမီတာအကွာမှာတည်ရှိတယ်လို့ မြေပြင်သတင်းအရ သိရပါတယ်။
ထိုင်းနိုင်ငံ၊ မယ်ဟောင်ဆောင်ဒေသ ပန်မဖနယ်ထဲကို မီတာ ၃၀၀ ခန့် ရောက်နေတာလို့ ထိုင်းသတင်းတွေက ပြောနေပြီး ‘ဝ’ဘက်ကတော့ မိုင်းပန်မြို့နယ်၊ ဟိုမိန်းမြို့၊ လွယ်ဝိုးမှာ ရှိနေတာလို့ ဆိုပါတယ်၊ လွယ်ဝိုးဟာ မိုင်းတုံမြို့နယ်၊ မုံးထမြို့နဲ့ နီးကပ်စွာတည်ရှိနေတယ်လို့ သိရပါတယ်။
မိုင်းတုံမြို့နယ်ထဲက ခိုင်းလုံမှာ မုံးထရဲ့အနောက်ဖက်၊ လွိုင်တိုင်းလျန်း( RCSS ဌာနချုပ်) ရဲ့ အရှေ့ဖက်မှာရှိပြီး အိမ်ခြေ ၁၀၀၀ ခန့်ရှိတဲ့ မြို့တည်ထားကာ တပ်မဟာ (၇၇၈) နယ်မြေဖြစ်ကြောင်း သိရပါတယ်။
MK-012
#MekongNews
#တြိဂံဒေသ
#စစ်တိုင်းမှူး
#မိုင်းတုံ
#ထိုင်းနဲ့ဝ
#ဗိုလ်ချုပ်စိုးလှိုင်
