မဲခေါင်၊ ဒီဇင်ဘာ ၁၀
MNDAA ထိန်းချုပ်ထားတဲ့ လားရှိုးမြို့တွင်းမှာ မသင်္ကာဖွယ်ရာအခြေအနေတွေ တွေ့ရှိပါကသတင်းပေး သတင်းယူနိုင်ဖို့ အွန်လိုင်းစာမျက်နှာတစ်ခု ဖွင့်ထားတဲ့အပြင် တိုင်းရင်းသားပေါင်းစုံပါဝင်တဲ့ လုံခြုံရေးအဖွဲ့နဲ့ မှုခင်းကိစ္စကိုင်တွယ်တာတွေ ပြုလုပ်နေတယ်လို့ MNDAA ပြန်ကြားရေးက ဖော်ပြလာပါတယ်။
လားရှိုးမြို့တွင်းမှာ စစ်ကောင်စီသတင်းပေးတွေ၊ သူခိုးတွေ၊ မှုးယစ်ဆေးဝါး ရောင်းဝယ်သုံးစွဲမှုတွေ၊ လုယက်မှုတွေနဲ့ မသင်္ကာဖွယ်ရာအခြေအနေတွေ တွေ့ရှိပါက Lashio Info Page ရဲ့ Messenger သို့မဟုတ် Lashio InfoTelegram မှ တစ်ဆင့် သတင်းပေးပို့ တိုင်ကြားနိုင်တယ်လို့ ဒီနေ့ (ဒီဇင်ဘာ ၁၀)မှာ ဖော်ပြလာတာပါ။
ဒေသတွင်း စစ်ကောင်စီ သတင်းပေးသူတွေ၊ လေကြောင်းတိုက်ခိုက်မှု၊ စစ်ရာဇဝတ်မှုကျူးလွန်ရန် ကြံစည်မှုတွေကို သိရှိပါက သတင်းပေး တိုင်ကြားပေးနိုင်ကြဖို့ နှိုးဆော်အပ်ပါတယ်လို့လည်း MNDAA ရဲ့ ပြန်ကြားရေးအဖွဲ့ဝင်တစ်ဦးက ပြောပါတယ်။
ဒီလိုသတင်းပေးတိုင်ကြားခြင်းအားဖြင့် လားရှိုးမြို့နယ်အတွင်း လေကြောင်းတိုက်ခိုက်တာတွေကို ကြိုတင်တားဆီးနိုင်ပြီး ပြည်သူ့အိုးအိမ် အသက်ကို ကာကွယ်ရာရောက်ပါမယ်လို့ အသိပေးထားပါတယ်။
လားရှိုးစစ်ရေးအုပ်ချုပ်မှုကော်မတီရဲ့ စီမံကွပ်ကဲမှုနဲ့ ဖွဲ့စည်းထားတဲ့ လုံခြုံရေးဝန်ထမ်းတွေဟာ မြို့ပြန်လည်ထူထောင်ရေးကာလအတွင်းမှာ အင်တိုက်အားတိုက် လှုပ်ရှားဆောင်ရွက်နေကြတယ်လို့ သိရပါတယ်။
“ဒေသခံပြည်သူလူထု လုံခြုံရေးအတွက် ရပ်ကွက်အတွင်း ကင်းလှည့်တယ်၊ ဒုစရိုက်မှုပပျောက်ရေးအတွက် သတင်းပေးစနစ်ကျင့်သုံးပြီး ပြစ်မှုကျူးလွန်သူတွေကို ဖမ်းဆီးအရေးယူတယ်၊ ဆက်သွယ်ရေးကွန်ရက်တည်ဆောက်ပြီး အချိန်နဲ့တပြေးညီ လုံခြုံရေးကိစ္စရပ်များ ဆောင်ရွက်နိုင်ဖို့ စီစဉ်ထားပါတယ်” လို့ လုံခြုံရေးတာဝန်ရှိသူတစ်ဦးက ပြောပါတယ်။
လုံခြုံရေးတပ်ဖွဲ့တွေကို တိုင်းရင်းသားလူမျိုးပေါင်းစုံနဲ့ အမျိုးသမီးတွေ အပါအဝင် ရပ်ကွက်ကျေးရွာအလိုက် ဖွဲ့စည်းထားပြီး မှုခင်းအသေးတွေနဲ့ လက်နက်မပါသူတွေကို ဖြေရှင်းနေပြီး လက်နက်ပါသူတွေနဲ့ ရာဇဝတ်မှုတွေကိုတော့ ရဲတပ်ဖွဲ့နဲ့ ပူးပေါင်းဖြေရှင်းနေတယ်လို့ ရပ်ကွက်လုံခြုံရေးတပ်ဖွဲ့ဝင်တစ်ဦးက ပြောပါတယ်။
“ကျွန်တော်တို့အင်အားက အခုလက်ရှိ လားရှိုးမြို့ကို လွှမ်းခြုံနိုင်တဲ့အနေအထားတော့ ရှိပါတယ်” လို့ လုံခြုံရေးခေါင်းဆောင်တစ်ဦးက ပြောပါတယ်။
MNDAA ဟာ လားရှိုးကို အုပ်ချုပ်ရေးခိုင်မာအောင် လုပ်ဆောင်နေပြီး မြို့ပေါ်မှာလည်း စစ်ကောင်စီနဲ့ ပတ်သက်နေသူတွေကို ရပ်ကွက်လိုက် စာရင်းကောက်ယူနေသလို ပြီးခဲ့တဲ့လအတွင်းမှာ စစ်ကောင်စီသတင်းပေးတွေကို ဖော်ထုတ်ရရှိခဲ့တယ်လို့ MNDAA က ထုတ်ပြန်ကြေညာထားပါတယ်။
MK-012
#MekongNews
#လားရှိုး
#MNDAA
#လုံခြုံရေး
#တင်းကြပ်
#ထုတ်ပြန်
