မဲခေါင်၊ ဒီဇင်ဘာ-၇
ကရင်နီပြည်၊ ဒီးမော့ဆိုမြို့နယ် အနောက်ဘက်ခြမ်းမှာရှိတဲ့ စစ်ရှောင်စခန်း ၁၅ ခုမှာ Clean yangon က ဦးစီးပြီး ရန်ပုံငွေဈေးဆိုင်တွေ ဖွင့်လှစ်ပေးထားတယ်လို့ ဆိုင်ဖွင့်ထားတဲ့ စစ်ရှောင်ပြည်သူတွေက ပြောပါတယ်။
အောက်တိုဘာ ပထမပတ်ကစပြီး ပြည်တွင်းပြည်ပက အလှူရှင်တွေကိုယ်စား Clean yangon က ဦးဆောင်ကာ လိုတရ ရန်ပုံငွေဈေးဆိုင်တွေဖွင့်လှစ်ဖို့အတွက် စစ်ရှောင်စခန်းကတာဝန်ရှိသူတွေနဲ့ တိုင်ပင်ပြီးတဲ့နောက် စစ်ရှောင်စခန်းတစ်ခုကို တစ်ဆိုင်နှုန်း ဖွင့်လှစ်ပေးဖြစ်တယ်လို့ သိရပါတယ်။
“ဆိုင်က စစ်ရှောင်တွေအတွက် အရမ်းအထောက်အကူဖြစ်တယ်၊ ဆန်လိုရင် ဝေးဝေးသွားဝယ်စရာလည်း မလိုတော့ဘူး၊ ဓာတ်ဆီဖိုးသက်သာတယ်၊ နောက် ရံပုံငွေသေချာလည်ပတ်ပြီး ခြောက်လလောက်ဆိုရင် တအားလိုအပ်တဲ့ မိသားစုအတွက် ဆေးရုံဆေးခန်းသွားဖို့လိုရင် ငွေကူဖို့ ရည်ရွယ်ချက်မျိုးရှိတာပေါ့နော်”လို့ ဆန်ဆိုင်ဖွင့်ထားတဲ့ စစ်ရှောင်စခန်းက အမျိုးသမီးတဦးက ပြောပါတယ်။
လိုတရ ရန်ပုံငွေဆိုင် စုစုပေါင်း ၁၅ ဆိုင်ရှိပြီး ဓာတ်ဆီဆိုင်၊ ဆန်ဆိုင်၊ ကုန်စုံဆိုင်၊ starlink အင်တာနက်ဆိုင်၊ ဖယောင်းတိုင်ထုတ်လုပ်ရေး၊ငွေစုငွေချေးလုပ်ငန်း စတဲ့ ဆိုင်တွေကို စစ်ရှောင်ပြည်သူတွေရဲ့ သဘောဆန္ဒအလိုက် တစ်ဆိုင်ကို မတည်ငွေ သိန်း ၁၀၀ ကနေသိန်း ၁၃၀ အထိ ထုတ်ပေးပြီးလုပ်ငန်းလည်ပတ်စေတယ်လို့ သိရပါတယ်။
“ရန်ပုံငွေကို အလေအလွင့်မရှိအောင်လို့ ကော်မတီတွေဖွဲ့ပြီး ရန်ပုံငွေတာဝန်ခံကသပ်သပ်၊ စျေးရောင်းတာဝန်ခံက သပ်သပ်ရှိရမယ်၊ စစ်ရှောင်ကကော်မတီဝင် သုံးယောက်လည်း ပါဝင်ပြီးတော့ အချင်းချင်းပြန်ထိန်းကျောင်းတဲ့စနစ်နဲ့ လုပ်ထားပါတယ်” လို့ Clean yangon မှ ကိုဇေယျာထွန်းက ပြောပါတယ်။
ရန်ပုံငွေဆိုင် ၁၅ ဆိုင်မှာ အိမ်ထောင်စု ၁၀၀ဝ ကျော်နဲ့ လူဦးရေ ၄၅၀၀ ကျော်ကပါဝင်လည်ပတ်နေပြီး စစ်ရှောင်စခန်းမှာ သာရေး နာရေးကိစ္စတွေနဲ့ အလှူရှင်လာရောက်လှူဒါန်းမှု နည်းပါးတဲ့အခါ ကိုယ်ထူကိုယ်ထဖြေရှင်းနိုင်စေဖို့အတွက် ဆောင်ရွက်ပေးဖြစ်တယ်လို့ သိရပါတယ်။
CJ-004
#MekongNews
#ဒီးမော့ဆို
#လိုတရ
#ရန်ပုံငွေဆိုင်
#မတည်ငွေ
#သိန်း၁၀၀
