မဲခေါင်၊ ဒီဇင်ဘာ ၂
စစ်ကောင်စီ အာဏာသိမ်းခဲ့တဲ့ သုံးနှစ်ကျော်ကာလအတွင်းမှာ မသမာသူတချို့က PDF တွေရဲ့ ဓာတ်ပုံတွေနဲ့ အကောင့်တုတွေဖန်တီးပြီ ပြည်သူလူထုဆီကငွေကြေးလိမ်လည်တာတွေရှိနေတယ်လို့ တော်လှန်ရေးလူလိမ်အကောင့် ဖော်ထုတ်ရေးတွေကပြောပါတယ်။
စစ်ကောင်စီက တော်လှန်ရေးကို နှောင့်နှေးစေဖို့ရည်ရွယ်ချက်နဲ့ ပြုလုပ်တာ၊ လောင်းကစားသမားတွေက အလွယ်ရတဲ့နည်းနဲ့ ပြည်သူလူထုရဲ့ သနားတတ်တဲ့စိတ်ကိုအသုံးချတာ၊ တော်လှန်ရေးကို ခုတုံးလုပ်ပြီး လိမ်လည်တာ၊ သေဆုံးခဲ့ရပြီးတဲ့ PDF တွေရဲ့ ပုံတွေနဲ့အလှူခံတာတွေပြုလုပ်နေတာပါ။
“လူလိမ်တွေက အကောင့်တွေကို နှစ်ကောင့်သုံးကောင့်ဖွင့်ပြီး အုပ်စုလိုက် သူတို့အစုအဖွဲ့နဲ့သူတို့ လိမ်တာတွေရှိတယ်၊ အခုဆို သုံးနှစ်တာအတွင်း လူလိမ်အကောင့်ပေါင်း ၂၀၀ ကျော်ရှိတယ်၊ တချို့ကအကောင့်တွေပြန်ဖျက်ပြီး ထပ်ဖွင့်တာတွေလည်းရှိတယ်”လို့တော်လှန်ရေးလူလိမ်အကောင့်ဖော်ထုတ်သူက ပြောပါတယ်။
မသမာသူလူလိမ်အကောင့်တွေကို တွေ့တဲ့အခါမှာ နီးစပ်ရာ ပြည်သူလူထုအချင်းချင်းမျှဝေပြီး report ထုတာ၊ လူလိမ်အကောင့်ဖော်ထုတ်ရေးအဖွဲ့တွေမှာသတင်းပေးတာတွေ ပြုလုပ်ကြဖို့ကိုလည်း သူက တောင်းဆိုထားပါတယ်။
ဒိအပြင် စစ်ဘေးရှောင်ပြည်သူတွေကို လှူဒါန်းထားတဲ့ ဓာတ်ပုံတွေကို ကူးယူပြီး ကိုယ်တိုင်က လှူဒါန်းနေသလိုဟန်ဆောင်ကာ အလှူခံတာတွေ၊ လူသိများတဲ့သူတွေရဲ့ဓာတ်ပုံတွေ နာမည်တွေကိုအသုံးပြုပြီး ဟန်ဆောင်လိမ်လည်တာတွေလည်း ရှိနေတယ်လို့သိရပါတယ်။
“ဒီပုံတွေက ကျွန်တော်လှူထားတဲ့ပုံတွေကို ယူသုံးထားတာ၊ သူလှူထားတာမဟုတ်ဘဲနဲ့ တခြားသူနားလိုက်အလှူခံနေတာ၊ ကျွန်တော်အသိတချို့ပါငွေတွေပါသွားတယ်” လို့ Karenni Hope က ကိုလွမ်းကပြောပါတယ်။
လူလိမ်တွေကြောင့် ပြည်သူလူထုရဲ့ ချွေးနည်းစာတွေ ဆုံးရှုံးရပြီး တော်လှန်ရေးကိုလည်း ထိခိုက်စေတာတွေကြောင့် လှူဒါန်းတဲ့သူတွေအနေနဲ့ သေသေချာချာစိစစ်ပြီးမှ လှူဒါန်းတာတွေ ပြုလုပ်ကြဖို့လိုအပ်တယ်လို့ ဆိုပါတယ်။
CJ-004
#MekongNews
#PDF
#အကောင့်တု
#၂၀၀ကျော်
#လိမ်လည်
#အလှူခံ
#လူလိမ်အကောင့်
