မဲခေါင်၊ နိုဝင်ဘာ ၃၀
ကရင်နီပြည် ကြားကာလ အုပ်ချုပ်ရေးကောင်စီ IEC က ကရင်နီ ပြည်ရဲ့ အရေးကြီးတဲ့ အုပ်ချုပ်ရေးယန္တာရား လည်ပတ်နိုင်ဖို့အတွက် တရားရေးဌာနဖွဲ့စည်းခဲ့ရာ တစ်နှစ်အတွင်း အမှုအမျိုးအစား ငါးမျိုးကို တရားစီရင်ဆဲဖြစ်ကာ အမှုပေါင်း ၂၆ မှုကို ပြီးပြတ်အောင် တရားစီရင်နိုင်ခဲ့တယ်လို့ IEC က ထုတ်ပြန်ချက်မှာ ပါရှိပါတယ်။
တရားရေးဌာနကို ၂၀၂၃ ခုနှစ် နိုဝင်ဘာလ ၂၉ ရက်ကစတင်ဖွဲ့စည်းခဲ့ရာ အခုနှစ်၊ နိုဝင်ဘာ ၂၉ ရက်က တစ်နှစ်ပြည့်ခဲ့တာပါ။
တရားစီရင်ရေးအနေနဲ့ အကြမ်းဖက်မှု တိုက်ဖျက်ရေးဥပဒေအရ စွဲဆိုတဲ့အမှု ၂၀၊ မူးယစ်ဆေးဝါးဆိုင်ရာအမှု ၄၁ မှု၊ လူသတ်မှု နှစ်မှု၊ မတရားအသင်းအက်ဥပဒေအရ စွဲဆိုတဲ့အမှု တစ်မှု၊ ရာဇသတ်ကြီးအရ စွဲဆိုတဲ့အမှု ခုနှစ် မှုတို့ကို ကိုင်တွယ်ဖြေရှင်းနေပြီး ၂၆ မှုကိုတော့ ပြီးပြတ်အောင် တရားစီရင်ပြီးပြီလို့ ဆိုပါတယ်။
တရားရေးဌာနက တစ်နှစ်တာကာလအတွင်း အမျိုးသားညီညွတ်ရေးအစိုးရ NUG ရဲ့ တရားရေးဝန်ကြီးဌာနနဲ့ လုပ်ငန်းညှိနှိုင်းဆွေးနွေးတာ၊ ပြည်နယ်တွင်း တရားစီရင်ရေးဆိုင်ရာ သင်တန်းတွေပို့ချတာ၊ ပြည်သူလူထုနဲ့ တွေ့ဆုံပြီး ဥပဒေဆိုင်ရာ အသိပညာပေးတာ၊ အကျဥ်းထောင်တွေမှာအကျဥ်းကျနေသူတွေကို စစ်ဆေးကြည့်ရှုတာ၊ အကျဉ်းထောင်ဝန်ထမ်းတွေကို စွမ်းရည်မြှင့်တင်ရေးသင်တန်းပို့ချတာ၊ ဥပဒေရုံးအဆင့်ဆင့် အမှုတွေလက်ခံဆောင်ရွက်ပြီး ပြစ်မှုအလိုက်အပြစ်ပေးအရေးယူတာတွေ ပြုလုပ်ခဲ့တယ်လို့သိရပါတယ်။
အကျဉ်းထောင်အနေနဲ့ မူလရှိနေတဲ့ အကျဉ်းထောင်ကို အမှတ်(၁) သတ်မှတ်ကာ အကျဉ်းထောင်အမှတ်(၂ )ကို အခုနှစ် ဖေဖော်ဝါရီလမှာ ထပ်တိုးတည်ဆောက်ပြီးတဲ့နောက် အကျဉ်းကျတရားခံတွေအနေနဲ့ ကျူးလွန်ခဲ့တဲ့ ပြစ်မှုအပေါ်နောင်တရပြီး ပြန်လည်ပြင်ဆင်နိုင်ဖို့၊ လွတ်မြောက်တဲ့အခါ လူမှုအသိုင်းအဝိုင်းမှာ ပြန်လည်ရပ်တည်နိုင်ဖို့အတွက်လည်း စီမံဆောင်ရွက်တာတွေ ရှိတယ်လို့ သိရပါတယ်။
အကျဉ်းထောင် အမှတ်(၁) မှာ အကျဉ်းသား ၁၅၀ ဦးနဲ့ အမှတ်( ၂ )မှာ ၅၆ ဦးတို့ကို ဆက်လက်အကျဉ်းချထားဆဲဖြစ်တယ်လို့ ဆိုပါတယ်။
တရားရေးဌာနကို ဖွဲ့စည်းရခြင်းက ပြည်သူလူထုရဲ့ ဥပဒေပါ အခွင့်အရေးတွေ ရရှိစေဖို့၊ တရားဥပဒေစိုးမိုးရေးကို အကောင်အထည်ဖော်ဆောင်ရွက်ရာမှာ အထောက်အကူပြုနိုင်ဖို့၊ လွတ်လပ်ပြီး တရားမျှတတဲ့ တရားစီရင်ရေးမဏ္ဍိုင်ဖော်ဆောင်ရာမှာ အထောက်အကူပြုနိုင်ဖို့အတွက် ဖြစ်တယ်လို့ သိရပါတယ်။
CJ-004
#MekongNews
#ကရင်နီပြည်
#တရားရေးဌာန
#တရားစီရင်
#အကျဉ်းထောင်
