မဲခေါင်၊ နိုဝင်ဘာ ၂၉
ထိုင်းအစိုးရဟာ သူတို့နိုင်ငံအတွင်းမှာ ခိုလှုံနေတဲ့ ကမ္ဘော့ဒီးယား ဒီမိုကရေစီအရေး တက်ကြွ လှုပ်ရှားသူ အတိုက်အခံ ၆ ယောက်ကို နိုဝင်ဘာ ၂၄ ရက်မှာ ဖမ်းဆီးပြီး ကမ္ဘောဒီးယားနိုင်ငံကို ပြန်လည် ပေးအပ်ခဲ့ရာမှာ နိုဝင်ဘာ ၂၈ ရက်နေ့က ဒီ ၆ ယောက်ကို အာဏာရှင် ကမ္ဘောဒီးယားအာဏာပိုင်တွေက နိုင်ငံတော် ပုန်ကန်မှုနဲ့ စွဲချက်တင်လိုက်ကြောင်း သိရှိရပါတယ်။
ပြည်ပကို ထွက်ပြေးတိမ်းရှောင်နေရတဲ့ ခေါင်းဆောင်တွေ ထူထောင်ထားတဲ့ အတိုက်အခံပါတီ ခမာဒီမိုကရေစီလှုပ်ရှားမှု အဖွဲ့ဝင် ပန်ရှန်၊ ဟောင်အန်၊ မင်းချန်သွန်၊ ယင်ချန်သူ၊ ဆိုယန်းခွန်သီယာ၊ဗွန်ချန်ရာတနာ ဆိုတဲ့ အမျိုးသမီး ၄ ယောက်နဲ့ အမျိုးသား ၂ ယောက်ကို ထိုင်းက ဖမ်းဆီးပြီး ကမ္ဘောဒီယားလက်အပ်လိုက်ခြင်း အပေါ် နှစ်နိုင်ငံ အာဏာရှင်အချင်းချင်း နိုင်ငံရေးအတိုက်အခံတွေ လက်လွှဲပေးရေး သဘောတူညီထားမှုအရ ထိုင်းဘက်က ပြန်လွှဲအပ်တာပါ။
ထောင်သားတွေ ပြွတ်သိပ်နေတဲ့ ကမ္ဘောဒီးယားအကျဉ်းထောင်တွေထဲမှာ ဒီ တက်ကြွလှုပ်ရှားဆန့်ကျင်သူတွေဟာ ဖေ့စ်ဘုတ်ပေါ် အစိုးရမကျေနပ်ကြောင်း ရေးသားရုံနဲ့ အနှိမ်ခံရတော့မှာ ဖြစ်ကြောင်း မဟာမိတ်အတိုက်အခံပါတီဖြစ်တဲ့ ကမ္ဘောဒီးယားအမျိုးသား ကယ်ဆယ်ရေးပါတီက ထုတ်ပြန် ကန့်ကွက်သွားပါတယ်။
၂၀၁၈ အထွေထွေရွေးကောက်ပွဲကတည်းက ကမ္ဘောဒီးယားအာဏာရ ဝန်ကြီးချုပ်ဟွမ်ဆန်ရဲ့ ပြည်သူ့ပါတီဟာ အတိုက်အခံပါတီအားလုံးကို အမြစ်ပြတ်တိုက်ဖျက်ချေမှုန်းခဲ့တာကြောင့် အားလုံး ပြည်ပကို ထွက်ပြေးတိမ်းရှောင်သူတွေ၊ ထောင်သွင်းအကျဉ်းချခံရသူတွေများစွာ ရှိခဲ့ရပါတယ်။
ဆယ်စုနှစ် ၄ ခုကြာ နိုင်ငံအာဏာကို အာဏာရှင်ဆန်ဆန်သိမ်းယူခဲ့တဲ့ ဟွမ်ဆန်ဟာ ၂၀၂၃ ထိ အုပ်စိုးခဲ့အပြီးမှာလည်း နောက်ဆုံးရွေး ကောက်ပွဲမှာလည်း သားဖြစ်သူ ဟွမ်မာနတ်ကိုပဲ ပြိုင်ဘက်မရှိအနေအထားဖြစ်အောင် ဖန်တီးပေးပြီး ရွေးကောက်ခံ ဝန်ကြီးချုပ်ဖြစ်စေခဲ့တာကြောင့် နိုင်ငံတကာရဲ့ ဝေဖန်မှုတွေ ခံနေခဲ့ရတာဖြစ်ပါတယ်။
အခု ထိုင်းဘက်က လူသားချင်းစာနာမှုနဲ့ လူ့အခွင့်အရေးချိုးဖောက်ပြီး ကမ္ဘောဒီးယားဆီ ပြန်လည်လွှဲအပ်ပေးလိုက်တဲ့ တက်ကြွ လှုပ်ရှားသူ ၆ ယောက်ဟာ စီရင်ချက်ချမှတ်ရင် ထောင်ဒဏ် ၁၀ နှစ်စီ ချမှတ်ခံရဖို့ သေချာသလောက်ရှိနေပါတယ်။
Ref: asahi
MKF-001
#MeKongNews
#ကမ္ဘောဒီးယား
#အတိုက်အခံ
#ဒီမိုကရေစီ
#တက်ကြွလှုပ်ရှားသူ
#ဖမ်းဆီး
#ထိုင်းပြန်ပို့
