မဲခေါင်၊ နိုဝင်ဘာ ၂၉
ထိုင်းနိုင်ငံဟာ အဓိက စီးပွားရေးလုပ်ငန်းအဖြစ် နိုင်ငံခြားခရီးသွားလုပ်ငန်းနဲ့ ဖျော်ဖြေရေးလုပ်ငန်းတွေကို အားထားနေရာမှာ သမားရိုးကျအလုပ်တွေက ဝင်ငွေ လုံလောက်မှုမရှိခြင်းကြောင့် အချိန်ပိုင်း ချစ်သူ၊ ဇနီးအဖြစ် စာချုပ်ပြီး ငွေရှာတဲ့ လုပ်ငန်း ကြီးထွားလာပါတယ်။
အင်ဒိုနီးရှားနိုင်ငံမှာ သာယာတဲ့ အိမ်ထောင်တည်ထောင်နိုင်ရေးအတွက် ဆွေးနွေးငြင်းခုန်မှုတွေ ဒီရေမြင့်တက် လာချိန် ထိုင်းနိုင်ငံမှာတော့ ပုလဲနက်များလို့ ဒေသတွင်းခေါ်ကြတဲ့ ချစ်သူဇနီး အငှားလိုက်လုပ်ငန်းဟာ ဆင်းရဲတဲ့ ကျေးလက်ဒေသတွေက လူငယ်လူလွတ် အမျိုးသမီးငယ်တွေအတွက် အဓိက အားထားရာ လုပ်ငန်းကြီးဖြစ်လာနေကြောင်းကို စာရေးဆရာ လာဗတ် အေ အီမန်နျူရယ်က Thai Taboo: The Rise of Wife Rental in Modern Society: Exploring Love, Commerce, and Controversy in Thailand’s Wife Rental Phenomenon ဆိုတဲ့ အမည်နဲ့ စာအုပ်ရေးသားပြုစုထုတ်ဝေရာမှာ ထည့်သွင်းရေးသားခဲ့တာဖြစ်ပါတယ်။
ထိုင်းနိုင်ငံရဲ့ ခေတ်သစ်လူ့အဖွဲ့အစည်းမှာ သမားရိုးကျ သမာအာဇီ၀ အလုပ်တွေက ရတဲ့ဝင်ငွေဟာ ရပ်တည်နိုင်ဖို့ ခက်ခဲတာကြောင့် မိန်းကလေးငယ်တွေဟာ ရက်တိုကနေ လရှည်အထိ စာချုပ်ပြီး နိုင်ငံအတွင်းလာရောက် နေထိုင်လည်ပတ်တဲ့ နိုင်ငံခြားသားတွေရဲ့ တရားမဝင် တိုးရစ်ဂိုက်အသွင်နဲ့ ချစ်သူ၊ ဇနီးအဖြစ်ပါ စာချုပ်ပြီး အခကြေးငွေ ရယူနေကြတာလို့ ဆိုပါတယ်။
နိုင်ငံခြားခရီးသွားများတဲ့ ပတ္တရားမှာ ဒီလုပ်ငန်းတွေဟာ အတားအဆီး မရှိ၊ ဘားဆိုင်တွေ၊ နိုက်ကလပ်တွေမှာတင် သဘောတူစာချုပ်တွေ ရေးထိုးပြီး ရေတိုရေရှည် အငှားချစ်သူ၊ ဇနီး လုပ်ငန်းတွေကို အများအပြားလုပ်ဆောင်နေပါတယ်။
ငွေကြေးရရှိမှုဟာ မိန်းကလေးရဲ့ စွဲဆောင်မှုရှိခြင်း၊ ပညာအရည်အချင်းနဲ့ ဘာသာ စကားကျွမ်းကျင်ခြင်း၊ အငှားဇနီးကာလ အတိုအရှည်ပေါ် မူတည်ပြီး ဒေါ်လာ ၁၆၀၀ ကနေ ဒေါ်လာ ၁၁၆၀၀၀ အထိ ရှိကြောင်း ဒီစာအုပ်ထဲမှာ လေ့လာရေးသားဖော်ပြထားပါတယ်။
တောင်ကိုရီးယားနဲ့ ဂျပန်မှာ ဒီလို ချစ်သူ၊ ဇနီး အငှားလုပ်ငန်းတွေ တွင်ကျယ်နေတာကြာခဲ့ပြီဖြစ်ပြီး ထိုင်းမှာ ခုနောက်ပိုင်းတွင်ကျယ်လာပေမယ့် ခရီးသွားလုပ်ငန်းမြှင့်တင်နိုင်မှုကိုသာ အဓိကထားတဲ့ ထိုင်းအစိုးရမှာ ဒီလို ရေတို ဇနီး၊ ချစ်သူ စာချုပ်ငှားရမ်းခြင်းကို တားမြစ်အရေးယူနိုင်တဲ့ ဥပဒေ ထုတ်ပြန်ထားခြင်း မရှိတာကြောင့် လွတ်လပ်စွာ လုပ်ကိုင်ရင်း ကြီးမားတဲ့ စီးပွားရေးစျေးကွက် တစ်ခုဖြစ်လာတာလို့လည်း စာရေးဆရာ အီမန်နျူရယ်က သုံးသပ်ရေးသားခဲ့ပါတယ်။
Ref: news18
MKF-001
#MeKongNews
#ထိုင်း
#ချစ်သူ
#အငှား
#ဝန်ဆောင်မှု
#ကြီးထွားလာ
