မဲခေါင်၊ နိုဝင်ဘာ ၂၇
ပအိုဝ်းအမျိုးသားလွတ်မြောက်ရေး အဖွဲ့ချုပ် (PNLO) ရဲ့ ထိန်းချုပ်နယ်မြေဖြစ်တဲ့ ရှမ်းပြည်တောင်ပိုင်း၊ မောက်မယ်မြို့နယ်၊ ဟိုနမ့်ဒေသမှာ စစ်ကောင်စီနဲ့ PNO ပူးပေါင်းတပ်ဖွဲ့နဲ့ PNO တို့ နိုဝင်ဘာလ ၂၀ ရက်ကနေ ဒီကနေ့(နိုဝင်ဘာလ ၂၇)ထိ နေ့စဉ် တိုက်ပွဲဖြစ်ပွါးခဲ့ရာ စစ်ကောင်စီဘက်က ၃၁ ဦး သေဆုံးခဲ့တယ်လို့ PNLO ရဲ့ စစ်ဖက်ဆိုင်ရာ ပြန်ကြားရေးတာဝန်ခံ ခွန်ရိန်းယံ က မဲခေါင်သတင်းဌာနကို ပြောပါတယ်။
စစ်ကောင်စီနဲ့ ပအိုဝ်းပြည်သူ့စစ်(PNO)ပူးပေါင်းတပ်ဖွဲ့က ရဟန်းသံဃာတော် ဆရာတော်တွေရဲ့ မေတ္တာရပ်ခံချက်ကို ပစ်ပယ်ပြီး PNLO ရဲ့ ထိန်းချုပ်နယ်မြေ၊ ပအိုဝ်းဒေသကို ကျူးကျော်စစ်ကြောင်းထိုး တိုက်ခိုက်လာတဲ့အတွက် တိုက်ပွဲပြင်းထန်နေတယ်လို့ PNLOက ဒီကနေ့ ထုတ်ပြန်အသိပေးထားပါတယ်။
နိုဝင်ဘာလ ၂၀ ရက်က စတင်ကာ ဟိုနမ့်ဒေသကို စစ်ကြောင်းတွေ အင်အားအလုံးအရင်းနဲ့ ဝင်ရောက်ကာ PNLO ကို တိုက်ခိုက်ခဲ့တာဖြစ်ပြီး မနေ့(နိုဝင်ဘာလ ၂၆)ကလည်း ဟိုနမ့်ဒေသတောင်ဘက်ရှိ PNLA တပ်စခန်းကို ထိုးစစ်ဆင်တိုက်ခိုက်ခဲ့တာ ဖြစ်တယ်လို့ အဲဒီထုတ်ပြန်ချက်မှာ ပါရှိပါတယ်။
“အရပ်သားနေအိမ်တွေ ထိခိုက်ပျက်စီးတာလည်း ရှိပါတယ်၊ ဒါပေမယ့် အဲဒါကိုတော့ အတည်ပြုနေဆဲပါ။ ၂၀ရက်နေ့ကနေ ဒီနေ့အထိ တိုက်ပွဲတွေက နေ့စဉ်ဖြစ်ပွားနေပါတယ်။ အဓိကကတော့ ကျနော်တို့နေနေတဲ့ တောထဲအထိကို ထိုးစစ်ဆင်လာလို့ တိုက်ပွဲဖြစ်ပွားနေရတာ ဖြစ်ပါတယ်” လို့ ခွန်ရိန်းယံက မဲခေါင်သတင်းဌာနကို ပြောပါတယ်။
PNLO အနေနဲ့ ရဟန်းသံဃာတော် ဆရာတော်တွေရဲ့ မေတ္တာရပ်ခံချက်ကို အလေးထားပြီးတော့ တိုက်ပွဲမဖော်ဆောင်ပေမယ့် စစ်ကောင်စီနဲ့ ပအိုဝ်းပြည်သူ့စစ် (PNO) ပူးပေါင်းတပ်ဖွဲ့က ရဟန်းသံဃာတော် ဆရာတော်တွေရဲ့ မေတ္တာရပ်ခံချက်ကို ပစ်ပယ်ပြီး PNLO တပ်စခန်းရှိရာနဲ့ ကျေးရွာတွေကို လက်နက်ကြီးတွေနဲ့ ပစ်ခတ်ပြီး ထိုးစစ်ဆင်လာတာကြောင့် တိုက်ပွဲပြင်းထန်နေတယ်လို့ သိရပါတယ်။
PNLO အနေနဲ့ စစ်အာဏာရှင်စနစ်ကို တိုက်ထုတ်နေတာဖြစ်ပြီး လူပုဂ္ဂိုလ်ကို ရည်ရွယ်ကာ တိုက်ခိုက်နေတာ မဟုတ်သလို ပအိုဝ်းအချင်းချင်းတိုက်ခိုက်နေတာလည်း မဟုတ်ဘူးလို့ ခွန်ရိန်းယံက ပြောပါတယ်။
စစ်ကောင်စီနဲ့ စစ်ကောင်စီလက်အောက်ခံ PNO ပြည်သူ့စစ်က နိုဝင်ဘာလ ၂၀ ရက်၊ မနက် ၁၀ နာရီခွဲ ဝန်းကျင်မှာ PNLO နယ်မြေအတွင်းရှိ အများပြည်သူအသုံးပြုနေတဲ့ ဆိုက်ခေါင်-ဟိုနမ့်ပွန်ချောင်း တံတားကို လေယာဉ်နဲ့ ဗုံးသုံးကြိမ် ကြဲချတိုက်ခိုက်ခဲ့ပြီးနောက် စစ်ကြောင်းထိုး ဝင်ရောက်လာတာ ဖြစ်တယ်လို့လည်း သိရပါတယ်။
CJ-003
#MekongNews
#ဟိုနမ့်ဒေသ
#စစ်ကောင်စီPNO
#၃၁ဦးသေဆုံး
#PNLO
ဓါတ်ပုံ – PNLA
