မဲခေါင်၊ နိုဝင်ဘာ ၁၆
ရှမ်းပြည်မြောက်ပိုင်း၊ နောင်ချိုမြို့နယ်၊ တောင်ခမ်းရွာတိုက်ပွဲအတွင်း စစ်ကောင်စီဘက်က တပ်ရင်းမှူး ဗိုလ်မှူးနဲ့ ဗိုလ်ကြီးအဆင့်ရှိသူတို့ သေဆုံးပြီး လေးဦးကို အရှင်ဖမ်းမိခဲ့တယ်လို့ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) က ဒီနေ့ (နိုဝင်ဘာ ၁၆) မှာ ထုတ်ပြန်ပါတယ်။
တောင်ခမ်းမှာ စစ်ကောင်စီရဲ့ ခြေလျင်တပ်ရင်း ၃၅၄ နဲ့ အမြောက်တပ် ၉၀၂ တို့မှာ ဒီနေ့တိုက်ပွဲပြင်းထန်ခဲ့တာဖြစ်ပြီး တပ်မ ၁၁၊ ခမရ ၂၁၃ ရဲ့ တပ်ရင်းမှူးနဲ့ ဗိုလ်ကြီးအပါအဝင် စစ်ကောင်စီတပ်သားတွေ သေဆုံးခဲ့တယ်လို့ TNLA ထုတ်ပြန်ချက်က ဆိုပါတယ်။
ဒါ့အပြင် လက်နက်ယမ်းခမ်းနဲ့အတူ စစ်ကောင်စီတပ်ဖွဲဝင် လေးဦးကိုလည်း အရှင်ဖမ်းဆီးနိုင်ခဲ့တယ်လို့ ဆိုပါတယ်။
ရှမ်းပြည်တောင်ပိုင်း ရပ်စောက်-ကျောက်ဂူမှ နောင်ချိုမြိုနယ်အတွင်း အင်အားဖြည့်တင်းရန် ကြိုးပမ်းနေသည့် စစ်ကောင်စီတပ်မှ ထိုးစစ်ဆင်လာတာကြောင့် တိုက်ပွဲဖြစ်ပွားခဲ့တာလို့ ဆိုပါတယ်။
တောင်ခမ်းအမြောက်တပ်စခန်းကို ထိန်းချုပ်ဖို့အတွက် စစ်ကောင်စီဟာ မြေပြင်ရော၊ လေကြောင်းနဲ့ပါ လက်နက်ခဲယမ်းနဲ့ စစ်အင်အားဖြည့်တင်းနေပြီး စစ်ကောင်စီတပ်ဟာ တိုက်ပွဲဖြစ်ပွားခြင်းမရှိတဲ့ နေရာတွေကိုလည်း လက်နက်ကြီးများ ပစ်ခတ်ခြင်း၊ လေကြောင်းနဲ့ ဗုံးကြဲတိုက်ခိုက်မှုများ လုပ်ဆောင်နေတယ်လို့ TNLA က ထုတ်ပြန်ပါတယ်။
စစ်က္ကသိုလ်တွေရှိတဲ့ ပြင်ဦးလွင်နဲ့ မိုင်အနည်းငယ်သာဝေးတဲ့ ရှမ်းမြောက် နောင်ချိုမြို့နယ်ကို စစ်ကောင်စီဘက်က အပြင်းအထန်တိုက်ခိုက်နေပြီး မြို့တွင်းကိုလည်း နေ့စဥ်ဗုံးကြဲနေပါတယ်။
နောင်ချိုနဲ့ ပြင်ဦးလွင်မြို့ကြားမှာရှိတဲ့ တောင်ခမ်းရွာမှာ စစ်ကောင်စီရဲ့ အမှတ် (၉၀၂) အမြောက်တပ်စခန်းကွပ်ကဲမှုဌာနချုပ်၊ အမြောက်တပ်ရင်း ၂၀၆ နဲ့ ၄၀၆ တပ်ရင်း၊ အမှတ် (၃၅၄) ခြေလျင်တပ်ရင်းတွေ အခြေစိုက်ထားပါတယ်။
တောင်ခမ်းရွာဟာ နောင်ချို့မြို့နဲ့ မိုင် ၂၀ ခန့်ဝေးပြီး စစ်ကောင်စီရဲ့ ခြေလျင်တပ်ရင်းတွေအပါ အမြောက်တပ်စခန်းဌာနချုပ်ပါ ရှိတဲ့အတွက် စစ်ရေးအရ အရေးပါတဲ့ နေရာဖြစ်ပါတယ်။
စစ်ကောင်စီရဲ့ တယ်လီဂရမ်ချန်နယ်တွေမှာတော့ တောင်ခမ်းရွာကို ပြန်လည်ထိန်းချုပ်နိုင်ပြီး TNLA နဲ့ ပူးပေါင်းအဖွဲ့တွေ ဆုတ်ခွာသွားကြပြီလို့ ရေးသားကြပါတယ်။
#MeKongNews
#စစ်ကောင်စီ
#တပ်ရင်းမှူး
#တောင်ခမ်း
#နောင်ချို
#ရှမ်းမြောက်
#တအာင်း
#ပလောင်
