မဲခေါင်၊ နိုဝင်ဘာ ၁၆
ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့၊ အားကစားကွင်းမှာ ဖမ်းဆီးထိန်းသိမ်းထားတဲ့ ဖယ်ခုံပြည်သူ ၂၀၀ ကျော်ကို ဝါဒဖြန့်ဗွီဒီယိုရုက်ကူးရေးမှာအသုံးချကာ စစ်ကောင်စီလက်အောက်ခံ ရုပ်သံမီဒီယာများမှ ထုတ်လွှင့်ဖို့စီစဉ်နေတယ်လို့ ဒေသခံတစ်ဦးက မဲခေါင်ကိုပြောပါတယ်။
PDF တွေက ဖမ်းဆီးထားတဲ့ ဒေသခံတွေကို စစ်ကောင်စီက ကယ်ထုတ်လာတဲ့ပုံစံမျိုး၊ PDF တွေလက်ထဲမှာ နေထိုင်ရပုံအခြေအနေတွေကို ဒေသခံတစ်ဦးချင်းက ပြောပြနေတဲ့ပုံစံမျိုး ဗွီဒီယိုရိုက်ကူးဖို့စီစဉ်နေတယ်လို့ ဖမ်းဆီးခံတွေကို သွားရောက်တွေ့ဆုံခဲ့တဲ့ ဒေသခံတစ်ဦးက ပြောပါတယ်။
“သူတို့ကို ကောင်းကောင်းထားတယ်၊ ဆွေမျိုးတွေလည်း လာတွေ့လို့ရတယ်” လို့ သွားရောက်ကြည့်ရှု့ခဲ့သူတစ်ဦးက ပြောပါတယ်။
ဖမ်းဆီးခံရသူတွေ နေထိုင်တဲ့ကျေးရွာတွေဟာ တော်လှန်ရေး အင်အားစုတွေကို ထောက်ခံကြပြီး ထောက်ပံ့မှုတွေလည်း ပြုလုပ်ကြတယ်လို့ယူဆကာ စစ်ကောင်စီက ဝါဒဖြန့် စစ်ဆင်ရေးအနေနဲ့ တန်ပြန်အသုံးချဖို့ စီစဉ်ထားတာလို့ဆိုပါတယ်။
ဝါဒဖြန့် ဗီဒီယိုတွေ ရိုက်ကူးပြီးရင် နေထိုင်ခွင့် လက်မှတ်ထုတ်ပေးပြီး ခံဝန်ကတိနဲ့ ပြန်လည်နေထိုင်ခွင့် ပြုမယ့်အပြင် လက်ရှိအားကစားရုံမှာ ပြန်လည်နေထိုင်ရင်လည်း စစ်ကောင်စီက လိုအပ်တဲ့ ထောက်ပံ့မှုတွေ လုပ်ဆောင်ပေးမယ်ဆိုပြီး စည်းရုံးထားတယ်လို့ သူကပြောပါတယ်။
ဖမ်းဆီးခံရသူတွေထဲမှာ သာမာန်တောင်သူ၊ ၇၀ ကျော်သက်ကြီးရွယ်အို၊ လေဖြတ်နေသူ၊ နာတာရှည်ရောဂါသည်၊ မသန်စွမ်း၊ ကိုယ်ဝန်ဆောင်၊ နို့တိုက်မိခင်၊ ကလေးသူငယ်တွေ ပါဝင်ကြပြီး စားရေးသောက်ရေး အခက်အခဲမရှိပေမယ့်နေရာထိုင်ခင်း အဆင်မပြေမှုတွေ ရှိတယ်လို့ ဆိုပါတယ်။
လက်ရှိ သူတို့ စားဝတ်နေရေးကို ပင်လောင်းမြို့ခံတွေက တာဝန်ယူစီစဉ်ပေးထားပြီး လာရောက်လှူဒါန်းလိုသူတွေလည်း သွားရောက်ခွင့်ပြုထားတယ်လို့ သိရပါတယ်။
“ကျနော်ရောက်တဲ့အချိန် စစ်ရှောင်တွေသုံးဖို့ ရေကားစီစဉ်ပေးနေတာ၊ တစ်ပတ်လောက်ပဲတဲ့။ လမ်းအခြေအနေကောင်းရင် စစ်တပ်က ပြန်ပို့ပေးမှာတဲ့၊ အခုလုံခြုံအောင်ထားထားတာတဲ့၊ ဓါတ်ပုံရိုက်ခွင့်တော့ မပေးဘူး” လို့ ဆွေမျိုးနီးစပ်သူတစ်ဦးက ပြောပါတယ်။
နိုဝင်ဘာလ ၁၁ ရက်က ဖယ်ခုံမြို့နယ်ကို စစ်ကောင်စီ စစ်ကြောင်းထိုးပြီးနောက် ပူချယ်၊ ကုန်းဆုံ၊ လုံကာကျေးရွာတို့ကနေ အရပ်သား ၂၀၀ ကျော်ကိုဖမ်းဆီးခဲ့ပြီး ပင်လောင်းမြို့၊ လေ့ကျင့်ရေးတပ်မှာ ချုပ်နှောင်ခဲ့ပြီးနောက်မှာ ပင်လောင်းအားကစားကွင်းကို ပြောင်းရွှေ့ထိန်းသိမ်းထားတာလို့ ပြောပါတယ်။
ပြီးခဲ့တဲ့ ၂၀၂၂ ခုနှစ်တုန်းကလည်း စစ်ကောင်စီက ဖယ်ခုံမြို့နယ် ပူချယ်ရွာသား ၂၀ ကျော်ကို ဖမ်းဆီးခဲ့ပြီးနောက် သေဒဏ်ပေးခဲ့ဖူးပါတယ်။
MK-14
#MeKongNews
#ရှမ်းပြည်တောင်ပိုင်း
#ပင်လောင်းမြို့နယ်
#အားကစားရုံ
#ဖမ်းဆီးထိန်းသိမ်း
#ဖယ်ခုံမြို့နယ်
#ပူချယ်ရွာ
#စစ်ကောင်စီ
#ဝါဒဖြန့်
