မဲခေါင်၊ နိုဝင်ဘာ-၁၆
ဆောင်းရာသီဝင်ရောက်ပြီဖြစ်လို့ စစ်ရှောင်စခန်းတွေမှာ နေထိုင်သူတွေ အအေးဒဏ်ရဲ့ နောက်ဆက်တွဲရောဂါတွေဖြစ်ပွါးနေတာကြောင့် ဆေးဝါး အပါအဝင် အနွေးထည်နဲ့ စောင်တွေ အရေးတကြီး လိုအပ်လာပါတယ်။
အေးချမ်းတဲ့ရာသီဥတုမှာ နွေးနွေးထွေးထွေးနေဖို့လိုအပ်သော်လည်း စောင်နှင့် အနွေးထည်မရှိတာကြောင့် အအေးဒဏ်ကြောင့်ဖြစ်တဲ့ နှာစေး၊ ချောင်းဆိုးနဲ့ ဖျားနာခြင်းကဲ့သို့ ရောဂါများ ဖြစ်ပွါးသူ များပြားလာတယ်လို့ သိရပါတယ်။
“အခုက အရမ်းအေးလာတော့ မခံစားနိုင်ဘူး။ သုံးယောက်ရှိရင် စောင်ကိုထပ်ပြီး သုံးယောက်ကွေးအိပ်ရတယ်။ တအားအေးတော့ အဲ့လိုပဲလုပ်ရတယ်။ ညဖက် မီးဖိုချင်ပေမယ့် လေယာဉ်ကြောင့် မဖိုရဲဘူး” လို့ စိန်ရောင်ခြည်စစ်ရှောင်စခန်းက အသက် ၃၅ နှစ်အရွယ် အမျိုးသမီးကပြောပါတယ်။
အိမ်ခြေ ၄၀ ကျော်ရှိပြီး လူဦးရေ ၂၀၀ ဝန်းကျင်ရှိတဲ့ စိန်ရောင်ခြည်စစ်ရှောင်စခန်းမှာ အခုလက်ရှိ ကလေးငယ်တွေ အပါအဝင် ရာသီတုပ်ကွေးဖြစ်ပွါးသူ ၆၀ ဝန်းကျင်အထိရှိနေတယ်လို့ စစ်ရှောင်ကူညီရေးအဖွဲ့ Karenni Hope မှ ကိုလွှမ်းကပြောပါတယ်။
“အကူညီတောင်းလာတာတွေ ရှိတယ်၊ ကျွန်တော်ရောက်သွားတာက ညနေပိုင်းလည်းဖြစ်တော့ အေးတဲ့အကြောင်းပြောနေရင်း အေးလာတဲ့အတွက် စောင်တွေနဲ့ အနွေးထည်တွေရှိရင် သူတို့ကန့်ကို သတိရပေးပါဦး ဆိုပြီး ပြောလာတယ်ဗျ” လို့ စစ်ရှောင်တွေကို ကူပေးနေတဲ့ Karenni Hope က ကိုလွှမ်းက ပြောပါတယ်။
ဒီးမော့ဆို အနောက်ဘက်ခြမ်းမှာ စိန်ရောင်ခြည်စခန်း အပါအဝင် စစ်ရှောင်စခန်းပေါင်း ၁၄၀ ကျော်အထိရှိနေပြီး စစ်ရှောင်စခန်းတခုကို လူဦးရေ ၁၃၀ ကျော်၊ ၅၀၀ ကျော်မှ ၁၀၀၀ ကျော်နေထိုင်တဲ့ စစ်ရှောင်စခန်းတွေလည်း ရှိနေပါတယ်။
အလားတူ တခြားစစ်ရှောင်စခန်းတွေမှာလည်း အနွေးထည်လိုအပ်နေကြောင်း အကူညီတောင်းခံတာတွေ ရှိနေပြီး စစ်ရှောင်ပြည်သူတွေအနေနဲ့ စစ်ရှောင်ကာလ ကြာမြင့်လာတာနဲ့အမျှ အခက်အခဲတွေရှိနေတာဖြစ်ပါတယ်။ စစ်ဘေးရှောင်ပြည်သူတွေက စစ်ရှောင်ကာလ ၃ နှစ်ကျော်နေပြီး နေရပ်ပြန်နေထိုင်နိုင်သူ အနည်းငယ်ပဲရှိနေကာ စားနပ်ရိက္ခာ၊ အသုံးအဆောင်၊ ဆေးဝါး၊ အနွေးထည်နဲ့ စောင်တွေ လိုအပ်နေတယ်လို့ စစ်ဘေးရှောင်ပြည်သူတွေဆီက သိရပါတယ်။
CJ-004
#MekongNews
#စစ်ရှောင်စခန်း
#ဆေးဝါးနဲ့
#စောင်၊အနွေးထည်လိုအပ်
#စိန်ရောင်ခြည်
#ဒီမော့ဆိုးအနောက်
