မဲခေါင်၊ နိုဝင်ဘာ ၇
နိုဝင်ဘာ ၆ ရက်ကတည်းက တိုင်းနဲ့ပြည်နယ်မှာ မိုးဆက်တိုက်ရွာနေတာကြောင့် ရှမ်းတောင်မှာ နောက်ဆက်တွဲ အနေနဲ့ တောင်ပြိုမှု၊ မြေပြိုမှုနဲ့ ရေကြီးမှုတွေပါ ထပ်ဖြစ်နိုင်လို့ သတိထားဖို့လိုတယ်လို့ မိုးလေဝဿပညာရှင် ဦးဝင်းနိုင်ကသတိပေးထားပါတယ်။
ဘင်္ဂလားပင်လယ်အော်တောင်ပိုင်းမှာ ဖြစ်နေပေါ်တဲ့ လေပွေလှိုင်း၊ လေဖိအားနည်းရပ်ဝန်းအရှိန်ကြောင့် မိုးအဆက်မပြတ်ရွာသွန်းနေတာဖြစ်ပါတယ်။ ရွာသွန်းမိုးကြောင့် ရှမ်းပြည်တောင်ပိုင်း၊ မောက်မယ်မြို့မှာ ဒီနေ့ နိုဝင်ဘာ ၇ ရက် မနက်က ရေကြီးရေလျှံကာ လမ်းတချို့ရေတိုက်စား ပျက်စီးခဲ့ပါတယ်။
ရှမ်းပြည်နယ်တောင်ပိုင်း တောင်ကြီး၊ အင်းလေး၊ ဘန်းယဉ်၊ ကျိုင်းတောင်း၊ မောက်မယ် စတဲ့ဒေသတွေမှာ မိုးရေချိန် ၃ လက်မ အထက် ရွာသွန်းနိုင်ပြီး ရေကြီး မြေပြိုဖြစ်ခဲ့တဲ့ ဒေသတွေမှာ အခုလ နိုဝင်ဘာ ၆ ရက် ကနေ ၈ ရက်အထိ မိုးများနိုင်တာကြောင့် မြေပြို၊ တောင်ပြို၊ တောင်ကျရေရုတ်တရက်ကျဆင်းတဲ့ သဘာဝဘေးတွေ ထပ်မံဖြစ်လာနိုင်မှာကို သတိပြုသင့်တယ်လို့ ဆ်ိုပါတယ်။
ပြီးခဲ့တဲ့လက ရေဘေးဒဏ်သင့်ခဲ့တဲ့ ကရင်နီပြည်နယ်၊ လွိုင်ကော်မြို့ဝန်းကျင်မှာ မိုးရေချိန် ၃ဒဿမ၇၂ လက်မ နဲ့အထက် ရွာနိုင်တာကြောင့် ဒီ ၃ ရက်မှာ အထူးသတိထားသင့်တယ်လို့ သိရပါတယ်။
အင်းလေးဒေသမှာလည်း မနေ့ကစပြီး ရွာတဲ့မိုးကြောင့် ဒီမနက်မှာ ရေမျက်နှာပြင် သုံးလက်မလောက် ထပ်မံမြင့်တက်ခဲ့တယ်လို့ ဒေသခံတွေဆီက သိရပါတယ်။
အင်းလေးမှာ စက်တင်ဘာလအတွင်း ဖြစ်ပေါ်ခဲ့တဲ့ ရာဂီမုန်တိုင်းနောက်ဆက်တွဲ မိုးရွာသွန်းမှုကြောင့် စံချိန်တင်ရေတက်ခဲ့ပြီး ၄၄၅ရွာ ရှိတဲ့အနက် ၁၇၁ ရွာ တစ်လခန့်အိမ်ခြေအားလုံးနီးပါး ရေမြုပ်ခဲ့ပါသေးတယ်။
အဲ့ဒီ ရေမြုပ်မှုဖြစ်စဉ်ကြောင့် အိမ်ဟောင်းတချို့ဆွေးမြည့်ခဲ့ရပြီး ဒီ နိုဝင်ဘာလ ၂ ရက်နေ့ညက လေပြင်းတိုက်ခတ်စဉ် ရွာသာကျေးရွာအုပ်စု၊ ကံလှကျေးရွာနဲ့ ကုနုရွာတို့မှာ အိမ်ခြေ ၂၀ ခန့် ရေထဲပြိုကျ၊ အမိုးလန်ပျက်စီးပြီး အသက် ၁၃နှစ်အရွယ် ကလေးတစ်ဦး ထိခိုက်ဒဏ်ရာရတာတွေ ရှိခဲ့ပါတယ်။
ဒါ့အပြင် အဆိုးရွားဆုံး မြေပြိုမှုဖြစ်စဉ်အနေနဲ့ ကလောမြို့နယ်၊ လွန်းထိုးကျေးရွာအုပ်စုမှာ စာသင်ကျောင်းတစ်ကျောင်း အပါအဝင် အိမ်ခြေ ၂၀၀ ကျော် ရွာလုံးကျွတ်မြေမြုပ်ခဲ့ပြီး အခုချိန်ထိ ပြန်လည်ထူထောင်ရေး မလုပ်နိုင်သေးပါဘူး။ ဒေသခံ ၁၀၀ ခန့်သေဆုံးခဲ့ရပါတယ်။
အခုလေဖိအားနည်းဖြစ်စဉ်ကြောင့် ဘင်္ဂလားပင်လယ်အော်တောင်ပိုင်းက လေဖိအားနည်းရပ်ဝန်း ကြောင့်ဖြစ်ပြီး မိုးကြီးနေတဲ့ ဒေသတွေကတော့ ရှမ်းပြည်နယ်တောင်ပိုင်း၊ ကယားပြည်နယ်၊ ပဲခူးတိုင်းမြောက်ပိုင်းနဲ့ ဧရာဝတီတိုင်း စတဲ့ ဒေသကြီး လေးခုဖြစ်ပါတယ်။
အဲ့ဒီထဲကမှ ရှမ်းပြည်တောင်ပိုင်းဟာ စက်တင်ဘာလအတွင်း မိုးရွာသွန်းမှုကြောင့် မြေပြိုမှု၊ တောင်ကျရေကြောင့် မြေပြိုမှုတွေဖြစ်ခဲ့တာကြောင့် ထပ်ဖြစ်မယ့် အန္တရာယ်ကြုံတွေ့လာနိုင်လို့ အထူးသတိထားဖို့ လိုအပ်ပါတယ်။
ဓါတ်ပုံညွှန်း (၁) – အင်းလေး၊ ရွာသာကျေးရွာအတွင်း နိူဝင်ဘာ ၂ ရက်က လေပြင်းကြောင့် အိမ်များပျက်စီးခဲ့ပုံ။
ဓါတ်ပုံညွှန်း (၂) – တောင်ကျရေကြောင့် မြေပြိုကျပြီး ရွာလုံးကျွတ် မြေမြုပ်ခဲ့တဲ့ ကလောမြို့နယ်၊ လွန်းထိုးကျေးရွာ
ဓါတ်ပုံညွှန်း (၃) – နိုဝင်ဘာ ၇ ရက်နေ့မနက် မောက်မယ်မြို့
CJ001
