မဲခေါင်၊ နိုဝင်ဘာ ၄
စစ်ကောင်စီနဲ့ ပအိုဝ်းပြည်သူ့စစ် PNO က အင်အားသုံးစစ်ကြောင်းထိုးတာကြောင့် တိုက်ပွဲပြင်းထန်လို့ ပင်လောင်း-ဖယ်ခုံနယ်စပ်က ပြည်သူတွေ စစ်ဘေးရှောင်နေရချိန်မှာ ကျန်ခဲ့တဲ့ လယ်တွေထဲက စပါးတွေကို PNO က စက်တွေနဲ့ ရိတ်ခြွေယူနေတယ်လို့ ဒေသခံတွေထံက သိရပါတယ်။
ပင်လောင်းမြို့နယ် ဟိုဝိုးရှမ်းရွာ၊ ဗန်းမောက် ဆောင်လန်ဖက်တစ်ကြောက ပြည်သူတွေစိုက်ထားတဲ့ စပါးခင်းတွေကို ရိတ်ချွေစက်လေးစီးနဲ့ ရိတ်ခြွေယူပြီး ပင်လောင်းလမ်းအတိုင်း ကားတွေနဲ့တင် ဆောင်သယ်ယူသွားတယ်လို့ ဒေသခံလယ်သမားတွေထံက သိရပါတယ်။
“အဲစက်တစ်စီးက တစ်ရက်ကို ၁၀ ဧက အထိ ရိတ်နိုင်တယ်။ ဒီနေ့အထိ ၄ ရက်ရှိပြီ။ လယ်သမားတွေလာရင် သေနတ်နဲ့ပစ်၊ ဗုံးနဲ့ကြဲတော့ ဘယ်သူမှ မရိတ်ရဲဘူး။ ပူချယ်ရွာက လယ်တဲကို ဗုံးကြဲလို့ သေရတာတောင်ခုထိ အလောင်းမကောက်နိုင်သေးဘူး” လယ်သမားတစ်ဦးက ပြောပါတယ်။
ရိတ်ခြွေပြီး လယ်ထဲမှာကျန်ခဲ့တဲ့စပါးတွေကို ပြည်သူတွေပြန်လာသယ်ချိန် PNOက ဒရုန်းတွေနဲ့ ဗုံးကြဲတိုက်ခိုက်လို့ ရိတ်ချွေပြီး ဒီအတိုင်းထားခဲ့ရတာလည်း အတော်များတယ်လို့ ဒေသခံတွေက ဆိုပါတယ်။
ပင်လောင်းမြို့နယ်တောင်ဘက်က လွယ်ဝွန်၊ ဗန်းမောက်၊ ဟိုဝိုး၊ ဆောင်လန် ၊ ကသဲ၊ လွယ်ပသာ၊ ကုန်းပေါ၊ ကောင်ကြိန်း၊ ကန်တော်၊ နားမွန်း၊ ယာဆပ်ရွာ တစ်ကြောမှာရှိတဲ့ ရွာပေါင်း ၂၀ကျော်က ဒေသခံ ၁၂၀၀ ကျော်ဟာ ပြီးခဲ့တဲ့ စက်တင်ဘာလက စပြီး တိုက်ပွဲတွေဖြစ်လာရင် စစ်ရှောင်လိုက် ရပ်သွားရင် နေရပ်ပြန်လာလိုက် လုပ်နေရတယ်လို့ စစ်ဘေးရှောင်အရေး ကူညီနေသူတွေထံက သိရပါတယ်။
အဲဒီဒေသမှာ စပါးစိုက်ဧကထောင်နဲ့ချီရှိပြီး ၃ ပုံ ၁ ပုံလောက်ကိုသာ ပြည်သူတွေအနေနဲ့ ရိတ်သိမ်းနိုင်သေးတယ်လို့ စစ်ဘေးရှောင်ကူညီနေသူတွေက ပြောပါတယ်။
ရှမ်း-ကရင်နီနယ်စပ် တိုက်ပွဲပြင်းထန်တဲ့ ဒေသတွေမှာ စစ်ကောင်စီနဲ့ PNO ပူးပေါင်းတပ်ဖွဲ့ဝင်တွေက ဒေသခံတွေရဲ့ လယ်တွေ၊ ယာတွေထဲက သီးနှံတွေကို ခူးယူးပြီး ရောင်းစားတာတွေ ဆက်တိုက်ဖြစ်နေတယ်လို့ ညောင်ရွှေမြို့နယ်က ပအိုဝ်းလူငယ်တစ်ဦးကလည်း ပြောပါတယ်။
“ညောင်ရွှေ-ဖယ်ခုံ နယ်စပ်က ယာတွေထဲက ပြောင်းတွေကိုလည်း အဲဒီလိုပဲ PNO တွေက ခူးပြီးသယ်သွားတယ်။ ရွာသားတွေက စစ်ရှောင်နေချိန် မရှိတော့ သူတို့စိတ်ကြိုက်ပဲ” လို့ သူက ပြောပါတယ်။
ပြီးခဲ့တဲ့ နိုဝင်ဘာ ၁ ရက်မှာလည်း ပင်လောင်းမြို့နယ်ထဲက နမ့်ဖာမူအောက်ဖက်ရွာ၊ ဟိုဝိုးရွာ၊ ဆောင်လန်ရွာ၊ ဒေါပေါကလဲရွာတွေကို စစ်ကောင်စီနဲ့ PNO က မီးရှို့လို့ဒေသခံတွေ ထွက်ပြေးတိမ်းရှောင်နေရပြီး စပါးရိတ်ဖို့လာသူတွေကို သေနတ်နဲ့ပစ်၊ ဒရုန်းနဲ့တိုက်ခိုက်တာတွေ လုပ်လို့ စပါးမရိတ်နိုင်သေးဘူးလို့ ဒေသခံတွေထံက သိရပါတယ်။
ရှမ်း-ကရင်နီနယ်စပ်ဖြစ်တဲ့ ပင်လောင်း၊ ဖယ်ခုံ၊ ညောင်ရွှေ၊ ဆီဆိုင် စတဲ့မြို့နယ်တွေမှာ စစ်ကောင်စီနဲ့ PNO ပူးပေါင်းတပ်တွေဟာ စက်တင်ဘာလအစပိုင်းက စလို့ အင်အားသုံးထိုးစစ်ဆင်နေတာကြောင့် ဒေသခံကာကွယ်ရေးတပ်ဖွဲ့တွေနဲ့ တိုက်ပွဲပြင်းထန်နေပြီး ပြည်သူ တစ်သောင်းကျော်လည်း ဘေးလွတ်ရာကို ရှောင်ရှားနေရတာဖြစ်ပါတယ်။
MK – 012
