မဲခေါင်၊ နိုဝင်ဘာ ၄
ပြည်သူတွေကို ပစ်မှတ်ထား တိုက်ခိုက်နေတဲ့ စစ်ကောင်စီရဲ့ လေကြောင်းတိုက်ခိုက်မှုတွေကို အဓိကထောက်ပံ့ပေးနေတဲ့ တရုတ်ကုမ္ပဏီ AVIC နဲ့လမ်းခွဲပြီး စစ်ရာဇဝတ်မှုမှာ ရင်းနှီးမြှုပ်နှံနေတာကို ရပ်ဖို့ Airbus ကို တောင်းဆိုတဲ့ လှုပ်ရှားမှု ပြုလုပ်နေတယ်လို့ BMC (Blood Money Campaign -သွေးစွန်းငွေဖြတ်တောက်ရေး) အဖွဲ့ထံက သိရပါတယ်။
Airbus ဟာ ဥရောပရဲ့ အကြီးဆုံး လေကြောင်း ကုမ္ပဏီဖြစ်ပြီး ပြင်သစ်၊ ဂျာမနီ၊ စပိန် အစိုးရတွေရဲ့ ရှယ်ယာပါဝင်ထားတဲ့ ကုမ္ပဏီကြီးက တရုတ်အစိုးရပိုင် AVIC ( Aviation Industry Corporation of China ) လေကြောင်းနဲ့ ကာကွယ်ရေးပစ္စည်း ထုတ်လုပ်တဲ့ ကုမ္ပဏီနဲ့ တွဲဖက်လုပ်ကိုင်နေတာဖြစ်ပြီး တိုက်ခိုက်ရေးလေယာဉ်တွေအပါအဝင် လေကြောင်းလက်နက်တွေကိုပါ ထုတ်လုပ်ကာ မြန်မာစစ်တပ်ကို အကူအညီပေးနေတာဖြစ်လို့ ခုလို ကမ်ပိန်းပြုလုပ်ရတာ ဖြစ်တယ်လို့ BMC ပြင်ပဆက်ဆံရေးတာဝန်ခံက မဲခေါင်ကို ပြောပါတယ်။
BMC ရဲ့ မိတ်ဖက်အဖွဲ့ အင်းလေးဒေသတရားမျှတမှုဖော်ဆောင်ရေးအဖွဲ့ JMC-Innlayက ဒေါ်ယုလှိုင်သင်းက “စစ်တပ်ဟာ စစ်ဘေးရှောင်ပြည်သူတွေ၊ စာသင်ကျောင်းတွေ၊ ဘာသာရေးအဆောက်အဦးတွေကိုပါ အဓိက ပစ်မှတ်ထားပြီး တိုက်ခိုက်နေတယ်၊ ဒီလုပ်ရပ်တွေဟာ နိုင်ငံတကာ စစ်ရာဇဝတ်မှုမြောက်ပါတယ်၊ ဒါကြောင့် စစ်ကောင်စီတွေရဲ့ လေကြောင်းတိုက်ခိုက်မှုကို ကူညီပံ့ပိုးပေးနေတဲ့ ဘယ်အဖွဲ့မဆို ရပ်တန်းကရပ်ပေးပါ’လို့ ပြောပါတယ်။
စစ်အုပ်စုဟာ AVIC ဆီကနေ FTC-2000G Y-12, K-8 စတဲ့ လေယာဉ်တွေ၊ လေကြောင်းလက်နက်တွေနဲ့ နည်းပညာတွေကိုပါ ရရှိနေတဲ့အပြင် လေကြောင်းတိုက်ခိုက်မှု ပြုလုပ်ပြီးလို့ ပြန်လာတိုင်းလည်း လိုအပ်တဲ့ ပြုပြင်မှုတွေပါ AVICက ပံ့ပိုး လုပ်ဆောင်ပေးနေလို့ ခုလိုတောင်းဆိုတာ ဖြစ်ပါတယ်။
” AVIC အနေနဲ့ စစ်အုပ်စုကို အခုလို ပံ့ပိုးနေတာတွေ ရပ်ဖို့ဆိုရင် သူ့ရဲ့ နည်းပညာအရရော ရင်းနှီးမြုပ်နှံမူပါ မှီခိုနေရတဲ့ အရေးကြီးဆုံး ရှယ်ယာရှင် AIRBUS ကို ဖိအားပေး တောင်းဆိုမှရပါမယ်၊ Airbus အနေနဲ့ကလည်း သူ့ရဲ့ လုပ်ပိုင်ခွင့်ကို သုံးပြီး မြန်မာပြည်က စစ်အုပ်စုရဲ့ လေကြောင်းတိုက်ခိုက်မှု ရပ်တန့်အောင် ပြုလုပ်ပေးရပါမယ်၊ ဒါကြောင့် ကျနော်တို့ ပြည်သူတွေအနေနဲ့က Airbus ကို ဦးတည်တဲ့ ဖိအားပေး တောင်းဆိုမှုတွေ ၊ စစ်အုပ်စုဆီ တိုက်ခိုက်ရေး လေယာဉ်တွေ မရဖို့ ၊ မရောင်းချဖို့လှုပ်ရှားမှုတွေကို ပြုလုပ်နေတာပါ” လို့ BMC ပြင်ပဆက်ဆံရေးတာဝန်ခံက ပြောပါတယ်။
စစ်ကောင်စီ အာဏာသိမ်း သုံးနှစ်ကျော်ကာလအတွင်း စစ်တပ်ကလေကြောင်းတိုက်ခိုက်မှု ၃၅၄၆ကြိမ် ပြုလုပ်ခဲ့တယ်ဆိုတဲ့ ညဏ်လင်းသစ် သုတေသနအချက်အလက်တွေအပေါ်မှီငြမ်းပြီး BMC က ၂၀၂၄ ခုနှစ်၊ ဇူလိုင်၊ သြဂုတ်၊ စက်တင်ဘာ ၃လအတွင်း စစ်တပ်က လေကြောင်းတိုက်ခိုက်မှု အကြိမ်ရေကောက်ယူခဲ့ရာမှာ ၁၀၉၀ကြိမ် ရှိခဲ့တယ်လို့ ဆိုပါတယ်။
ပိုမိုများပြား မြင့်မားလာနေတဲ့ လေကြောင်း တိုက်ခိုက်မှုတွေရပ်တန့်ဖို့အတွက် တရုတ်အစိုးရရဲ့ AVIC က ဂရုစိုက်မှာ မဟုတ်လို့ Airbusကို ပစ်မှတ်ထား လှုပ်ရှားမှုပြုလုပ်ရတာလို့သိရပါတယ်။
BMC အဖွဲ့ဟာ IT လူငယ်တွေအများအပြားနဲ့ ၂၀၂၁ ဧပြီလမှာ စတင်ဖွဲ့စည်းခဲ့ပြီး စစ်ကောင်စီက ရရှိနေတဲ့ သွေးစွန်းငွေတွေဖြတ်တောက်ရေးတွေပြုလုပ်နေတာမှာ MOGE၊ Bank တွေက စစ်အုပ်စုကိုအထောက်အပံ့မပြုနိုင်ဖို့ တောင်းဆိုမှုတွေပြုလုပ်နေသလို အခု စစ်ကောင်စီရဲ့အသက်သွေး ကြောဖြစ်တဲ့ Airbus ကမ်ပိန်းကို ပြုလုပ်ရတာလို့သိရပါတယ်။
စစ်အုပ်စုရဲ့ အသက်သွေးကြော လေကြောင်းတိုက်ခိုက်မှုကို ရပ်တန့်နိုင်မယ့် Airbus to Airstrikes ကမ္ဘာလုံးဆိုင်ရာလှုပ်ရှားမှုမှာ မြန်မာနဲ့ကမ္ဘာ့လူထု ပူးပေါင်းပါဝင်ကြဖို့ နှိုးဆော်နေတယ်လို့သိရပါတယ်။
ဓါတ်ပုံ။ ဝောင်းဆိုမှုပြုလုပ်ပုံတချို့
MK – 012
#MeKongNews
