မဲခေါင်၊ အောက်တိုဘာ ၁၉
ရှမ်းမြောက် သွားလာတဲ့ကားတွေကို ၅ ရက်ဖွင့်ပေးမယ်လို့ သတင်းထွက်ခဲ့ပေမယ့် အောက်တိုဘာ ၁၈ ရက်မှာတော့ ပြင်ဦးလွင်ကားတွေမှအပ ဘယ်ကားကိုမှ ပေးမသွားတော့ဘူးလို့ သိရပါတယ်။
မနေ့ အောက်တိုဘာ ၁၈ ရက်၊ ညနေ ၃ နာရီအချိန်ခန့်ကစပြီး ပြင်ဦးလွင်အတက် ၁၆ မိုင်ဂိတ်မှာ အထူးတင်းကြပ်လာကာ နံပါတ်အနီတပ်ဆင်ထားတဲ့ ကားတွေကို လုံးဝတက်ခွင့်မရတော့ဘဲ ဝက်ဝံဂိတ်မှာတော့ မည်သည့် ကားမှသွားလာခွင့်မရတော့တဲ့အပြင် ဘန့်ဘွေးမှာ လမ်းကိုဘက်ဟိုးနဲ့ မြောင်းတူးကာ ပြန်ဖျက်ဆီးထားတဲ့အတွက် ကားတွေပိတ်မိနေတယ်လို့ ခရီးသွားကားတွေဆီက သိရပါတယ်။
“မင်းတို့သေမှာစိုးလို့ တားတာ၊ တပ်ကအသေဆော်တော့မှာမလို့ ထွက်ပြေးဖို့အချိန်ပေးတာ”လို့ ဝက်ဝံလုံခြုံရေးဂိတ်က ကားသမားတွေကို ပြောတယ်လို့သိရပါတယ်။
ဒေသသတင်းမှာတော့ TNLA နဲ့ ပူးပေါင်းတပ်တွေ၊ နောင်ချိုက တောင်ခမ်းအမြောက်တပ်မကို အပြင်းအထန်ထိုးစစ်ဆင်ဖို့ အင်အားအလုံးအရင်း စုဖွဲ့နေလို့ စစ်ရေးအထူးတင်းမာနေတယ်လို့ သိရပါတယ်။
သီပေါမြို့ကျခဲ့တဲ့ အောက်တိုဘာ ၁၃ ရက်နောက် ရက်ပိုင်း အတွင်း TNLA ပူး ပေါင်းတပ်တွေ တောင်ခမ်းဘက်ကို အင်အား အလုံးအရင်း ဖြည့်တင်းနေတာဟာ ပြင်ဦးလွင်ပါ စိုးရိမ်ရလို့ ခုလို အသွားအလာတင်းကြပ်လာတာလို့ ဒေသသတင်းရင်းမြစ်က ဆိုပါတယ်။
“သီပေါပြီးရင် တောင်ခမ်းအလှည့်ဆိုတာ သိနေတော့ စစ်ကောင်စီလည်း ရပ်စောက်ဘက်က ရသမျှအင်အားဖြည့်နေတာ ကားစီးရေမနည်းဘူး၊ ရွာတွေကတော့ လုံးဝပြေးကုန်ပြီ၊ တောင်ခမ်းပြီးရင်တော့ ပြင်ဦးလွင်ပဲ၊ ဆက်မယ်ဆိုရင် မန္တလေးနဲ့ ရှမ်းတောင်ရောက်မယ်”လို့ စစ်ရေးသတင်းရင်းမြစ်၁ဦးကမဲခေါင်သတင်းဌာနကို ပြောပါတယ်။
TNLA ပူးပေါင်းတပ်တွေ အင်အားဖြည့်တင်းနေတာကြောင့် တောင်ခမ်းဘက် နားရှိုး၊ မက်လွတ်၊ တောင်ရှည်ရွာတွေကို မနေ့က Y-12 နဲ့ ဗုံးပတ်ကြဲသွားလို့ တိုက်ပွဲ ဧရိယာမှာရှိတဲ့ ယာပြင်၊ အင်းဖို၊ နောင်တော တဲတိုက် စတဲ့ ရွာနေ ဒေသခံတွေ ဘေးလွတ်ရာ ပြောင်းရွှေ့ဖို့ TNLA က သတိပေးထားကြောင်း သတင်းရင်းမြစ်က ပြောပါတယ်။
အောက်တိုဘာလ ၁၇ ရက်နေ့ သီတင်းကျွတ်လပြည့်ည မနက်ပိုင်းမှာ စစ်ကောင်စီက ဂျက်လေယာဥ်နဲ့လာရောက်ဗုံးကြဲတိုက်ခိုက်ခဲ့လို့ သဖန်ကိုင်းရပ်ကွက်အတွင်း ကျရောက်ပေါက်ကွဲခဲ့သလို အောက်တိုဘာ ၁၈ ရက် ညသန်းခေါင် အချိန်တွေမှာ ဆက်တိုက်ဗုံးကြဲခဲ့လို့ နောင်ချိုရဲစခန်းဝန်း၊ တောင်ရပ်ကွက်နယ်မြေ၊ ၁ နဲ့ ၂ တွေမှာ ဗုံးတွေကျရောက်ပေါက်ကွဲခဲ့လို့ လူ၄ဦးဒဏ်ရာရခဲ့တယ်လို့TNLA က ထုတ်ပြန်ခဲ့ပါတယ်။
နောင်ချိုမြို့နယ်၊ တောင်ခမ်းဒေသတွင် စစ်ကောင်စီရဲ့ မစခ ၉၀၂ နဲ့ အမတ ၃၅၄ တို့ရှိနေပြီး အမတ ၂၀၆ နဲ့ အမတ ၄၀၆ တို့ကတော့ သိမ်းပိုက်ရရှိပြီးပြီလို့ ပြီးခဲ့တဲ့ သြဂုတ်လ ၂၆ရက်မှာTNLA က ထုတ်ပြန်ထားပါတယ်။
တောင်ခမ်းဟာ စစ်ရေးအရ အချက်အခြာကျတာဖြစ်လို့ အဆိုပါတိုက်ပွဲဟာ ပြင်းထန်တဲ့ အဆုံးအဖြတ်တိုက်ပွဲဖြစ်လိမ့်မယ်လို့ စစ်ရေးလေ့လာသူတွေက သုံးသပ်ထားတာသိရပါတယ်။
MK-012
