မဲခေါင်၊ အောက်တိုဘာ ၄
ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်၊ မိုးဗြဲမြို့မှာ ရေဘေးကြောင့် ပျက်စီးခဲ့ရတဲ့ စာသင်ကျောင်းတွေ ပြန်ဆောက်ဖို့ လိုအပ်နေတယ်လို့ စစ်ဘေးရှောင်အရေး လှုပ်ရှားဆောင်ရွက်နေသူတွေက ပြောပါတယ်။
မိုးဗြဲမြို့အနီး၊ ဝါရီဆူးပလိုင်ကျေးရွာရှိ လက်ပံကွင်း စစ်ရှောင်စခန်းမှာ ဖွင့်လှစ်ထားတဲ့ ကိုယ်ထူကိုယ်ထ စာသင်ကျောင်း ၇ ကျောင်းမှာ ၃ ကျောင်းက စက်တင်ဘာလ ၁၁ ရက်နေ့စတင်တဲ့ ရေကြီးရေလျှံမှုတွေကြောင့် ပျက်စီးခဲ့ပြီး ပြန်လည် ဆောက်လုပ်ဖို့ လိုအပ်နေတာပါ။
“၃ ကျောင်း ပါသွားတယ်ပေါ့နော်။ အဲဒီထဲမှာက လောလောဆယ် ပြန်ဆောက်ဖို့ လိုနေတာတော့ တစ်ကျောင်းပေါ့။ အဲတစ်ကျောင်းကို အရင်ဆောက်လို့ ရရင်တော့ ပေါင်းပြီးသင်လို့ရတယ်ပေါ့။ အခုတော့ အဆင်ပြေသလိုပဲပေါ့” လို့ စစ်ဘေးရှောင်အရေး ကူညီဆောင်ရွက်ပေးနေသူ တစ်ဦးက ပြောပါတယ်။
လက်ရှိ စစ်ဘေးရှောင်ကျောင်းသားတွေဟာ မိုးမလုံတလုံ အဆောက်အဦးတွေမှာ သင်ကြားနေရပြီး ကျောင်းပြန်လည် ဆောက်လုပ်ဖို့အတွက် မိုးကာ၊ ဝါးလုံး၊ သစ်တွေ အပါအဝင် စားနပ်ရိက္ခာတွေလည်း လိုအပ်နေတယ်လို့ ဆိုပါတယ်။
ကျောင်းဆောက်လုပ်ဖို့အတွက် ကာလပေါက်ဈေးအရ ပျမ်းမျှ ၂၅ သိန်းကျပ်အထိရှိနိုင်ပြီး ပိုမိုခိုင်ခန့်အောင် သစ်၊ သွပ်တွေနဲ့ ဆောက်လုပ်မယ်ဆိုရင်တော့ သိန်း ၆၀ အထိ ကုန်ကျနိုင်တယ်လို့ သိရပါတယ်။
“အစက ပြန်စရမယ်ဆိုတော့ အကုန်လိုတာပေါ့နော်။ တူတစ်ချောင်းကအစ လိုတယ်။ စားစရာဆိုလည်း လိုတာပဲ။ ကလေးတွေဆို တောထဲက မှိုတွေ၊ မျှစ်တွေချိုးလာပြီး လာချက်စားကြတာပေါ့နော်” လို့ စစ်ဘေးရှောင်အရေး ကူညီဆောင်ရွက်ပေးနေသူ တစ်ဦးက ဆက်ပြောပါတယ်။
ကယန်းပညာရေးဘုတ်အဖွဲ့ (KNEC)က ဖွင့်လှစ်ထားတဲ့ လက်ပံကွင်း စာသင်ကျောင်းမှာ CDM နဲ့ လုပ်အားပေး (Volunteer) ဆရာမ ၅ ဦး၊ ကျောင်းသား ၇၀ ကျော် ရှိပြီး KG ကနေ Grade 4 အထိ သင်ကြားပေးနေတယ်လို့ သိရပါတယ်။
ကရင်နီပြည်မှာ ရေဘေးကြုံတွေ့နေရပေမယ့် စစ်ကောင်စီက ရိက္ခာသယ်ဆောင်ခွင့် ပိတ်ပင်ထားတာကြောင့် စစ်ဘေးရှောင်တွေအတွက် လိုအပ်တဲ့ရိက္ခာကို ကရင်ပြည်နယ်စပ်နဲ့ ထိုင်းနယ်စပ်တွေကနေ သယ်ယူနေရပြီး လိုသလောက် မရနိုင်တဲ့ အခက်အခဲတွေ ရှိတယ်လို့ စစ်ဘေးရှောင်အရေး ကူညီဆောင်ရွက်ပေးနေသူတွေက ပြောပါတယ်။
ဒီနေ့ နေ့လည်ပိုင်း အခြေအနေအရ လွိုင်ကော်မြို့တွင်းနဲ့ ဒီးမော့ဆို၊ ဖယ်ခုံမြို့နယ်တို့က ဘီလူးချောင်းဘေးတစ်လျှာက် ကျေးရွာတွေမှာ ရေ ၂ ပေခန့်ကျလာပြီး ရေအားလုံးကျဖို့ အနည်းဆုံး ၂ လခန့် ကြာနိုင်တယ်လို့ မြို့ခံတွေက သုံးသပ်ပါတယ်။
MK-014
