မဲခေါင်၊ အောက်တိုဘာ ၂
UWSA “ဝ” ပြည်သွေးစည်းညီညွှတ်ရေးတပ်မတော် ထိန်းချုပ်ထားတဲ့ ဟိုပန်မြို့မှာ “ဝ” ပြည်သူ့အစိုးရက သတ်မှတ်ထားတဲ့ အခွန်နှုန်းတွေ မြင့်မားနေတာကြောင့် အခက်အခဲကြုံနေရတယ်လို့ မြို့နေ ဒေသခံများကပြောပါတယ်။
“ဝ” ပြည်သူ့အစိုးရက အခွန်နှုန်းကို ဈေးဆိုင်အမျိုးအစား နဲ့လုပ်ငန်းအမျိုးအစားပေါ်မူတည်ပြီး ကောက်ခံတယ်လို့ ဒေသခံ အမျိုးသမီးတစ်ဦးက ဆိုပါတယ်။
“ဒီမှာက အခွန်ခက အမျိုးမျိုးရှိတယ်။ ကျွန်မတို့ငှားထားတဲ့ အိမ်ဆိုရင် လစဉ်လတိုင်း မြေငှါးတဲ့ အိမ်ငှါးတဲ့ အိမ်အခွန်ခ တစ်လကို တရုတ်ငွေနဲ့ ယွမ် ၅၀ ပေးရတယ်။ ဒါကအိမ်ငှါးတဲ့ အိမ်ခန်းခမဟုတ်ဘူး။ အိမ်ငှါးတာလည်း အိမ်အကြီးအသေးပေါ်မူတည်ပြီး အခွန်ကောက်နှုန်းကမတူဘူး။ ဆိုင်တွေဆိုလည်းအဲ့အတိုင်းပဲသူ့အစားစားနဲ့သူရှိတယ်။ ဟိုတယ်တွေဆိုလည်း ဟိုတယ်အမျိုးအစားပေါ်မူတည်ပြီးတော့ လှရင်လှသလို ကြီးရင်ကြီးသလို အနည်းဆုံးတော့ တစ်လကို တရုတ်ငွေ ၃သောင်း (မြန်မာငွေသိန်း၂၁၀ကျပ်) ကနေ ၅ သောင်း(မြန်မာငွေသိန်း ၃၅၀ ကျပ်)၊၆ သောင်း (မြန်မာငွေသိန်း ၄၂၀ကျပ်)တောင်းတယ်၊ ဖဲရုံလည်း တစ်လဆို (ယွမ်)၄သိန်း(မြန်မာငွေသိန်း ၂၈၀၀ကျပ်)တောင်းတယ်လို့ပြောတယ်” လို့ သူက ပြောပါတယ်။
အခုလို အခွန်နှုန်းမြင့်မားစွာကောက်နေတာကြောင့် တစ်ချို့လုပ်ငန်းရှင်များက ၎င်း တို့ရဲ့ ဟိုတယ်တွေ၊ ဖဲရုံတွေ ၊ KTV တွေ ၊ ဆိုင်တွေတချို့ ပြန်ထုတ်ရောင်းတာမျိုးနဲ့ ပိတ်လိုက်ရတာမျိုးရှိတယ်လို့ သိရပါတယ်။
ဒါ့အပြင် အခွန်ကို တရုတ်ငွေနဲ့ ပေးဆောင်ရတာ ဖြစ်တာကြောင့် မြန်မာငွေဖြင့် ရောင်းရတဲ့ တစ်ရက်ရောင်းတစ်ရက်စားရတဲ့ ဆိုင်ရှင်များနဲ့ မြန်မာငွေ လခစား သူများအတွက် အခက်အခဲကြုံတွေ့နေရတယ်လို့ နောက်ထပ်ဒေသခံ အမျိုးသမီး တစ်ဦးကပြောပါတယ်။
“ အခက်အခဲဆို ပြောမနေနဲ့တော့ ကြိုက်တဲ့နေရာမှာသွားကြည့်လိုက် သွားမေးလိုက် သူများတွေ အရမ်းစိတ်ဆိုးကြတယ်။ အရမ်းလည်းအံ့ဩကြတယ်။ ပြည်သူလူထုဘက်ကိုမငဲ့ညှာဘူး။ အိမ်ကအမေစျေးရောင်းတယ် ခေါက်ဆွဲဆိုင်သေးသေးလေးဖွင့်တာ။ သူတို့လာရင်ကျွန်မက တရုတ်ငွေမရှိဘူး ကျွန်မတို့က မြန်မာငွေနဲ့ပဲရောင်းရတာအဲ့လိုပြောတာကို သူတို့က အေနင်တို့ငါတို့သတ်မှတ်ထားတဲ့စည်းအတိုင်းမနေဘူးမလုပ်ဘူးဆိုရင် အရေးယူမယ်ဘာညာပြောတာ”လို့ သူက ပြောပြပါတယ်။
ဟိုပန်မြို့မှာ သာမန် လက်လုပ်လက်စား လူထုအတွက်အနိမ့်ဆုံးလစာက မြန်မာငွေ ၂ သိန်းကျပ်မှ ၅ သိန်းကျပ် အကြားရှိပြီး အနှိပ်ခန်း၊ ဖဲရုံ၊ လောင်းကစားဝိုင်းနဲ့ Bar ဆိုင်ဝန်ထမ်းများကတော့ တရုတ်ငွေ ယွမ် ၅၀၀( မြန်မာငွေ ၄ သိန်းကျပ်) မှ ယွမ် ၃၅၀၀(မြန်မာငွေ ၂၅သိန်းဝန်းကျင်) အထိ အသီးသီးရှိကြပါတယ်။
ယခင်က စစ်ကောင်စီ အုပ်ချုပ်တဲ့အချိန်မှာတော့ ဒေသခံများအနေနဲ့ စည်ပင်ခ (အမှိုက်ခွန်) သာတစ်လ ၆ ထောင်ကျပ် လတိုင်းပုံမှန်ပေးဆောင်ရတာဖြစ်ပြီး ဈေးဆိုင် များအနေနဲ့လည်း အခွန်နှုန်းအတိအကျပုံမှန် သတ်မှတ်ထားတာမျိုးမရှိဘဲ ရောင်းရရင်ရောင်းရသလို မြန်မာငွေဖြစ် အခွန်ဆောင်ရတာဖြစ်ကြောင်း ဒေသခံများထံမှ သိရပါတယ်။
UWSA “ဝ” အမျိုးသားသွေးစည်းညီညွှတ်ရေးတပ်မတော် အုပ်ချုပ်တဲ့အချိန်မှာတော့ ဒေသခံများ စည်ပင်ခ တစ်လကိုတရုတ်ငွေ ၁၀ ယွမ် ပေးဆောင်ရတဲ့အပြင် ဈေးဆိုင်များလည်း အကြီးအသေးပေါ်မူတည်ပြီး တရုတ်ငွေ ယွမ် ၃၀၀၊ ၁၅၀၊ ၅၀၀၊ ၁၀၀၀ ထိပေးဆောင်ရတာမျိုး ဖြစ်ပါတယ်။
ဟိုတယ်များလည်း အကြီးအသေးနဲ့ အမျိုးအစားပေါ်မူတည်ပြီး တစ်လကို ယွမ် ၃ သောင်း မှ ယွမ် ၆ သောင်း ထိအခွန်ေဆာင်ရတဲ့အပြင် ဝန်ထမ်းတစ်ေယာက်ချင်းစီအတွက် ဝန်ထမ်းခွန် တစ်ယောက်ကို တရုတ်ငွေ ယွမ် ၅၀၀ ပေးဆောင်ရတာဖြစ်ပါတယ်။
အလားတူ ဖဲရုံများလည်းတစ်လကို ယွမ် ၄ သိန်း အခွန်ဆောင်ရတဲ့အပြင် ဝန်ထမ်းတစ်ယောက်ချင်းစီအတွက် ဝန်ထမ်းခွန် တစ်ယောက်ကို တစ်လကို ယွမ် ၅၀၀ ပေးဆောင်ရတာဖြစ်ကြောင်း ဒေသခံများထံမှသိရပါတယ်။
MK-016
