မဲခေါင်၊ စက်တင်ဘာ ၂၀ ရက်
မန္တလေးတိုင်းဒေသကြီး၊ သာစည်မြို့နယ်၊ ကလောနဲ့ သာစည်မြို့နယ်ကြားက ရေဘေးသင့် လယ်ပြင်ကျေးရွာအုပ်စုမှာ အကူအညီတွေလိုအပ်နေကြတယ်လို့ ရေဘေး ပြန်လည်ထူရေး ကူညီဆောင်ရွက်ပေးနေသူတွေက ပြောပါတယ်။
ကလောမြို့ပေါ်မှာ ကူညီဆောင်ရွက်ပေးတဲ့ အဖွဲ့အစည်းတွေနဲ့ အလှူရှင်တွေ ပေါများပေမယ့် လယ်ပြင်ကျေးရွာအုပ်စုမှာတော့ လွန်ထိုးကျေးရွာအပါအဝင် ကျေးရွာအများစုမှာ အကူအညီမရသေးတာပဲ ဖြစ်ပါတယ်။
“ကျနော်တို့ ထိပ်ဆုံးသွားတာပါ။ ဘယ်အဖွဲ့မှကို မရောက်သေးပါဘူး။ လမ်းတွေက ချင်းပြည်လမ်း အတိုင်းပါပဲ။ မဲနယ်တောင်ထက် ဆိုးပါတယ်။ မောင်းရဲဖို့ လိုပါတယ်။ ဟိုရောက်ရင် လူမှဟုတ်ကြရဲ့လားလို့ အံ့ဩရပါမယ်။ တော်တော်လေး ခက်ခဲဆင်းရဲနေကြတာပါ” လို့ အလှူရှင် တစ်ဦးက ပြောပါတယ်။
ကလောမြို့၊ View Point လမ်းအတိုင်း သွားရတဲ့ တောင်ပေါ်က လွန်ထိုးရွာဟာ တစ်ရွာလုံး ရေအောက်ရောက်ရှိနေပြီး တောင်တက်တဲ့ လမ်းတစ်လျှောက်မှာလည်း ရွှံ့နွံတွေ ထူထပ်နေတာကြောင့် ကားအမြင့် ၄ ဘီးယက် ကားတွေနဲ့သာ သွားနိုင်မယ်လို့ ဆိုပါတယ်။
ရွာအဝင် လမ်းတစ်လျှောက်မှာ ဝပ်ရှောပ့်တွေနဲ့ စားသောက်ဆိုင် မရှိတာကြောင့် အလှူရှင်တွေ အနေနဲ့ ကားဘီးအပို၊ စားနပ်ရိက္ခာတွေ အစုံအလင် ယူဆောင်သွားသင့်တယ်လို့ ထိပ်ဆုံးရောက် အလှူရှင်တွေက အကြံပြုပါတယ်။
လတ်တလောမှာ စားနပ်ရိက္ခာ၊ မီးသွေးခဲ၊ စောင်၊ အဝတ်အထည်နဲ့ ဆေးပစ္စည်းတွေ လိုအပ်နေပြီး ဝမ်းပျက်၊ ဝမ်းလျှောဖြစ်စေမယ့် ဝမ်းနူးစာတွေကိုတော့ မလှူဒါန်းစေချင်ဘူးလို့ ရွာခံတွေဆီက သိရပါတယ်။
“အလျှံပါယ် ဖြစ်နေတဲ့ နေရာတွေ လှူမယ့်အစား ဘယ်သူမှ မရောက်တဲ့ ရွာတွေကို လှူစေချင်ပါတယ်။ ထမင်းမစားရတာချင်း တူတူဆိုရင်တောင် အဲဒီရွာက ပိုငတ်ပါတယ်။ အလှူရှင် မလာခင်ကဆို ထမင်းမစားရတာ ၄ ရက်ရှိပြီတဲ့” လို့ အလှူရှင် နောက်တစ်ဦးက ပြောပါတယ်။
လွန်ထိုးရွာမှာ ဖုန်းနဲ့ အင်တာနက်လည်း ပြတ်တောက်နေသလို ရေအနည်းငယ် ကျဆင်းသွားတာကြောင့် ရွှံနွံတွေထူထပ်နေပြီး တစ်အိမ်နဲ့ တစ်အိမ် သွားလာဖို့တောင် ခက်ခဲနေတယ်လို့ သိရပါတယ်။
ရှမ်းပြည်တောင်ပိုင်းမှာ ရေဘေးအနေနဲ့ ရွာပေါင်း ၁၇၁ ရွာ နစ်မြုပ်သွားပြီဖြစ်တဲ့ အင်းလေးဒေသဟာ စိုးရိမ်နေရပြိး ဒီနေ့မနက်ပိုင်း တောင်ကြီးမှာလည်း မိုးသည်းထန်စွာ ရွာသွန်းမှု ပြန်လည် ဖြစ်ပေါ်နေပါတယ်။
မြန်မာနိုင်ငံအနှံ့အပြားမှာ ရေကြီးရေလျှံ ဖြစ်ပေါ်နေပြီး ရာဂီ မုန်တိုင်း အဖျားခတ်မှုကြောင့် စက်တင်ဘာ ၁၉ ရက်အထိ မိုးများနိုင်တယ်လို့ မိုးလေဝသ ခန့်မှန်းချက်က သတိပေးထားပါတယ်။
MK-014
