မဲခေါင်၊ စက်တင်ဘာ ၂
စက်တင်ဘာ ၁ ရက်နေ့ မနက်ပိုင်းက ထိုင်းနိုင်ငံ တာ့ခ်ခရိုင်၊ မဲဆောက်မြို့ရဲ့ မယ့်ကစာရွာမှာ ရွှေကုက္ကိုလ် လောင်းကစားနဲ့ ကျားဖြန့်မြို့သစ်ဆီ ဖိုက်ဘာကေဘယ်ကြိုး ခိုးသွယ်ဖို့ လုပ်ဆောင်နေသူ ထိုင်းနိုင်ငံသားတစ်ဦးကို ထိုင်း ဆိုက်ဘာရဲတပ်ဖွဲ့က လက်ပူးလက်ကြပ် ဖမ်းဆီးရမိခဲ့ပါတယ်။
အရင်က ရွှေကုက္ကိုလ်အပါအဝင် သောင်ရင်းမြစ်တစ်ဖက်ကမ်းတစ်လျှောက် မြ၀တီဘက်က ကာစီနို၊ လောင်းကစားရုံနဲ့ ကျားဖြန့်လုပ်ငန်းတွေကို ထိုင်းဘက်က လျှပ်စစ်မီးနဲ့ အင်တာနက်တွေ ပေးနေခဲ့တာဖြစ်ပေမယ့် တရုတ်အစိုးရနဲ့ နိုင်ငံတကာရဲ့ ဖိအားပေးမှုကြောင့် ပြီးခဲ့တဲ့ လပိုင်းကပဲ မြ၀တီဘက်ကို ထိုင်းဘက်က ပေးထားတဲ့ အင်တာနက်ကေဘယ်တွေနဲ့ လျှပ်စစ်မီးတွေကို ဖြတ်တောက်ခဲ့ပါတယ်။
ဒါကြောင့် မြ၀တီဘက်ခြမ်းက ကျားဖြန့်လုပ်ငန်းတွေဟာ ထိုင်းနိုင်ငံကိုဖြတ်ကျော်ပြီး စတားလင့်ခ်အင်တာနက် စက်တွေကို မှောင်ခိုတင်သွင်းရာမှာ ထိုင်းဘက်က စတားလင့်တစ်ဆင်စာ ဘတ် ၅၀၀၀၀ စျေးဆိုရင် မြ၀တီ ကျားဖြန့်ရုံတွေအရောက် ဘတ် ၁၀၀၀၀၀ ကျော် စျေးရကြောင်း မဲဆောက် အာဏာပိုင်တွေက စတားလင့် စက်တွေ ဖမ်းဆီးအပြီး ဖွင့်ပြောခဲ့ဖူးပါတယ်။
အခု အသက် ၃၀ အရွယ် ဂျွန်ဂရက်လီလေဟာ သောင်ရင်းမြစ်ကနေ အင်တာနက်ကေဘယ်ကြိုးကို ဖြတ်ဆွဲ ပြီး ရွှေကုက္ကိုလ်ကို အင်တာနက်ပေးဖို့ ကြိုးစားနေတုန်း ဖမ်းဆီးခံရတာဖြစ်တဲ့အတွက် ထိုင်းရဲတပ်ဖွဲ့က အရေးယူဖို့ အတွက် ဖမ်းဆီးသွားခဲ့တာဖြစ်ကြောင်း မဲဆောက်သတင်းရင်းမြစ်တစ်ခုက သိရှိရပါတယ်။
Ref: ข่าว สวท.แม่สอด
MKF-001
