မဲခေါင်၊ ဩဂုတ် ၂၉
ရှမ်းပြည်မြောက်ပိုင်း၊ လားရှိုးမြို့မှာ အခြေအနေ တည်ငြိမ်စပြုလာတဲ့အတွက် ဩဂုတ်လ နောက်ဆုံးပတ်အတွင်း နေရပ်ပြန်နေထိုင်ကြသူတွေ တဖြည်းဖြည်း များလာပြီလို့ မြို့ခံတွေက ပြောပါတယ်။
ဒီနေ့မနက်ပိုင်းကစလို့ လားရှိုးမြို့ရှိ မြို့မဈေး အပြင်ဘက် ဆိုင်ခန်းတွေ ဖွင့်လှစ်ထားပြီး လူစည်ကားလာတဲ့ နောက်ပိုင်းမှာ လမ်းပိတ်ဆို့မှု မဖြစ်စေရေးအတွက် မန်ဆူဘုရားဈေးကိုလည်း မန်ဆူပလာဇာရှေ့ကို ပြောင်းရွှေ့ ဖွင့်လှစ်ထားပါတယ်။
“ပြန်လို့မရသေးဘူး။ ဗမာပေးမဝင်ဘူး ဆိုတာတွေက ကောလဟာလတွေပါ။ ကျမတို့လည်း ဗမာပါ။ အေးအေးဆေးဆေးပါပဲ။ သူခိုးတွေတော့ ရှိနေတုန်းပဲ။ သူတို့ ခိုးလို့ မဝသေးလို့ သတင်းမှား လွှင့်တာလည်း ဖြစ်နိုင်ပါတယ်” လို့ ၁၀၂၇ စစ်ဆင်ရေး ဒုတိယပိုင်းအတွင်း လားရှိုးမြို့မှာ ကျန်ရှိနေသူ တစ်ဦးက ပြောပါတယ်။
လားရှိုးမြို့မှာ ဖုန်းလိုင်းတွေ မရသေးပေမယ့် မိုင်တဲလ်ဝိုင်ဖိုင်တွေကို ဩဂုတ်လ ၂၆ ရက်နေ့ကတည်းက အသုံးပြုနိုင်ပြီး “ဝ”ဆက်ဆံရေးရုံး၊ GGI ကုမ္မဏီ၊ အောင်အထူးကုဆေးရုံနဲ့ မန်ဆူဘုရားကျောင်းရှေ့တို့မှာလည်း ဘယ်သူမဆို Starlink အင်တာနက် သွားရောက်အသုံးပြုနိုင်တယ်လို့ ဆိုပါတယ်။
ဒါ့အပြင် ကိုးကန့်တပ်မတော် (MNDAA)ရဲ့ ဦးဆောင်မှုနဲ့ လာမယ့်လတွေမှာ လျှပ်စစ်မီးစတင် ပေးတော့မှာဖြစ်ပြီး တစ်ယူနစ်ကို ၃ ထောင်ကျပ် ကျသင့်မယ်လို့ မြို့ခံတစ်ဦးက ပြောပါတယ်။
ကုန်ဈေးနှုန်း မတန်တဆတက်နေတာကြောင့် မပြေလည်တဲ့ မိသားစုဝင်တွေကို FYV အဖွဲ့က ရိက္ခာတွေ ဝေမျှပေးနေသလို MNDAA ကလည်း တတ်နိုင်သလောက် ထောက်ပံ့ပေးနေတာတွေ ရှိတယ်လို့ သိရပါတယ်။
လားရှိုးမြို့ကနေ နေရာအနှံ့အပြားမှာ စစ်ဘေးရှောင်နေကြသူတွေလည်း လက်နက်ကြီးနဲ့ လေကြောင်း အန္တရာယ်စောင့်ကြည့်နေပြီး လာမယ့် စက်တင်ဘာလအတွင်း မြို့အခြေနေ တည်ငြိမ်နေသေးရင်တော့ နေရပ်ပြန်လာကြဖို့ စီစဉ်နေတယ်လို့ ဆိုပါတယ်။
MK-014
