မဲခေါင်၊ ဩဂုတ် ၂၇
ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ဗန်းမက်ကျေးရွာ အခြေစိုက် ပအိုဝ်းအမျိုးသား လွတ်မြောက်ရေးတပ်မတော် (PNLA)က မနက်ဖြန် ဩဂုတ် ၂၈ ရက်နေ့မှာ ရှမ်းပြည်တောင်ပိုင်းက မြို့နယ်တွေကို တစ်ပြိုင်နက် ဝင်ရောက်တိုက်ခိုက်သွားမယ်လို့ သတင်းမှားတွေ ထွက်ပေါ်နေပါတယ်။
စစ်ကောင်စီနဲ့ ပအိုဝ်းပြည်သူ့စစ်(PNA)ထောက်ခံသူတွေက ဩဂုတ်လ ၂၄ ရက်နေ့ကတည်းကနေ ဒီနေ့အထိ ဖြန့်ဝေနေတာဖြစ်ပြီး PNLA ဖက်က ၂၃ ရက်နေ့ အစည်းအဝေးမှာ ဆုံးဖြတ်ခဲ့တယ်လို့ ဖော်ပြထားတာပါ။
“သတင်းအမှားပါ အစည်းအဝေး အဲ့လိုအတည်ပြုချက် မရှိပါ။ သတင်းအမှားသာဖြစ်ပါတယ်။ သတင်းမှားတွေ ပတ်သက်ပြီး ဂရုစိုက်ကြဖို့ မှာကြားလိုပါတယ်” လို့ PNLA စစ်ဖက်ဆိုင်ရာ ပြောရေးဆိုခွင့်ရှိသူ ခွန်ရိန်းယံက ဖြေကြားပါတယ်။
စစ်ကောင်စီ ထောက်ခံတဲ့ အုပ်စုက ဖြန့်ဝေတဲ့ သတင်းမှားထဲမှာ PNLA က ရှမ်းပြည်တောင်ပိုင်းရှိ ဆီဆိုင်၊ ဟိုပုံး၊ ရပ်စောက် စတဲ့မြို့နယ်တွေကို တစ်ပြိုင်နက်ဝင်ရောက်တိုက်ခိုက်မယ်ဆိုတာ အတည်ပြုပြီး ဖြစ်တယ်လို့ ဆိုထားပါတယ်။
“ကျနော်တို့ဘက်က ထုတ်ပြန်တာ မရှိပါဘူး။ ထုတ်ပြန်ချက် အတုလုပ်ပြီး ပြည်သူလူထုနဲ့ ကျနော်တို့ကြားကို သွေးခွဲနေတာ ဖြစ်ပါတယ်။ အတုအယောင်တွေကို သတိပြုကြဖို့ ပြောချင်ပါတယ်။ PNLA သတင်းတွေကို ကျနော်တို့ရဲ့ ကိုယ်ပိုင် စာမျက်နှာမှာပဲ ဖော်ပြပါတယ်” လို့ ခွန်ရိန်းယံက သတိပေးပါတယ်။
PNLA နဲ့ ပတ်သက်တာတွေကို PNLA News & Department နဲ့ PNLO info ၂ ခုမှာသာ ထုတ်ပြန်ပြီး PNLA တပ်ဖွဲ့ဝင်တွေရဲ့ ကိုယ်ပိုင်အကောင့်မှာတောင် တင်လေ့မရှိဘူးလို့ ဆိုပါတယ်။
စစ်ကောင်စီနဲ့ ပအိုဝ်းပြည်သူ့စစ်(PNA)ထောက်ခံသူတွေဟာ မတ်လ ၁၃ ရက်နေ့ကလည်း ဆီဆိုင်နဲ့ ဟိုပုံးမြို့နယ်တွေက နေအိမ်တွေကို စစ်ရေးဗျူဟာအရ မီးရှို့သွားမယ်လို့ သတင်းမှား ဖြန့်ဝေခဲ့ဖူးပါတယ်။
MK-014
