မဲခေါင်၊ သြဂုတ် ၂၂
ထိုင်းဝန်ကြီးချုပ်သစ်အဖြစ် သက်ဆင်ရဲ့ သမီး ပေထောင်တန်ကို ခန့်အပ်တဲ့ သြဂုတ် ၁၆ ရက်ပွဲအပြီး ထိုင်းကာကွယ်ရေးဦးစီးချုပ်ဟောင်း ပရာဝစ်ဟာ ခန်းမထဲကအထွက် ThaiPBS မီဒီယာသတင်းထောက်မလေးတစ်ယောက်ကို ဖြတ်ရိုက်ခဲ့တဲ့ကိစ္စအတွက် ထိုင်းလွှတ်တော်က စုံစမ်းစစ်ဆေးသွားမယ်လို့ ထုတ်ပြန်ခဲ့ပါတယ်။
ရုပ်သံမှတ်တမ်းတွေမှာ သတင်းထောက်မလေးက ပေထောင်တန်ကို ဝန်ကြီးချုပ်သစ်ခန့်အပ်မှုအပေါ် ဘယ်လို မြင်သလဲလို့ မေးခွန်းမေးတာကို ပရာဝစ်က ဒေါသထွက်နေတဲ့ပုံနဲ့ သတင်းထောက်ခေါင်းကို ဆက်ကာဆက်ကာ ရိုက်နေလို့ ဘေးက ဘော်ဒီဂတ်တွေက ဆွဲခေါ်ပြီး ကားထဲ အတင်းတွန်းထည့် ခဲ့ရပါတယ်။
ပရာဝတ်ဟာ ပေထောင်တန်ရဲ့အဒေါ် ယင်းလတ် ဝန်ကြီးချုပ်ဖြစ်စဉ်က စစ်အာဏာသိမ်းပြီး ရာထူးက ဖယ်ရှား မှုမှာ အဓိက ဦးဆောင်သူဖြစ်သလို အဲဒီအာဏာသိမ်းပြီးကတည်းက ဒုတိယဝန်ကြီးချုပ်တာဝန်ကို ၂၀၂၃ အထိ ရယူပြီး လက်ရှိမှာတော့ အငြိမ်းစားနိုင်ငံရေးသမားအဖြစ် ဆက်လက်ရပ်တည်နေသူဖြစ်ပါတယ်။
သတင်းထောက်မလေးမေးခွန်းမေးချိန် “နင်ဘာမေးတာလဲ . . ဘာလဲ . . ဘာလဲ”လို့ ဆက်ကာမေးရင်း ရိုက်ခဲ့တာ ဖြစ်တဲ့အတွက် ThaiPBS မီဒီယာသာမက တစ်နိုင်ငံလုံးက မီဒီယာအဖွဲ့အစည်းတွေဟာ ပြည်သူအတွက် လွတ်လပ်စွာသတင်းမှန်တွေကို ဖော်ထုတ်တင်ပြခွင့်ရှိတဲ့ ဂျာနယ်လစ်တွေကို ခြိမ်းခြောက်တာလို့ ဝိုင်းဝန်း ဝေဖန်ခဲ့ကြပါတယ်။
ပရာဝစ်က နောက်ပိုင်း သူနဲ့ ရင်းနှီးလို့ စခဲ့တာဖြစ်ကြောင်းနဲ့ ဆိုးရွားတဲ့ လုပ်ရပ်မဟုတ်ဘူးလို့သာ ရှင်းလင်းခဲ့တာ ကို အခု ထိုင်းလွှတ်တော်က စုံစမ်းစစ်ဆေးသွားဖို့ ရှိကြောင်းဩဂုတ် ၂၂ ရက်နေ့မှာ ထုတ်ပြန်ခဲ့တာဖြစ်ပါတယ်။
ပြစ်မှုထင်ရှားခဲ့ရင် ပရာဝစ်ဟာ လွှတ်တော်အမတ်နေရာကနေ ဖယ်ရှားခံရနိုင်သလို တစ်သက်တာ ဖယ်ရှာခြင်းခံရတဲ့အထိ ပြစ်ဒဏ်ခံရနိုင်ပါတယ်။
ဒါပေမဲ့ ၂၀၁၈ ခုနှစ်က အွန်လိုင်းပေါ်မှာ ပရာဝစ် မတူညီတဲ့ ရိုးလက်စ်နာရီ ၁၁ လုံးအပါအဝင် အလွန်တန်ဖိုးကြီးတဲ့ နာရီပေါင်း ၂၂ လုံးကို ဝတ်ဆင်ခဲ့တဲ့ ပုံတွေ တင်ပြီး လာဘ်စားမှုကို မီးမောင်းထိုးပြခဲ့စဉ်ကလည်း အမျိုးသား အကျင့်ပျက်ခြစားမှုတိုက်ဖျက်ရေး ကော်မရှင် က အမှုစွဲချက်ကို ပယ်ချခဲ့ပါတယ်။
Ref: straitstimes
MKF-001
