မဲခေါင်၊ သြဂုတ် ၁၉
ရှမ်းတောင်၊ အင်းလေးဒေသ၊ ညောင်ရွှေမြို့နယ်က လုံကန်ကျေးရွာမှာ ကားပိုင်ရှိသူတွေကို သြဂုတ်လ ၁၈ ရက်စွဲနဲ့ PNO က ခြိမ်းခြောက်ကာ ဆပ်ကြေးကောက် ငွေတောင်းနေတယ်လို့ သိရပါတယ်။
စစ်ကောင်စီလက်အောက်ခံ PNO ယက္ခ ဆိုသူ ဦးဆောင်တဲ့အဖွဲ့က ခြိမ်းခြောက်ငွေတောင်းတာလို့ ဒေသခံတွေက ပြောပါတယ်။
ပအိုဝ်းစာ အသုံးပြုထားတဲ့ ပအိုဝ်းအထူးဒေသ-၆ ခေါင်းစီးပါ စာမှာ လုံကန်ကျေးရွာအုပ်စုရှိ ကားပိုင်ရှင်တွေအနေနဲ့ အိမ်စီးကားဆို ကျပ် ၁ သောင်း၊ ကားကြီးဆိုလျှင် ကျပ် ၁ သိန်း အလှူငွေသဘောပေးရမယ်လို့ ရေးသား ပါရှိပါတယ်။
အဆိုပါ ယက္ခဆိုသူမှာ စစ်တပ်လက်ပါးစေ PNO တပ်ရင်း-၇ က ဖြစ်ပြီး နောင်ပီဂိတ်တောင်ဘက် ဂျာမနီလမ်း တီးလုံရွာဘက်ကို သွားပို့ရမယ်ပြောကြောင်း ရွာသားတွေထံက သိရပါတယ်။
“မပေးတဲ့ကား ဖျက်စီး မီးရှို့ပစ်မယ်လို့ပြောတယ်၊ လူလဲ မညှာဘူးတဲ့၊ အသက်ပါရန်ရှာမှာ”လို့ ဒေသခံ ၁ ဦးက မှတ်ချက်ပြုပါတယ်။
စစ်ကောင်စီလက်အောက်ခံ PNO ဟာ ပြည်သူ့စစ်နာမည်ခံထားတဲ့ အကြမ်းဖက် ဓားပြအဆင့်သာရှိတဲ့ လက်နက်ကိုင်အဖွဲ့သာဖြစ်ပြီးပအိုဝ်းလက်နက်ကိုင် မဟုတ်ဘဲ လူမျိုးအမည်ခံကာ ဒေသခံတွေအပေါ် အကြမ်းဖက်၊ လုယက်၊ ပြန်ပေးဆွဲ၊ လူသတ်၊ အဓမ္မငွေတောင်းခံတဲ့လုပ်ရပ်ကိုလုပ်နေပြီး ပြည်သူကို ကိုယ်စားမပြုတဲ့စစ်ကောင်စီရဲ့လက်ကိုင်တုတ်အဖွဲ့သာ ဖြစ်တယ်လို့ တော်လှန်ရေးအဖွဲ့တွေနဲ့ ပအိုဝ်းဒေသခံတွေက ဝေဖန်ပြောဆိုနေကြပါတယ်။
အင်းလေးဒေသက ရွာပေါင်း ၄၄၅ ရွာအနက် ကန်အရှေ့ဘက်မှာ ပအိုဝ်းလူမျိုးရွာ၈၀ ကျော်ကို စစ်ကောင်စီနဲ့ PNO တွေက ပုံစံအမျိုးမျိုးနဲ့ ငွေကြေးရယူခြင်း၊ ထမင်းထုပ်ဆင့်ခြင်းတို့အပြင် ရွာစဉ်လိုက်၊ လမ်းကြောအလိုက် ပိတ်ဆို့ကာ ဒေသခံတွေကို ညှဉ်းဆဲအနိုင်ကျင့်သတ်ဖြတ်နေတာလို့ သိရပါတယ်။
MK-012
