မဲခေါင်၊ ဩဂုတ် ၈
ကရင်နီတစ်ပြည်လုံးမှာ ရှိတဲ့ တော်လှန်ရေးတပ်စခန်းနဲ့ ဆေးရုံ၊ ဆေးခန်းတွေကို လေကြောင်းရန်ကာကွယ်ရေး ဆောင်ရွက်ကြဖို့ Jobs For Kayah (JFK) အဖွဲ့က ဒီနေ့ ဩဂုတ် ၈ ရက်နေ့မှာ သတိပေးလာပါတယ်။
စစ်ကောင်စီရဲ့ တပ်တွင်း သတင်းပေါက်ကြားချက်အရ တော်လှန်ရေး တပ်စခန်းနေရာတွေကို ကိုဩဒိနိတ်အမှတ် အတိအကျ ရရှိထားတာကြောင့် အချိန်မီ ဆောင်ရွက်နိုင်ဖို့အတွက် သတိပေးရတာလို့ ဆိုပါတယ်။
“အခုက ရှောင်ရမှာ မဟုတ်ဘူး။ လေကြောင်းရန် ကာကွယ်ရမှာ။ တပ်ရင်း၊ တပ်ဖွဲ့တွေနဲ့ ဆေးရုံဆေးခန်း တည်နေရာတွေ ပေါက်ကြားမှု ဖြစ်နိုင်တဲ့ အခြေအနေတွေ ရှိထားလို့ပါ” လို့ JFK အဖွဲ့တာဝန်ခံ တစ်ဦးက ပြောပါတယ်။
အခု သတိပေးချက်ဟာ ကရင်နီပြည်တစ်ခုလုံးအကြုံးဝင်ပြီး စစ်ဘေးရှောင်စခန်းတွေကိုလည်း အထူးဂရုစိုက်ကြဖို့ JFK အဖွဲ့က သတိပေးပါတယ်။
ကရင်နီပြည်မှာ လေကြောင်းရန်ကာကွယ်ရေး အစီစဉ်တွေကို တော်လှန်ရေးအင်အားစုတွေက ပညာပေးဆောင်ရွက်တာတွေရှိပေမယ့် အမှန်တကယ်မြေပြင်မှာ ထိရောက်မှုမရှိတာကြောင့် စစ်ဘေးရှောင်နဲ့ ဒေသခံတွေက ကရင်နီပြည်ကြားကာလ အုပ်ချုပ်ရေးကောင်စီ(IEC)ကို ဝေဖန်နေကြပါတယ်။
“လေယာဉ်သံကြားတာနဲ့ အရင်လို ဖြတ်သွားတာပဲ။ ဒီမှာ မကြဲပါဘူးလို့ ပေါ့ပေါ့မနေကြပါနဲ့။ လေယာဉ်သံကြားတာနဲ့ ဗုံးခိုကျဉ်းထဲ ဝင်နေပါ။ အထူးသတိပေးပါတယ်” လို့ JFK အဖွဲ့တာဝန်ခံ တစ်ဦးက ဆက်ပြီး သတိပေးပါတယ်။
ပြီးခဲ့တဲ့ ရက်ပိုင်းတွေကလည်း လွိုင်ကော်မြို့၊ ပန်ကန်းရပ်ကွက်မှာ တော်လှန်ရေး အင်အားစုတွေနဲ့ စစ်ကောင်စီတပ်တို့ကြား တိုက်ပွဲ ပြင်းထန်ခဲ့ပြီး ရပ်ကွက်ရှိ လူနေအိမ်တွေကို စစ်ကောင်စီတပ်က မီးရှို့ဖျက်ဆီးခဲ့ပါသေးတယ်။
JFK အဖွဲ့ဟာ စစ်အာဏာမသိမ်းခင်ကတည်းက ကရင်နီပြည်ရှိ လူငယ်တွေအတွက် အလုပ်အကိုင် အခွင့်လမ်းတွေကို လူမှုကွန်ယက် စာမျက်နှာ (Facebook) မှာ တင်ဆက်ပေးနေတဲ့ အဖွဲ့အစည်းဖြစ်ပြီး လက်ရှိမှာလည်း CDM, တော်လှန်ရေးအင်အားစုတွေနဲ့ စစ်ဘေးရှောင်တွေကို ထောက်ပံ့ပေးနေတဲ့ ထောက်ပို့အဖွဲ့ ဖြစ်ပါတယ်။
MK-015
