မဲခေါင်၊ သြဂုတ် ၈

တာချီလိတ်မြို့ ဆေခန်းရပ်ကွက်အတွင်းက တရုတ်နိုင်ငံသားတွေလုပ်ကိုင်နေတဲ့ ကျားဖြဲန်ငွေလိမ်ဂိုဏ်းကို သြဂုတ် ၅ ရက်နေ့ ညက အမြောက်တပ်အရာရှိတွေက ဝင်ရောက်ဖမ်းဆီးဟန်ပြပြီး ငွေတောင်းခံရာ စစ်ဗျူဟာမှူးကို လိုင်းကြေးပေးထားတဲ့ လုပ်ငန်းနေအိမ်ဖြစ်နေလို့ တာချီလိတ်စစ်ဗျူဟာ အခြေချက ငွေတောင်းသူတွေကို ပြန်လည်ဖမ်းဆီးခဲ့တယ်လို့ သိရပါတယ်။

လေယာဉ်ကွင်းအနီး ဆေခန်းရပ်ကွက်အတွင်းက တရုတ်နိုင်ငံသားတွေ လုပ်ကိုင်နေတဲ့ ငွေလိမ်ဂိုဏ်းနေအိမ်ကို ဖမ်းဝါရမ်းမပါဘဲ စစ်ကောင်စီ အမြောက်တပ်က အရာရှိတွေနဲ့ ရဲတပ်သားပူးပေါင်းပြီး ဝါရမ်းမပါဘဲ နေအိမ်အတွင်း ဝင်ရောက်စီးနင်းပြီး ငွေကြေးတောင်းခံခဲ့တာဖြစ်ပါတယ်။

နေအိမ်အတွင်း ဝင်ရောက် ငွေကြေးညှိနှိုင်းနေချိန် တာဝန်ခံလိုင်းကြေးပေးထားတဲ့သူက ဗျူဟာမှူးကို ဖုန်းဆက်တိုက်ကြားခဲ့တဲ့အတွက် ဗျူဟာက ငွေကြေးတောင်းနေတဲ့ စစ်ကောင်စီအဖွဲ့ကို ပြန်လည်ပိတ်ဆို့ ဖမ်းဆီးခဲ့တယ်လို့ ဒေသခံသတင်းရင်းမြစ်တစ်ဦးက ပြောပါတယ်။

“အဲဒီနေ့ညက ရပ်ကွက်ထဲမှာ စစ်ကားတွေရော လူတွေရော အတော်ရှုပ်သွားတာ ကျားဖြဲန်ဝင်ဖမ်းတာ။ တရုတ်တွေတော့ တစ်ယောက်မှမပါသွားဘူး။ ငွေဝင်တောင်းတဲ့ စစ်သားတွေကို မနက်ရောက်တော့ ပြန်လွှတ်ပေးလိုက်တယ်။ အရပ်သား နည်းနည်းတော့ဖမ်းထားတယ်ကြားတာဘဲ”လို့ ဆေခန်းရပ်ကွက်အတွင်း နေသူတစ်ဦးက ပြောပါတယ်။

ကျားဖြဲန်ငွေလိမ်ဂိုဏ်းလုပ်ကိုင်နေတဲ့အိမ်ဟာ လေးထပ်တိုက်ဖြစ်ပြီး တရုတ်နိုင်ငံသားအများစုလုပ်ကိုင်နေတာဖြစ်တယ်လို့ သိရပါတယ်။ တာချီလိတ်မြို့အတွင်းက စစ်ကောင်စီတပ်သားတွေဟာ ဖမ်းဝါရမ်းမပါ အထက်အရာရှိမသိဘဲ ယခုနောက်ပိုင်း ကျားဖြဲန်လုပ်ကိုင်နေတဲ့အိမ်တွေကို လူအင်အားနဲ့ လက်နက်ကိုင်ဆောင်ပြီး ငွေကြေးဝင်တောင်းတာတွေ ဆက်တိုက်ရှိလာတယ်လို့လဲ သိရပါတယ်။

“စစ်သားတွေက ဓါးပြတိုက်သလိုဘဲ သူတို့ဟာသူတို့ အောက်ခြေမှာ အချင်းချင်းညှိပြီး ကျားဖြဲန်လုပ်တဲ့အိမ်တွေကို သေနတ်တွေနဲ့ဝင်ပြီး ဖမ်းတာလဲမဟုတ်ဘူး ငွေတောင်းတာ၊ လိုင်းကြေးကလဲ အထက်ကိုဘဲရောက်တာ အောက်ခြေက မရကြတော့ သူတို့လဲ လုပ်ချင်ရာလုပ်နေကြတဲ့သဘောဘဲ”လို့ တာချီလိတ်ဒေသခံ တစ်ဦးက ပြောပါတယ်။

တာချီလိတ်မြို့ ရပ်ကွက်တွေအတွင်းမှာ တရုတ်နိုင်ငံသားတွေနဲ့ တိတ်တခိုးလုပ်ကိုင်နေတဲ့ငွေလိမ်ဂိုဏ်းတွေဟာ တာချီလိတ် စစ်ဗျူဟာမှူးကို လစဉ် ဘတ်ငွေ ၅ သိန်းနဲ့အထက်ပေးရပြီး ခရိုင်ရဲ၊ မြို့နယ်ရဲနဲ့ ရဲစခန်းမှူးအပါအဝင် ရပ်ကွက် အုပ်ကြီးတွေကိုလဲ အဆင့်ဆင့် လိုင်းကြေးပေးပြီး လုပ်ဆောင်နေကြတာလို့ သိရပါတယ်။

လားရှိုးမြို့မှာ စစ်ရှုံးနိမ့်လို့ ထွက်ပြေးနေရတဲ့ စကခ ၁၄ ဗိုလ်မှူးကြီး သူရဇော်လွင်စိုးမှာ အရင်တာချီလိတ် အခြေချ စစ်ဗျူဟာမှာ ဗျူဟာမှူးအဖြစ် လုပ်ကိုင်ခဲ့စဉ် ကျားဖြဲန်ငွေလိမ်ဂိုဏ်းတွေကို ဆက်တိုက်ဖမ်းဆီးခဲ့ပြီး တရုတ်နိုင်ငံသားတွေကို ပြန်လည်ရောင်းချတာတွေရှိခဲ့တယ်လို့လဲ ဒေသခံတွေဆီက သိရပါတယ်။

MK – 002

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)