မဲခေါင်၊ ဇူလိုင် ၂၉
တာချီလိတ် စစ်ဗျူဟာ G2 ဦးဆောင်တဲ့အဖွဲ့က ဇူလိုင်လနောက်ဆုံးပါတ်အတွင်း ဖမ်းမိထားတဲ့ ကျားဖြန့်ငွေလိမ်ဂိုဏ်းကို ငွေကြေးနဲ့ ရွှေတွေယူကာ လူတွေအားလုံးလွှတ်ပေးလိုက်တယ်လို့ မဲခေါင်သင်းဌာနက စုံစမ်းသိရှိရပါတယ်။
အခြေချ စစ်ဗျူဟာတပ်ဖွဲ့က စစ်ဆင်ရေးဒုတိယတန်း G2 ဗိုလ်မှူး သွန်းသူရထွန်း ဦးဆောင်တဲ့ အဖွဲ့ဟာ တာချီလိတ် ဝမ်ကျောက်လုံကျေးရွာအတွင်းမှာ တရုတ်နိုင်ငံသားတွေပါဝင်ပြီး ကျားဖြန့်ငွေလိမ်ဂိုဏ်းပြုလုပ်နေတဲ့ အိမ်ကို ဇူလိုင် ၂၃ ရက်ကနေ့ ညပိုင်းက ဝင်ရောက်ဖမ်းဆီးခဲ့တာလို့ သတင်းရင်းမြစ်တစ်ဦးက ပြောပါတယ်။
နေအိမ်အတွင်း ဝင်ရောက်ဖမ်းဆီးစဉ်မှာ တရုတ်နိုင်ငံသား ဆယ်ဦးကျော်တွေ့ရှိရပေမယ့် နေအိမ်အတွင်းက ဘတ်ငွေ ၁၀ သန်းဝန်းကျင်နဲ့ ရွှေ ၁၀ ဘတ်သားကိုသာ ယူဆောင်ကာ လူအားလုံးလွတ်ပေးလိုက်တယ်လို့ အဲဒီသတင်းရင်းမြစ်က ပြောပါတယ်။
“အဲဒီနေ့က အိမ်ထဲဝင်ဖမ်းတာ လူတွေရော၊ ကွန်ပြူတာတွေရော အများကြီးဖမ်းမိတယ်။ ဒါပေမယ့် အမှုဖွင့်တယ်လဲမကြားရဘူး၊ ဖမ်းမိတဲ့လူတွေ ပြန်လွှတ်ပေးလိုက်တယ်။ အိမ်ထဲက မှတ်ပုံတင်တွေ၊ ငွေတွေ၊ ရွှေတွေ အကုန်သိမ်းလိုက်တယ်”လို့ သူက မဲခေါင်သတင်းဌာနကို ပြောပါတယ်။
အခုလို တရုတ်နိုင်ငံသားတွေပါဝင်တဲ့ ကျားဖြန့်ငွေလိမ်ဂိုဏ်းတွေကို စစ်ဗျူဟာအဖွဲ့ ဦးဆောင်ပြီး လိုက်လံဖမ်းဆီးမှုတွေပြုလုပ်နေပေမယ့် ငွေကြေးနဲ့ ပြန်လည်ရွေးယူတဲ့ အဖွဲ့တွေကိုတော့ ပစ္စည်းတွေသိမ်းဆည်းကာ လူကိုလွှတ်ပေးလိုက်ပြီး လူကို လာရောက်မရွေးယူရင်တော့ အမှုဖွင့်တာတွေပြုလုပ်တယ်လို့ သိရပါတယ်။
တရုတ်နိုင်ငံသားတစ်ဦး ပေါက်ဈေးဟာ ငွေလိမ်လုပ်ငန်း ကျွမ်းကျင်မှုနဲ့ ပြန်လည်ရောင်းချကြတာဖြစ်ပြီး ကျွမ်းကျင်သူဆိုလျှင် အနည်းဆုံး ဘတ် ၁၀ သိန်းနဲ့ အထက်ရှိပြီး ကျွမ်းကျင်မှုမရှိတဲ့ သာမန်လူတစ်ဦးပင်လျှင် အနည်းဆုံး ဘတ် ၅ သိန်းပေါက်ကြေးရှိတယ်လို့သိရပါတယ်။
MK – 002
