မဲခေါင်၊ ဇူလိုင် ၂၂
လူငယ်တွေ စုစည်းထားတဲ့ ပအိုဝ်းလူငယ်အကယ်ဒမီ (Pa-O Youth Acadamy)ကို ဖွဲ့စည်းပြီး စွမ်းရည်သင်တန်းတွေ လုပ်ဆောင်နေတယ်လို့ ပအိုဝ်းလူငယ်အကယ်ဒမီအဖွဲ့ထံက သိရပါတယ်။
PYA ကို ပအိုဝ်းလူငယ်တွေနဲ့ ပြီးခဲ့တဲ့ ဧပြီလ ၂၃ ရက်က စတင်တည်ထောင်ခဲ့တာဖြစ်ပြီး ဒေသတွင်းလူငယ် ညီနောင် ပအိုဝ်း၊ တောင်ရိုး၊ ဓနုနဲ့ ဗမာလူငယ်တွေနဲ့ အကယ်ဒမီစုဖွဲ့ကာ ဌာနကြီး ၃ ခုနဲ့ အခြားဌာနတွေနဲ့ စုဖွဲ့လှုပ်ရှားနေတယ်လို့ ဆိုပါတယ်။
ကျောင်းသားအစုအဖွဲ့၊ လူမှုရေးအစုအဖွဲ့၊ အမျိုးသားလူငယ်အစုအဖွဲ့နဲ့ တသီးပုဂ္ဂလအစုအဖွဲ့တွေအနေနဲ့ လုပ်ဆောင်နေရာက စစ်ကောင်စီက စစ်မှုမထမ်းမနေရ ဥပဒေပြဌာန်း ကျင့်သုံးလိုက်ပြီးနောက်မှာ အကယ်ဒမီကို ဖွဲ့စည်းရတာလို့ ပြောပါတယ်။
“တဦးတယောက် ကိုယ်စားပြုမဟုတ်ဘဲ အတွင်းရေးမှူး စနစ်နဲ့ စုပေါင်းဦးဆောင်မှုနဲ့ အစုအဖွဲ့လိုက် လုပ်ဆောင်နေတာဖြစ်ပါတယ်၊ စုဖွဲ့ကာလဖြစ်လို့ ညီနောင်အဖွဲ့အစည်းများနဲ့ လူထုရဲ့ယုံကြည်မှု ရယူရန် အားနည်းနေပါသေးတယ်၊ ဒေသတွင်းလူငယ်တွေ အစုအဖွဲ့တွေဆီ ဖိတ်ခေါ်စာတွေ ပို့ထားပြီး ဒီနေရာကနေလည်း ထပ်မံဖိတ်ခေါ်ပါတယ်”လို့ ယင်း PYA ရဲ့အတွင်းရေးမှူးအဖွဲ့ဝင် ၁ ဦးက မဲခေါင်သတင်းဌာနရဲ့ ဆက်သွယ် မေးမြန်းချက်ကို ဖြေကြားပါတယ်။
အဖွဲ့ရဲ့ ရည်ရွယ်ချက်နဲ့ဦးတည်ချက်ကတော့ ပအိုဝ်းလူငယ်တွေအပါအဝင် ဒေသတွင်းလူငယ်တွေ စုစည်းပြီး စစ်အာဏာရှင်နဲ့ အာဏာရှင်တော်လှန်ရေးမှာ တတ်စွမ်းတဲ့ ကဏ္ဍအသီးသီးက ပါဝင်ဖို့ လေ့ကျင့်တည်ဆောက်ပေးရန်၊ အမျိုးသားရေးရည်မှန်းချက်နဲ့ ဖက်ဒရယ်စီမိုကရေစီ အခင်းအကျင်းနဲ့အညီ လူငယ်အစုအဖွဲ့ကိုယ်စားပါဝင်နိုင်ရေး၊ တော်လှန်ရေးကာလအလွန်မှာ ဒေသတွင်းလူငယ်တွေ ပြန်လည်ထူထောင်ရေးနဲ့ ပညာရေးနယ်ပယ်မှာ အထောက်အကူဖြစ်ရေးနဲ့ ကြားကာလအစီအမံမှာ စနစ်တကျပူးပေါင်းပါဝင်နိုင်ဖို့အတွက် အဓိကအားဖြင့် ပြည်သူလူထု လုံခြုံမှုဆိုင်ရာအခန်းကဏ္ဍကို အာမခံပေးရေးတို့ဖြစ်ကြောင်း သိရပါတယ်။
လက်ရှိ စစ်သင်တန်းမှာ အခြေခံ၊ တိုက်ခိုက်ရေး တန်းမြင့်လျာထားသင်တန်းတွေ၊ အကြပ်၊ ဆေးနဲ့ကယ်ဆယ်ရေး၊ တပ်ဖွဲ့စည်းပုံ၊ လက်နက်ငယ်၊ မိုင်းဘာသာရပ်တွေအပြင် အထွေထွေ နိုင်ငံရေးမိတ်ဆက်၊ ဒီပလိုမေစီမိတ်ဆက်၊ ဖက်ဒရယ်မိတ်ဆက်၊ လူထုနိုင်ငံရေး၊ ပထဝီနိုင်ငံရေးတွေကို သက်ဆိုင်ရာဘာသာရပ်အလိုက် ကျွမ်းကျင်ပညာရှင်တွေဖိတ်ခေါပြီး သင်ကြားလေ့ကျင့်ပေးနေတယ်လို့ သိရပါတယ်။
PYA အနေနဲ့ အဓိက လှုပ်ရှားမယ့်ဒေသတွေဟာ ရှမ်းမြေလတ်နဲ့ ပအိုဝ်းဒေသတွေမှာ လှုပ်ရှားမယ်လို့ သိရပြီး တည်ဆောက်ဆဲအဖွဲ့ဖြစ်လို့ မဟာမိတ်စတာတွေတော့ လောလောဆယ် ဖြေပေးဖို့ အဆင်မပြေဘူးလို့ပြောပါတယ်။
လက်ရှိ ပအိုဝ်းတော်လှန်ရေးအဖွဲ့အစည်းတွေအဖြစ် PNFC ၊ PNLO ၊ PNDF-KK, PPDF-KD တွေအပြင် အခု ပအိုဝ်းလူငယ်တွေကိုအခြေပြုဖွဲ့စည်းခဲ့တဲ့ PYA အနေနဲ့ စစ်အာဏာရှင်တော်လှန်ရေးကို တဖက်တလမ်းက ပါဝင်လာတာဖြစ်ပါတယ်။
MK-012
