မဲခေါင်၊ ဇူလိုင် ၁၇
အရင်အစိုးရလက်ထက်က ဆေးခြောက်ကို ရာဇဝတ်ပြစ်မှုမြောက်တဲ့ မူးယစ်ဆေး စာရင်းကနေ ပယ်ဖျက်ပေးထားတာကို ဝန်ကြီးချုပ် ဆရတ်သာရဲ့ အစိုးရသစ်လက်ထက်မှာ မူးယစ်ဆေးဝါးစာရင်းပြန်သွင်းဖို့ စီစဉ်နေတာကြောင့် ဆေးခြောက်ချစ်တဲ့ တက်ကြွလှုပ်ရှားသူ ၂ ဦးဟာ ဆရတ်သာရဲ့ နေအိမ်ရှေ့မှာ အစာငတ်ခံ ဆန္ဒပြနေခဲ့တာ ဇူလိုင် ၁၆ ရက်မှာ ၆ ရက်ပြည့်သွားပြီဖြစ်ပါတယ်။
ဒါကြောင့် အနီးအနားက အရပ်သားတွေ၊ စိတ်တူကိုယ်တူ တက်ကြွလှုပ်ရှားသူတွေက အကရာဒက်ချာကင်ဒါနဲ့ ပရာဆစ်ချိုင်နျူနျန်းတို့ကို မုန့်ကြွပ်၊ ကြက်ကြော်၊ အစရှိတဲ့ အစားအသောက်တွေ စားဖို့တိုက်တွန်းပြီး ဝယ်ကျွေးနေကြပေမယ့် ဝန်ကြီးချုပ်အနေနဲ့ ဆေးခြောက်ကို တရားဝင်အဖြစ် ဆက်သတ်မှတ်ပေးထားဖို့ မစဉ်းစားမချင်း အိမ်ရှေ့ကနေ မခွာဘဲ အုန်းရေနဲ့ ရေကိုသာသောက်ပြီး ခန္ဓာကိုယ် နောက်ဆုံးခံနိုင်ရည်ရှိတဲ့အထိ အစာငတ်ခံ ဆန္ဒပြသွားဦးမယ်လို့ တုံ့ပြန်ပြောဆိုခဲ့ပါတယ်။
အသက် ၄၅ နှစ်ရှိပြီဖြစ်တဲ့ ဆေးခြောက်ချစ်သူ တက်ကြွလှုပ်ရှားသူ ပရာဆစ်ချိုင်က အရက်နဲ့ စီးကရက်တောင် တရားဝင်ထုတ်လုပ်ရောင်းချ သောက်သုံးစေတဲ့ အစိုးရက အစာစားချင်စိတ်ကို ပိုဖြစ်ပေါ်စေပြီး အကျိုးရှိတဲ့ ဆေးခြောက်ကို မူးယစ်ဆေးအဖြစ် သတ်မှတ်တာ လက်မခံနိုင်ကြောင်း၊ ဆေးခြောက်ဟာ လူကိုအကျိုးရှိစေတာတွေ အများကြီး ရှိတာကို သိပ္ပံနည်းကျ မလေ့လာဘဲ ပိတ်ပင်တာ သဘာ၀မကျကြောင်း၊ အရင်လို မူးယစ် ဆေးဝါးစာရင်းပြန်သွင်းရင် ထောင်ဒဏ် ၁၀ နှစ်အထိ ချမှတ်တဲ့ ဥပဒေကလည်း မတရားကြောင်း ဝေဖန်ပြော ကြားသွားပါတယ်။
ထိုင်းအစိုးရသစ်က စီးပွားဖြစ် စိုက်ပျိုးထုတ်လုပ်မှုတွေ မြင့်တက်အကျိုးရှိလာချိန်မှ ဆေးခြောက်ကို မူးယစ်ဆေးစာရင်းပြန်သွင်းဖို့ စီစဉ်နေလို့ နိုင်ငံတစ်ဝန်း ဆန္ဒပြသူ ဒါဇင်နဲ့ချီပြီး ဆန့်ကျင်မှုတွေ လုပ်ခဲ့ကြပေမယ့် မထူးခြားခဲ့လို့ ဝန်ကြီးချုပ်နေအိမ်ရှေ့မှာ အစာငတ်ခံဆန္ဒပြကြရင်း နောက်ဆုံး အကရာဒက်ချာကင်ဒါနဲ့ ပရာဆစ်ချိုင် တို့ ဆက်လက် အစာငတ်ခံဆန္ဒပြနေကြတာဖြစ်ပါတယ်။
Ref: france24
MKF-001
