မဲခေါင်၊ ဇူလိုင် ၉
ဇူလိုင် ၈ ရက်နေ့က ထိုင်းနိုင်ငံ၊ ချင်းမိုင်မြို့မှာ အိမ်စီးကားတစ်စီးကို ငှားစီးဖို့ ခေါ်ယူခဲ့ပြီး ဒီကားသမားကို သတ်ဖြတ်၊ ကားယူပြီး ရွှေဆိုင်ဓားပြတိုက်ခဲ့တဲ့ ချင်းမိုင်သားကို နေ့တွင်းချင်း ဖမ်းဆီးနိုင်ခဲ့ပါတယ်။
ဇူလိုင် ၈ ရက် ထိုင်းဒေသစံတော်ချိန် မနက် ၄ နာရီမှာ ချင်းမိုင်၊ ဒွိုင်ဆူသက်ကုန်းဆင်း စားသောက်ဆိုင်တစ်ဆိုင်ကို တရားခံဟာ ကားနဲ့ရောက်လာခဲ့ပြီး သူ့ကားကို ထားခဲ့ကာ၂ ကီလိုမီတာလောက်ကို လမ်းလျှောက်ရင်း ငှားဖို့ ခေါ်ထားတဲ့ကား ရောက်လာရာမှာ ၄၈ နှစ်အရွယ် ကားပိုင်ရှင် ဆူသပ်ချိုင်နန်တာဆိုသူကို သေနတ်နဲ့ ပစ်သတ်ပြီး အနီးအနား ဝမ်ဘွားဘန် ရေတံခွန်အနီး လမ်းဘေးတောင်စောင်းကနေ ပစ်ချခဲ့ပါတယ်။
မနက် ၁၁ နာရီမှာ တရားခံ နီပစ်ပွန် ဆိုသူဟာ ၈ ကီလိုမီတာလောက် ကားမောင်းသွားပြီး ချင်းမိုင်မြို့ထဲက စျေးဝယ်စင်တာက ရွှေဆိုင်က လက်ဝတ်လက်စား ရွှေ ၈၀ ဘတ်ကို ဓားပြတိုက်သွားခဲ့တာဖြစ်ပါတယ်။ (ထိုင်းရွှေတွက်ချက်မှုမှာ တစ်ဘတ်ကို ၁၅ ဂရမ် တွက်တာဖြစ်ပြီး ဘတ်ငွေ ၃ သန်း တန်ကြေးရှိပါတယ်)
ဓားပြတိုက်ပြီးချိန်မှာ နီပစ်ပွန်ဟာ ကားသမားကို သတ်ထားတဲ့နေရာ ပြန်မောင်းလာပြီးမှ ကားကိုရပ်ထားခဲ့ပြီး သူ့ကားထားခဲ့ရာ စားသောက်ဆိုင်ကို လမ်းလျှောက်ပြန်၊ သူ့ကားကိုစီးပြီး ဒွိုင်ဆာကပ်အရပ်နဲ့ ဆန်ခမ်ဖန်းအရပ်က ရွှေဆိုင်တွေမှာ လိုက်ရောင်းရာမှာ ရဲတပ်ဖွဲ့သတင်းဖြန့်ထားလို့ ရွှေဆိုင် ၃ ဆိုင်က လက်ဝတ်ရတနာပေါ်က တံဆိပ်တွေကြည့်ပြီး မဝယ်ပေမယ့် ၂ ဆိုင်က ရွှေ ၁၀ ဘတ် ဝယ်ယူလိုက်တယ်လို့ ချင်းမိုင် အမှတ် ၅ ရဲစခန်းရဲမှူးကြီး ယီဆာခွန်းက ရှင်းလင်းပြော ကြားခဲ့ပါတယ်။
သဲလွန်စတွေရရှိတဲ့အတွက် ရဲတပ်ဖွဲ့ဟာ ညနေပိုင်းမှာ ဒွိုင်ဆာကပ်အရပ်က တရားခံနေအိမ်ကို ဝင်ရောက် စီးနင်း ရှာဖွေရာမှာ လူသတ်စဉ်က ဝတ်ခဲ့တဲ့အဝတ်၊ ရောင်းမထွက်သေးတဲ့ လက်ဝတ်လက်စားတွေနဲ့ သေနတ်ကို သိမ်း ဆည်းရမိခဲ့လို့ ရည်ရွယ်ချက်ရှိစွာလူသတ်မှု၊ ဓားပြတိုက်မှု၊ တရားမဝင် သေနတ်ကိုင်ဆောင်မှုနဲ့ အမှုဖွင့်ထားပြီဖြစ်ကြောင်း၊ စုံစမ်းသိရှိရသလောက် မိသားစု ငွေရေးကြေးရေးအခက်အခဲကြောင့် ၂၀၂၃ အောက်တိုဘာလကတည်း က ဒီလိုမှုခင်းမျိုးကျူးလွန်ဖို့ ကြံစည်နေခဲ့တာဖြစ်ပြီး အင်တာနက်ပေါ်က လူသတ်၊ ဓားပြတိုက်ဂိမ်းတွေ ကစားရင်း ဒီလို အကြံပေါ်ခဲ့တာဖြစ်တယ်လို့ ဝန်ခံခဲ့ကြောင်း ရဲမှူးကြီး ယီဆာခွန်းက ပြောဆိုသွားပါတယ်။
Ref: The Straits Times
MKF-001
