မဲခေါင်၊ ဇွန် ၂၇
ကျောက်မဲမြို့၊ စကခ(၁) အနားက စစ်ကောင်စီရဲ့ဆေးတပ်ဆွယ်ကို မနက် ၉နာရီခွဲမှာ TNLA သိမ်းပိုက်ရရှိသွားပြီလို့ မြေပြင်သတင်းရင်းမြစ်တွေက မဲခေါင်ကို ပြောပါတယ်။
စစ်ကောင်စီကိုလိုလားသူ ထောက်တိုင်လို့ နာမည်ကြီးနေတဲ့ စောမင်းကြူရဲ့ သားဖြစ်သူ ရဲတပ်သားလည်း လက်မှာ ပြင်းထန်ဒဏ်ရာရလို့ ဆေးကုသမှုခံယူဖို့ ဆေးတပ်ဆွယ်ကို သွားရာမှာ ဆေးတပ်ဆွယ်သိမ်းခံရ သိလိုက်ရတာလို့ နီးစပ်သူတဦးက ပြောပါတယ်။ အခုတော့ စောမင်းကြူတို့ မိသားစုလိုက် ကျောက်မဲမြို့က ထွက်ခွာဖို့အကူအညီလိုက်တောင်းနေတယ်လို့ သူက ဆက်ပြောပါတယ်။
သိမ်းပိုက်ခံရတဲ့ အဲဒီဆေးတပ်ဆွယ်မှာ စစ်ကောင်စီက ဒဏ်ရာရသူတွေနဲ့ ပြည့်နေတယ်လို့ သတင်းရင်းမြစ်တဦးက မဲခေါင်ကို ပြောပါတယ်။
မြေပြင်သတင်းအရ ကျောက်မဲရဲစခန်းတိုက်ပွဲမှာ ရဲစခန်းအတွင်း စစ်တပ်နဲ့ရဲအင်အား ၂၅ ဦးခန့်ရှိနေပြီး မြို့နယ်ရဲမှူးစိုးမြင့် သေဆုံးကာ ရဲစခန်းမှူး ဒုရဲမှူး တင်မောင်ရွှေ ဖမ်းခံရပြီး သေသူ၊ ဒဏ်ရာရသူများပြားစွာရှိနေတယ်လို့ သိရပါတယ်။ မနေ့ည က ကျောက်မဲရဲစခန်းက အချပ်သား ၃၀ ခန့်ကို TNLA က ပြန်လွှတ်ပေးတယ်လို့သိရပြီး ရဲအချို့ ဒဏ်ရာတွေနဲ့ ထွက်ပြေးနေတယ်လို့ သိရပါတယ်။
ကျောက်မဲဆေးရုံမှာတော့ ဝန်ထမ်းတွေ စစ်ရှောင်ကုန်လို့ ဆေးကုသမှုအတွက် နမ့်ဆန်မှာရှိနေတဲ့ CDM အထူးကု ဆရာဝန်ကြီးဆီ TNLA ခွင့်ပြုတဲ့ လူနာတင်ကားတွေနဲ့ ပို့ဆောင်ကုသနေရတယ်လို့ သိရပါတယ်။
ကျောက်မဲပရဟိတဥက္ကဌက “မနေ့က ဒဏ်ရာရသူတွေကို နမ့်ဆန်ဘက်ပို့ဖို့ပြောတယ်။ မနေ့က လက်နက်ကြီးထိလို့သေတဲ့ ကိုမျိုးဝေလင်း ၄၃ နှစ်ကို မနက် ၁၀ နာရီမထိုးခင်ကို အိုမ်တမာဝ်းလူမှုအသင်းက သင်္ဂြိုလ်ရတယ်။ ဒဏ်ရာပြင်းထန်တဲ့ ကလေးနဲ့အမျိုးသမီးကို သီပေါ နယ်စည်းမခြားက ကိုမျိုးတို့ လာယူပြီး သီပေါဆေးရုံမှာဆေးကုသပေးခဲ့တယ်။ အဓိကက ပြည်သူတွေ ကျန်းမာရေးအတွက် ကျောက်မဲဆေးရုံကြီးမှာအရင်လို ဝန်ထမ်းတွေနဲ့ ပြည်သူ့အသက်ကယ်ပေးဖို့ လိုအပ်တာပါ” လို့ မဲခေါင်ကို ပြောပါတယ်။
ကျောက်မဲမြို့တွင်းမှာ ဒီနေ့မနက်ပိုင်းအထိ ပစ်ခတ်သံတွေ ငြိမ်သက်နေပြီး စစ်ကောင်စီတပ်တွေဖြစ်တဲ့ စကခ(၁)၊ ခမရ-၅၀၂ နဲ့ ၅၀၁ ဝန်းကျင်မှာတော့ တိုက်ပွဲတွေဆက်လက်ဖြစ်ပွားနေသလို လက်နက်ကြီး ပစ်ခတ်သံတွေလည်း ကြားရတယ်လို့ ဒေသခံတွေက ပြောပါတယ်။ မနက် ၇နာရီက ၉နာရီခွဲအထိ လက်နက်ကြီးချက်ရေ နှစ်ဖက် ၃၀ ကျော်ပစ်ခတ် တိုက်ခိုက်နေပြီး တိုက်ပွဲပြင်းထန်ဆဲလို့သိရပါတယ်။
ပုံစာ – ဒီနေ့မနက် ကျောက်မဲမြို့တွင်းဓာတ်ပုံများ
MK – 012
