(ရှမ်းမြောက် ကျောက်မဲ၊ သီပေါ၊ နောင်ချိုမြို့ နေ့လည်ပိုင်း တိုက်ပွဲအခြေအနေ)
မဲခေါင်၊ ဇွန် ၂၆
(နောင်ချိုမြို့အခြေအနေ)
ရှမ်းမြောက်၊ နောင်ချိုမြို့ကို ယနေ့ဇွန်လ ၂၆ ရက် မနက် ၁၁ နာရီအထိ ရရှိတဲ့မြေပြင်သတင်းအရTNLA နဲ့ တော်လှန်ရေးတပ်ဖွဲ့တွေက ထိန်းချုပ်နိုင်သော်လည်း စစ်ကောင်စီတပ်တွေက လက်နက်ကြီးနဲ့ပစ်ခတ်နေတယ်လို့ သိရပါတယ်။
မနေ့ဇွန် ၂၅ ရက်နေ့မှာ စတင်ခဲ့တဲ့နောင်ချိုမြို့တိုက်ပွဲမှာ TNLA တပ်ဖွဲ့တွေက မြို့ရဲ့အဓိကနေရာတွေဖြစ်တဲ့ ဆေးရုံ၊ မီးသတ်၊ မိုးဇလနဲ့ စစ်ကောင်စီတွေတပ်စွဲထားတဲ့ ပြည်ထောင်စုလမ်းမဘေးက စစ်မှုထမ်းဟောင်းရုံးနဲ့ ရဲစခန်းတွေကို သိမ်းပိုက်နိုင်ခဲ့တယ်လို့ ဒေသခံတစ်ဦးရဲ့ပြောကြားချက်အရ အတည်ပြုနိုင်ပါတယ်။
သို့သော်လည်း နောင်ချိုမြို့ကို အဓိကထိန်းချုပ်ထားတဲ့ နောင်ချိုမြို့အနောက်ဘက် ၁ မိုင်ခန့်အကွာက ခမရ ၁၁၄ ၊ ၁၁၅ နဲ့ မြို့တောင်ဘက် ၂ မိုင်ခန့်အကွာက အမြောက်တပ်စု ၆၀၆(ဒုံးတပ်) တို့ကိုတော့ ယနေ့မနက်ထိ တိုက်ခိုက်နေဆဲလို့ ဆိုပါတယ်။
“အဲတပ်တွေက ဘူတာနဲ့စျေးရပ်ကို လက်နက်ကြီးနဲ့ပစ်လို့ အမျိုးသမီး ၃ ဦးထိတယ် သိရတယ်၊ ၂ ဦးသေတယ်လို့လဲ ကြားတယ်၊ မြို့ခံတွေကတော့ ကံကြီးဘက်ကို ရှောင်နေကြတာ ဘယ်ဘက်မှ ထွက်လို့မရဘူးဖြစ်နေတာ”လို့ နောင်ချိုဒေသခံ အမျိုးသမီး တစ်ဦးက မဲခေါင်သတင်းဌာနကိုပြောပါတယ်။
(ကျောက်မဲမြို့ အခြေအနေ)
ကျောက်မဲမြို့ဘက်မှာတော့ မြို့တွင်းတိုက်ပွဲတွေဖြစ်ပွားနေဆဲဖြစ်ကာ မနက် ၁၁ နာရီအထိ ရဲစခန်းကို တိုက်ခိုက်နေဆဲလို့ မြို့ခံတစ်ဦးကပြောပါတယ်။
“မနက် ၁၀ နာရီအတွင်း သွားလာခွင့်ပြုတာကြောင့် မြို့သူမြို့သားတွေ စျေးတွေ၊ ဆေးတွေ လိုအပ်တာတွေ အားလုံးထွက်ဝယ်ကြတယ်၊ ဆိုင်တွေကတော့ တံခါးလှပ်ပြီးရောင်းပေးတာပေါ့၊ အသုဘတောင် ၁၀ နာရီအတွင်းအပြီးချဖို့ပြောတယ်၊ ပရဟိတအသင်းတွေကိုတော့ လူနာ၊ လူမမာကိစ္စတွေ ရှိရင် သွားလာခွင့်ပြုထားတယ်လို့ဆိုတယ်”လို့ ကျောက်မဲအခြေစိုက် ပရဟိတအသင်း ဥက္ကဌ တစ်ဦးက မဲခေါင်သတင်းဌာနကို ပြောပါတယ်။
TNLA ရဲ့ ယနေ့ ဇွန်လ ၂၆ ရက် ထုတ်ပြန်ချက်မှာတော့ စစ်ကောင်စီရဲ့အမြောက်တပ်ကုန်း -၃၅၂ တပ်ရင်းနဲ့ စခန်းသာတို့ကို မနက်၅း၄၇ အချိန်က တိုက်ပွဲဖြစ်ပွားနေပြီး ၆း၃၀ အချိန်မှာ နှစ်ဖက် ထိတွေ့တိုက်ပွဲဖြစ်ပွားခဲ့တယ်လို့ ပါရှိပါတယ်။
ယင်းအမြောက်တပ်ရင်း ၃၅၂ မှာ တပ်ရင်းအနေနဲ့မရှိတော့ဘဲ မြစ်ကြီးနားဘက်ကို ပြောင်းရွှေ့သွားပြီးနောက် ယင်းတပ်ရင်းနေရာမှာ စစ်ကောင်စီရဲ့ လှုပ်ရှားတပ်များက အလှည့်ကျနေရာယူနေခဲ့တာဖြစ်လို့ တပ်တွေနဲ့ တိုက်ပွဲဖြစ်နေတာဖြစ်မယ်လို့ ဒေသခံကပြောပါတယ်။
(သီပေါမြို့အခြေအနေ)
သီပေါမြို့ဘက်မှာတော့ မနက်ပိုင်း ၇နာရီခန့်က လက်နက်ကြီးသံ ၃ ချက် ကြားရပြီးနောက် မနက် ၁၀ နာရီခန့်မှာ နှစ်ဖက်လက်နက်ကြီး ပစ်ခတ်မှု ၁၅ လုံးခန့်ကြားရပြီး လက်နက်ငယ်သံများ သီပေါတံတားဖက်မှာ အတွဲလိုက်ပစ်ခတ်နေသံကြားနေရတယ်လို့ သိရပါတယ်။
“တံတားမှာ ပါတဲ့ ရဲတစ်ယောက်ပြောတာတော့ သီပေါတံတားကို လက်နက်ကြီးတွေနဲ့ ပစ်ခံနေရတယ်လို့ပြောတယ်၊ ခလရ ၂၃ ဘက်မှာလည်း တိုက်ပွဲဖြစ်နေတယ်လို့ သိရတယ်၊ မြို့ထဲ လက်နက်ကြီး ၄ လုံးကျတာ ထိမှာစိုးလို့အပြင်မထွက်ရဲဘူး၊ ဘာတွေထိပြီး ဘာတွေပျက်မှန်းမသိရဘူး၊ ဌာနဆိုင်ရာတွေ ရုံးပိတ်သိမ်းတာတွေရှိပေမယ့် ထွက်ခွာခွင့်တော့မပေးသေးဘူး၊ မီးလာမလာတာ မနေ့ကနေ ခုထိပဲ၊ ဖုန်းလိုင်းတွေလဲသိပ်မကောင်းတော့ဘူး”လို့ သီပေါက ဌာနဆိုင်ရာ Non-CDM တစ်ဦးက မဲခေါင်သတင်းဌာနကို ပြောပါတယ်။
လက်ရှိ ရှမ်းမြောက်အခြေအနေမှာတော့ မန္တလေး-မူဆယ် ပြည်ထောင်စုလမ်းမကြီးပေါ်က နောင်ချို၊ ကျောက်မဲနဲ့ သီပေါမြို့တွေမှာတိုက်ပွဲတွေ ဖြစ်ပွားနေပြီး TNLA နဲ့PDF တွေက နောင်ချိုမြို့ပေါ်ကို ထိန်းချုပ်နိုင်ကာ ကျောက်မဲမှာ မြို့တွင်းတိုက်ပွဲတွေဖြစ်ပွားနေပြီး သီပေါမှာတော့ မြို့တွင်းကို ပစ်ခတ်တိုက်ခိုက်နေတယ်လို့ သိရပါတယ်။
TNLA ဘက်မှာ မိုးကုတ်ဗျူဟာတပ်ရင်း ၄ ရင်းနဲ့ မန္တလေး PDF တွေအပြင် ယနေ့မှာတော့ ရှမ်းပြည်မြောက်ပိုင်းမဟာမိတ်တပ်ရင်းNorthern Shan State Alliance Army(N.S.S.A.A) က TNLA နဲ့လက်တွဲပြီး စစ်ဆင်ရေးဖော်ဆောင်နေတယ်လို့ ထုတ်ပြန်လာပါတယ်။
MK-012
