မဲခေါင်၊ ဇွန် ၂၄
ကချင်ပြည်နယ်၊ မိုးညှင်းနဲ့ ဖားကန့်ကြား၊ အင်းတော်ဒေသက စစ်ကောင်စီ စခန်း ၃ နေရာကို ယမန်နေ့ ဇွန်လ ၂၃ ရက်နေ့နဲ့ ဒီနေ့ ဇွန်လ ၂၄ ရက်နေ့ မနက်ပိုင်းမှာ KIA နဲ့ ပူးပေါင်း တော်လှန်ရေးတပ်ဖွဲ့က သိမ်းပိုက်လိုက်ကြောင်း KIA အသိုင်းအဝိုင်းဆီက သိရပါတယ်။
“ ဝှေလုံ (ဟွေလုံ)၊ ညောင်ပင် စစ်ကောင်စီ စခန်းတွေကို သိမ်းလိုက်နိုင်ပြီ။ ဝှေလုံ (ဟွေလုံ)၊ ညောင်ပင် စခန်းတွေကနေ ထွက်ပြေးလာတဲ့ စစ်ကောင်စီတွေ လုံးတုံစစ်ကောင်စီ တပ်စခန်းထဲ ဝင်သွားပြီ” လို့ KIA ရှေ့တန်းနဲ့ နီးစပ်သူ တစ်ဦးက ပြောပါတယ်။
စစ်ကောင်စီ ခလရ – ၄၂ နဲ့ SNA ရှမ်းနီ ပြည်သူ့စစ် အင်အား ၄၀ ခန့်ရှိတဲ့ ဝှေလုံ (ဟွေလုံ) စစ်ကောင်စီစခန်းကို ယမန်နေ့ ဇွန်လ ၂၃ ရက်နေ့ ညနေ ၆ နာရီခွဲခန့်က ရှင်းလင်းသိမ်းပိုက်နိုင်ခဲ့ပြီး စစ်ကောင်စီနဲ့ SNA ပူးပေါင်းအင်အား ၃၀ ခန့်ရှိတဲ့ ညောင်ပင် စစ်ကောင်စီစခန်းကိုတော့ ည ၈ နာရီခွဲ ဝန်းကျင်ခန့်က အပြီးသတ် သိမ်းပိုက်ခဲ့တယ်လို့ ဆိုပါတယ်။
“ ချောင်းဝ စစ်ကောင်စီစခန်းလည်း ဒီ မနက် ၅ နာရီ ခွဲ ဝန်းကျင်ခန့်က အပြီးသတ် ရှင်းလင်းသိမ်းပိုက်လိုက်ပြီ။ လင်နက်ခဲယမ်းတွေလည်း ရတယ်” လို့ နောက်ထပ် ရှေ့တန်းနဲ့ နီးစပ်သူ တစ်ဦးက ပြောပါတယ်။
ချောင်းဝ စစ်ကောင်စီစခန်းကိုတော့ လွန်ခဲ့တဲ့ ဆယ်စုနှစ် ၄ ခု ကျော်ခန့်က KIA ဘက်က လက်လွှတ်ခဲ့ရတဲ့စခန်းဖြစ်ပြီး နှစ်ပေါင်း ၄၄ အကြာမှာ ပြန်လည်သိမ်းပိုက်နိုင်ခဲ့တာဖြစ်တယ်လို့ သူကပြောပါတယ်။
အင်းတော်ဒေသက အဲဒီ ဝှေလုံ (ဟွေလုံ)၊ ညောင်ပင်၊ ချောင်းဝ စစ်ကောင်စီ စခန်းတွေဟာ ဖားကန့်ဘက်က စစ်ကောင်စီ တွေအတွက် အဓိက အရေးပါတဲ့ ထောက်ပို့ ထောက်တိုင် စခန်းတွေ ဖြစ်တယ်လို့ ဆိုပါတယ်။
တိုက်ပွဲ ဖြစ်ပွားနေတဲ့ နေရာ ဒေသရှိ ဒေသခံပြည်သူတွေက ဟိုပင်၊ နန့်မား၊ မိုးညှင်းဘက်တွေမှာ ထွက်ပြေး တိမ်းရှောင်နေကြရကြောင်း ဒေသခံတွေက ပြောပါတယ်။
ယခု ဇွန်လ အတွင်း KIA နဲ့ ပူးပေါင်းတော်လှန်ရေး တပ်ဖွဲ့တွေက ဝိုင်းမော်မြို့နယ်က ဆဒုံး စစ်ကောင်စီဗျူဟာ အပါအဝင် စခန်းအကြီးအသေး ကာကင်း စခန်းတွေ ၁၉ ခု၊ တနိုင်းမြို့နယ်က ပယင်းမော်ရှိ စစ်ကောင်စီစခန်း ၁ ခုနဲ့ စစ်မျက်နှာ အသစ်ဖြစ်တဲ့ မိုးညှင်းမြို့နယ်က အခုသိမ်းထားတဲ့ စခန်း ၃ ခု၊ စုစုပေါင်း စစ်ကောင်စီ စခန်း ၂၀ ကျော်ကို သိမ်းပိုင် ရရှိထားတာ ဖြစ်ပါတယ်။
CJ-008