မဲခေါင် ဇွန် ၂၁
စစ်ကိုင်းတိုင်း၊ ထီးချိုင့်မြို့နယ်မှာ အမျိုးသား ညီညွတ်ရေး အစိုးရ NUG လက်အောက်ခံ ပသုံးလုံးအဖွဲ့တွေက လယ်ယာမြေများအပေါ် လမ်းဖောက်လုပ်နေတာကို ရပ်တန့်ခြင်းမရှိတာကြောင့် ဒေသခံပြည်သူတွေက ဆက်လက် ကန့်ကွက်ဆန္ဒပြနေဆဲ ဖြစ်တယ်လို့သိရပါတယ်။
မြစ်ကြီးနား-မန္တလေး လမ်းနဲ့ ချိတ်ဆက်ဖို့ဟု ဆိုကာ အကျယ် ပေ ၃၀၊ အရှည်တစ်မိုင်ရှိ ဆူးပုံချောင်-အင်းတိန် လမ်းသစ်ဖောက်လုပ်ရာ ဒေသခံများ ပိုင်ဆိုင်တဲ့ လယ်ယာမြေများပေါ် ဖြတ်သန်း ဖောက်လုပ်နေတာဖြစ်ပါတယ်။
“လူထုဆန္ဒပြတာကို ပလဖနဲ့ ပကဖလက်နက်ကိုင်လုံခြုံရေးအင်အား ၆၀ နဲ့ ၇၀ကြားလောက်ရှိတယ်။ လမ်းတစ်လျောက်ကင်းပုန်းတွေတောင် ချထားသေးတယ်။ ပွိုင်ဖိုက် စက်လက်နှစ်လက်နဲ့ ၆၀ မမနှစ်လက် ။မသိရင် ပြည်သူကသူတို့ကို ဘာလုပ်မှာကြနေတာဗျာ။ ဒါဟာလက်နက်အင်အား လူအင်အားပြပီး ပြည်သူကိုခြိမ်းခြောက်ထားတာ မဟုတ်လားဗျ” လို့ဒေသခံတစ်ဦးကပြောပါတယ်။
လမ်းမဖောက်လုပ်မီက လယ်ယာမြေလျော်ကြေးပေးမယ်လို့ ဒေသခံတွေနဲ့ညှိနှိုင်းမှုရှိခဲ့ပေမယ့် လယ်ပိုင်ရှင်တွေကလက်ခံခဲ့တာမရှိခဲ့ပဲ ပသုံးလုံးအဖွဲ့တွေက လက်နက်ကိုင်လုံခြုံရေးယူပြီး စတင်လုပ်ဆောင်ခဲ့တာကို ဒေသခံတွေက ဆန္ဒထုတ်ဖော်နေကြတာပါ။
ကိစ္စနဲ့ပတ်သက်ပြီး လယ်သမားတွေက သူတို့တွေရဲ့လယ်မြေတွေကို အသုံးပြုခွင့် မပေးသလို လျော်ကြေးပေးတာကိုလည်း လက်မခံကန့်ကွက်နေပေမဲ့ မေလ ၃၀ ရက်နေ့က စတင်ကာ NUG လက်အောက်ခံပသုံးလုံးတွေက ဦးဆောင်ကာ ဖောက်လုပ်နေတာဖြစ်ပါတယ်။
ပြီးခဲ့တဲ့ ဇွန်လ ၁၆ ရက်မနက်ပိုင်းကဆန္ဒထုတ်ဖော်မှုကို အကြမ်းဖက်ဖြိုခွဲခံခဲ့ရပြီး ဖမ်းဆီးခံရမှုတွေ ရှိခဲ့တယ်လို့ သိရပါတယ်၊
“အခြားရွာတွေက ဆန္ဒပြတာလာပြီးပူးပေါင်းဖို့ရှိပေမယ့် သူတို့က ခြိမ်းခြောက်မှုတွေလုပ်တယ် လမ်းတွေမှာပိတ်ဆို့ထားတော့ ရောက်မလာနိုင်ကြဘူး”လို့ ဆန္ဒထုတ်ဖော်သူတစ်ဦးကပြောပါတယ်။
လမ်းဖောက်မှုဖြစ်ပေါ်နေတဲ့ အင်းတိန်ရွာက စစ်ကောင်စီတပ်တွေ စစ်ကြောင်းထိုး မီးရှို့ဖျက်စီးခံခဲ့ရတဲ့ ရွာဖြစ်ပြီးတော့ လက်ရှိ ပသုံးလုံး စိုးမိုးနယ်မြေ ဖြစ်ပါတယ်။
“ဒီမလောက်လေးမလောက်စား အာဏာရူးတွေကိုမှ ကျနော်တို့ နိုင်အောင်မတားဆီးနိုင်ရင် မင်းအောင်လှိုင်ကို ဘယ်လိုတိုက်ကြမလဲ”လို့ဒေသခံကပြောပါတယ်။
အမျိုးသားညီညွတ်ရေးအစိုးရ NUG ရဲ့ ကာကွယ်ရေးဝန်ကြီးဌာနဲ့ ပြည်ထဲရေးဝန်ကြီးဌာနက လက်အောက်မှာ ပြည်သူ့အုပ်ချုပ်ရေး(ပအဖ)၊ ပြည်သူ့ကာကွယ်ရေး(ပကဖ)၊ ပြည်သူ့လုံခြုံရေး(ပလဖ)အဖွဲ့ တွေကို ဖွဲ့စည်းထားတာဖြစ်ပြီးတော့ “ပ”သုံးလုံးအဖွဲ့လို့ အတိုကောက် ခေါ်ကြပါတယ်။
CJ -015
