မဲခေါင်၊ ဇွန် ၁၆
ဗီယက်နမ် တပါတီအစိုးရက ဖမ်း၀ရမ်းထုတ်ထားပြီး ထိုင်းကိုဖမ်းဆီးဖို့နဲ့ ပြန်လွှဲပေးဖို့ တောင်းဆိုထားတဲ့ ဘာသာရေးတက်ကြွလှုပ်ရှားသူ ဝိုင်ကွိန့်ဘီဒပ်ဘ်ကို ဘန်ကောက် ကနေဒါသံရုံးနားမှာ ထိုင်းရဲတပ်ဖွဲ့က ဖမ်းဆီး သွားခဲ့လို့ လူ့အခွင့်အရေးအဖွဲ့တွေက ဗီယက်နမ်ပြန်မပို့ဖို့ တိုက်တွန်းတောင်းဆိုနေကြပါတယ်။
ဘီဒပ်ဘ်ဟာ ပြီးခဲ့တဲ့ ၆ နှစ်က လူနည်းစု ခရစ်ယာန်တွေနေတဲ့ ဒက်ခ်လက်ခရိုင်မှာ လွတ်လပ်စွာ ကိုးကွယ်ခွင့် အတွက် ဆန္ဒပြလှုပ်ရှားခဲ့သူဖြစ်ပြီး ဗီယက်နမ်အစိုးရက ဖမ်းဆီးဖို့ကြိုးစားတဲ့အတွက် ထိုင်းနိုင်ငံထဲ ထွက်ပြေး ပုန်းအောင်နေထိုင်နေသူဖြစ်ပါတယ်။
မနှစ်က ဒက်ခ်လက်ခရိုင်မှာ ဘာသာရေးနဲ့ပတ်သက်ပြီး အကြမ်းဖက် တိုက်ခိုက်မှုတွေဖြစ်ပွားခဲ့ရာမှာ ရဲအရာရှိ ၄ ယောက်အပါ ၉ ယောက်သေဆုံးခဲ့ပြီး ဒါဇင်နဲ့ချီတဲ့သူတွေ ဖမ်းခံရ ပြီးနောက် ဗီယက်နမ်အစိုးရဟာ လှုံ့ဆော်သူဟာ ဘီဒပ်ဘ်ဖြစ်တယ်ဆိုပြီး တရားရုံမှာ ထောင်ဒဏ် ၁၀ နှစ်ချလို့ ဖမ်း၀ရမ်းထုတ်ပြီး ထိုင်းရဲတပ်ဖွဲ့ထံ ဖမ်းဆီးပြန်ပို့ဖို့ တောင်းဆိုခဲ့ပါတယ်။
ဘီဒပ်ဘ်က ဒီအဓိကရုဏ်နဲ့သူနဲ့ဘာမှ မဆိုင်ဘဲ ထိုင်းနိုင်ငံကိုထွက်ပြေးလာပြီးကတည်းက UNHCR မှာ ဒုက္ခ သည်အဖြစ် စာရင်းတင်ခဲ့ပြီး ကနေဒါမှာ ခိုလှုံဖို့ လျှောက်ထားခဲ့ရာက ဘန်ကောက် ကနေဒါသံရုံးက အင်တာဗျူး ခေါ်လို့အသွားမှာ သံရုံးအနီး ဖမ်းခံလိုက်ရတာဖြစ်ကြောင်း သူငယ်ချင်းဖြစ်သူဆီ နောက်ဆုံးမက်ဆေ့ချ်ပို့ပြီး ပျောက်ဆုံးသွားပါတယ်။
ဗီယက်နမ်နဲ့ကနေဒါဟာ တရုတ်ရဲ့ ဩဇာစိုးမိုးမှုလျှော့ချနိုင်ရေးနဲ့ အနောက်အင်အားစုနဲ့ပိုပြီးမဟာမိတ်လုပ်နိုင် ရေးအတွက် နိုင်ငံရေးအရ ပူးပေါင်းဆောင်ရွက်နေလို့ ဗီယက်နမ်က ထွက်ပြေးတဲ့တက်ကြွလှုပ်ရှားသူ ဘီဒပ်ဘ် ကို ခိုလှုံခွင့်ပေးပြီး ခေါ်ယူဖို့ နှောင့်နှေးကျန့်ကြာနေရာက အခု အင်တာဗျူးခေါ်ရာမှာ ထိုင်းရဲ ဖမ်းဆီးခံရခြင်းအတွက် တာဝန်ရှိကြောင်းနဲ့ ထိုင်းဥပဒေရော နိုင်ငံတကာဥပဒေအရ ဒုက္ခသည်ကို အန္တရာယ်ရှိတဲ့ မိခင်နိုင်ငံဆီ ပြန်မပို့ပေး ဖို့ လူ့အခွင့်အရေးစောင့်ကြည့်အဖွဲ့ HRW က အသိပေးထုတ်ပြန်သွားပါတယ်။
ဒီသတင်းအတွက် ဘန်ကောက် ကနေဒါသံရုံးနဲ့ ထိုင်းအာဏာပိုင်တွေဆီ မေးမြန်းစုံစမ်းရာမှာ တစ်စုံတစ်ရာ တုံ့ပြန်ဖြေကြားခြင်းမရှိဘူးလို့ သိရပါတယ်။
MKF – 001
Ref: theglobeandmail
