မဲခေါင်၊ ဇွန် ၁၁

ရှမ်းတောင် တောင်ကြီးမြို့က ရှမ်းအရှေ့ ကျိုင်းတုံမြို့ကို ဆက်သွယ်ထားတဲ့ အမှတ်(၄)ပြည်ထောင်စုလမ်းမကြီး ဟာ လမ်းပြင်နေတာ၊ လမ်းပျက်တာတွေကြောင့် ကားတွေ ထောင်ချီပိတ်ဆို့ ကြန့်ကြာမှုတွေ ဖြစ်ပေါ်နေတယ်လို့ သိရပါတယ်။

တောင်ကြီး-ဟိုပုံး-မိုင်းပွန်-လွယ်လင် ကြား လမ်းပြင် လမ်းချဲ့တဲ့နေရာနဲ့ သံလွင်မြစ်အကျော် ရှမ်းအရှေ့မိုင်းပျဉ်းတောင်မှာ မိုးရွာလမ်းချော်လို့ ကားတွေပိတ်မိနေပြီး ခရီးသွားပြည်သူတွေ အဆင်မပြေဖြစ်နေကြတာအပြင် ကုန်စိမ်းကားတွေပါ အခက်အခဲတွေနဲ့ကြုံနေရတာလို့ သိရပါတယ်။

“ခေါင်းနွဲ့မှာ ကျောက်မိုင်းခွဲနေတာ၊ ခွဲပြီးသားတွေရှင်းနေတာ၊ ပုံမှန် ၂ နာရီပဲမောင်းရတာက်ုိ ခု ၆ နာရီကျော်တယ် ဒီကြားထဲ လမ်းပိတ်မှန်း သိရက်နဲ့ ကျော်တက်တဲ့ ကားတွေကြောင့် ပိုကြန့်ကြာကြရတယ်၊ တချို့လူတွေ ကိုယ့်ဖို့လောက်ပဲသိကြ တယ်”လို့တောင်ကြီး-တာချီလိတ်ပြေးဆွဲ နေတဲ့ ယာဉ်လိုင်းတစ်လိုင်းမှ ယာဉ်မောင်း ၁ ဦးက မဲခေါင်ကိုပြောပါတယ်။

မိုင်းပွန်-လွိုင်လင်ကြားမှာ ကွန်ကရစ်လမ်းခင်နေလို့လမ်းချဲ့တာတွေ လုပ်နေတာကြောင့် လုပ်ငန်းလုပ်နေစဉ်လမ်းပိတ်ထားလို့ ကားတွေထောင်ချီပိတ်မိနေတာလို့ပြောပါတယ်။

၄င်းအပြင် ရှမ်းအရှေ့ သံလွင်မြစ်အကျော် ဆင်မောင်းကစပြီး မိုင်းပျဉ်းတောင်အထိ မိုးရွာလို့ လမ်းသားမြေပွ မြေစေးတွေပြိုကျရာက လမ်းတွေချော်ပြီး ကားတွေပိတ်နေကာ ယင်းနေရာတွင် ကံကောင်းရင် ၂ ရက်ကံမကောင်းက ၃ ရက်ကျော် ကြာမြင့်စောင့်စားသွားလာနေရတယ်လို့ပြောပါတတယ်။

“လမ်းကကျဉ်း ရှောင်မရတဲ့အခြေအနေကရှိနေ၊ ၁၂ ဘီးကားတွေ၊ ကုန်တင်ကားတွေ တအားများလာတာ၊ ရှမ်းရှေ့တက်မယ်ဆိုရင် ရိက္ခာခြောက် နဲ့ရေတွေ ဆောင်သွားကြဖို့လိုမယ်၊ စားစရာရှိတောင် စျေးကအဆမတန်ကြီးတာ လက်ဘက်ရည် ၁ထုပ် ၅ ထောင်၊ ကောက်ညှင်း ၁ထုပ် ၁ထောင် လာရောင်းတဲ့သူရှိတာပဲ ကျေးဖူးတင်ရတာ၊ စားစရာမပါလို့ကတော့ လာမရောင်းရင်ငတ်ပဲ`လို့ ပြောပါတယ်။

ကုန်ကားအချို့မြေသားမခိုင်တဲ့နေရာတွေရပ်ထားရာက ချောက်ထဲကျမှုုတွေ ရှိသလို ကားကျော်တက်ရင်း တောင်စောင်းမှာလဲတာတွေလဲရှိတယ်လို့ပြောပါတယ်။

ပြည်တွင်းမှာ အလုပ်အကိုင်မရှိသလောက်ရှားပါးနေတဲ့အပြင် စစ်ကောင်စီက လူမဆန်စွာ သတ်ဖြတ်နေမှု၊ အဓမ္မစစ်မှုထမ်းဖမ်းဆီးနေမှုတွေကြောင့် ထိုင်း၊ လာအို နိုင်ငံတွေဆီ နိုင်ငံသားတွေ ရာထောင်ချီ နေရပ်စွန့်ခွာ ထွက်ပြေးနေကြတာဖြစ်လို့ အရင်က ခရီးသွားလူမရှိရာက ခရီးသွားကားတွေ လူအပြည့်သွားလာနေကြတာဖြစ်လို့ ကားတွေပိတ်ရင် ရိက္ခတွေ ပါသွားကြဖို့အကြံပြုတယ်လို့ ဆိုပါတယ်။

ရှမ်းမြောက် က လမ်းတွေ အဆင်မပြေဖြစ်ခဲ့ပြီးနောက် ရှမ်းအရှေ့အခြေအနေဟာ ရှမ်းမြောက်နဲ့အောက်ပိုင်းအခြအနေကို ပြောင်းလဲယူခဲ့ သလိုဖြစ်နေပြီးလားရှိုးအစား ကျိုင်းတုံ၊ မူဆယ်အစား မိုင်းလား၊ မြဝတီအစား တာချီလိတ်နဲ့ တမူးအစား ကျိုင်းလတ် ဖြစ်လာတာကြောင့် ကုန်ကားတွေ အသွားအလာ များပြားလာနေတာဖြစ်ပြီး လမ်းတွေကကျဉ်း ၊ လမ်းသားတွေက မကောင်းလို့ ခုလို လမ်းပိတ်ဆို့မှုတွေဖြစ်နေရတာလို့ ဆိုပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)