မဲခေါင်၊ ဇွန် ၆
ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ် နွားဘန်းကြီးကျေးရွာမှာ စစ်မှုထမ်းအတွက် လူစာရင်းကောက်ပေးနေတဲ့ စစ်ကောင်စီခန့် အုပ်ချုပ်ရေးမှူးတစ်ဦး ပစ်ခတ်ခံခဲ့ရတယ်လို့ နီးစပ်သူတွေက ပြောပါတယ်။
အသက် ၅၀ အရွယ် အုပ်ချုပ်ရေးမှူး ဦးမန်းကျော်ဟာ ဇနီးဖြစ်သူနဲ့အတူ မနေ့ ဇွန် ၅ နေ့လည်ပိုင်းက တောင်ယာသွားစဥ်ပစ်ခတ်ခံခဲ့ရပြီးနောက် အခင်းဖြစ်ပွားရာနေရာမှာပဲ ပွဲချင်းပြီး သေဆုံးသွားခဲ့တယ်လို့ ဆိုပါတယ်။
ပုဂ္ဂိုလ်ရေးအရ နီးစပ်သူတစ်ဦးက “သူက အရင်ကတည်းက စစ်မှုထမ်းအတွက်ဆို အရမ်းတက်ကြွတာ။ စစ်တပ်က ဘာခိုင်းခိုင်း အကုန်လုပ်တယ်။ သူ့မိန်းမကလည်း သေမှာကြောက်လို့ ရပ်ခိုင်းနေတာကြာပြီ။ သူက ပြောစကားနားမထောင်ဘဲ စစ်တပ်အတွက်ပဲ အလုပ်လုပ်ပေးချင်တာ” လို့ ပြောပါတယ်။
ပစ်ခတ်ခံရပြီးနောက် ဦးမန်းကျော်ဟာ နောက်စေ့၊ လက်ဝဲနဖူး၊ လက်ဝဲမျက်ခုံးနဲ့ လက်ဝဲလက်ခလယ်တို့မှာ ၄ ချက် ပစ်ခံရကာ ကျည်ဖောက်ဝင်ဒဏ်ရာတွေ ရရှိခဲ့ပြီး ပွဲချင်းပြီး သေဆုံးသွားတာပါ။
အဲ့ဒီပစ်ခတ်မှုကို ရွာငံ PDF (1003) တပ်ခွဲ ၂၊ ရွာငံ ပကဖ တပ်ခွဲ ၁ နဲ့ ၂ တို့က ပူးပေါင်းစစ်ရေး ဖော်ဆောင်ခဲ့တာဖြစ်ပြီး အထိခိုက်အကျဆုံးမရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။
ရွာခံတစ်ဦးက “အလောင်းကတော့ စစ်တပ်လာသယ်သွားပြီ။ တစ်ရွာလုံးကို ပိတ်ပြီးတော့ စစ်နေတယ်။ ရွာအဝင်/ထွက် ကင်းချထားတယ်။ ဖုန်းတွေလည်း စစ်တယ်” လို့ ပြောပါတယ်။
ဦးမန်းကျော်ဟာ ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ အာဏာသိမ်းပြီးကတည်းက စစ်ကောင်စီသတင်းပေး (ဒလန်) အလုပ်ကို ပြုလုပ်ခဲ့သူဖြစ်ပြီး တက်ကြွလူငယ်တွေကို ဖမ်းဆီးရာမှာ အိမ်တိုင်ရာရောက် ညွှန်ပြခဲ့တဲ့အပြင် ၂၀၂၂ ခုနှစ်၊ ဧပြီလ ၂၂ ရက်နေ့ကလည်း သူ့ရဲ့ သတင်းပေးမှုကြောင့် PDF စခန်းတစ်ခုကို စစ်တပ်က ဝင်ရောက်စီးနင်းခဲ့ပြီး အဲ့ဒီဖြစ်စဥ်မှာ တပ်ဖွဲ့ဝင်တစ်ဦး ကျဆုံးခဲ့ဖူးပါတယ်။
၂၀၂၁ ခုနှစ်က ဖွဲ့စည်းခဲ့တဲ့ ဓနု PDF ကို ကရင်နီပြည်မှာ စစ်ရေးအတွေ့အကြုံ ယူပြီးနောက် ၂၀၂၃ ခုနှစ် စက်တင်ဘာလ ၅ ရက်နေ့မှာ အမျိုးသားညီညွတ်ရေးအစိုးရ (NUG) ရဲ့ ကာကွယ်ရေးဝန်ကြီးဌာန (MOD) လက်အောက်ခံ ရွာငံ PDF (1003) အဖြစ် ပြောင်းလဲဖွဲ့စည်းခဲ့တယ်လို့ သိရပါတယ်။
MK-015
