မဲခေါင် မေ ၁၇
ကရင်နီပြည်နယ် လွတ်မြောက်နယ်မြေ တစ်နေရာမှာ ဖားဆောင်းပြည်သူ့ကာကွယ်ရေးတပ်(PPDF) တပ်ရင်းအမှတ် ၁၁၀၈ ရဲ့ အခြေခံ စစ်သင်တန်းဆင်းပွဲကို ပြုလုပ်ခဲ့တယ်လို့ ဒီနေ့ မေ ၁၇ ရက်နေ့ ထုတ်ပြန်ချက်အရ သိရပါတယ်။
အလယ်ပိုင်းတိုင်း အထူးစစ်ဆင်ရေး၊ ကရင်နီ စစ်ဒေသခွဲ၊ ဘော်လခဲခရိုင် ဗျူဟာအမှတ် ၁၁၀၅ လက်အောက်ခံ ဖားဆောင်း PDF တပ်ရင်းမှာ ၄၅ ရက်ကြာအောင် ကြာမြင့်ခဲ့တဲ့ သင်တန်း အပတ်စဥ် ၁၀ ကို သင်တန်းသားဦးရေ ၈၀ ဝန်းကျင် နဲ့ သင်တန်းဆင်းပွဲ ပြုလုပ်ခဲ့တယ်လို့ ဆိုပါတယ်။
ဖားဆောင်း PDF ရဲ့ ပြန်ကြားရေးတာဝန်ရှိသူတစ်ဦးက “ဒါက အခြေခံစစ်ပညာ သင်တန်းဆိုတော့ တပ်ရင်းထဲမှာ လာမယ့်လူမှန်သမျှက ဘယ်သူမဆို ဒီသင်တန်းကို တက်ကိုတက်ရမှာပေါ့နော်၊ ပြီးတော့မှပဲ သူတို့ ဝါသနာပါတာတွေအပေါ်မှာ ကြည့်ပြီးတော့မှ ပြန်ဆုံးဖြတ်သွားမှာပါ။ ဒရုန်းအပိုင်း၊ ဆက်သွယ်ရေး၊ ရုံးပိုင်းဆိုင်ရာ စသဖြင့်ပေါ့နော်” လို့ ပြောပါတယ်။
ဖားဆောင်း PDF ဟာ အမျိုးသားညီညွတ်ရေးအစိုးရ (NUG)ရဲ့ ကာကွယ်ရေးဝန်ကြီးဌာန(MOD) လက်အောက်ခံ တပ်ရင်းဖြစ်ပေမယ့် NUG ရဲ့ ထောက်ပံ့မှု မလုံလောက်တာကြောင့် ရိက္ခာ အခက်အခဲနဲ့ လက်နက်ခဲယမ်း လိုအပ်ချက်တွေ ရှိနေပြီး ပြည်တွင်း/ပ အလှူရှင်တွေရဲ့ ထောက်ပံ့မှုနဲ့သာ အဆင်ပြေအောင် ရပ်တည်နေရတယ်လို့ တာဝန်ရှိသူတွေဆီက သိရပါတယ်။
“ရဲဘော်သစ်တွေလည်း ထပ်ရောက်လာ၊ ဟိုးအရင်ရှိနေတဲ့ ရဲဘော်ဟောင်းတွေ အကုန်လုံးကိုတောင်မှ လက်နက်ကတော့ ပြည့်ပြည့်စုံစုံမတပ်ဆင်ပေးနိုင်သေးဘူးပေါ့၊ ဒါပေမဲ့လည်း ကဏ္ဍလေးတွေ ခွဲပြီးတော့မှ အလုပ်လုပ်ရမှာပေါ့၊ သူတို့ကိုယ်တိုင်ကလည်းပဲ လက်နက် မပြည့်စုံနိုင်သေးမှန်း သိတယ်၊ ဒါပေမဲ့ PDF ထဲကိုပဲ လိုလိုချင်ချင် ဝင်ချင်တယ် ဆိုတဲ့ အနေအထားတစ်ခုမှာ ကျနော်တို့လည်း သင်တန်း လုပ်ပေးရတာပေါ့” လို့ ဆက် ပြောပြပါတယ်။
ဖားဆောင်း PDF ကို ၂၀၂၂ ခုနှစ် ဇူလိုင်လ ၃၀ ရက်နေ့မှာ စစ်အာဏာရှင်စနစ် အမြစ်ပြတ် တိုက်ထုတ်ဖို့ ရည်ရည်ချက်နဲ့ စတင်တည်ထောင်ခဲ့ပြီး ၂၀၂၂ ခုနှစ် နိုဝင်ဘာလ ၁၅ ရက်နေ့မှာ NUG က တရားဝင်ကုတ်နဲ့ လက်အောက်ခံ တပ်ရင်းအဖြစ် အသိအမှတ်ပြုခဲ့တယ်လို့ တာဝန်ရှိသူတွေရဲ့ ပြောပြချက်အရ သိရပါတယ်။
MK-015
