မဲခေါင် မေ ၁၅
ကယား(ကရင်နီ)ပြည်၊ ဒီးမော့ဆိုမြို့နယ် အနောက်ဘက်ခြမ်းက စစ်ဘေးရှောင်စခန်းတွေမှာ ရေရှားပါးမှု ကြုံတွေ့နေရတာကြောင့် အကူအညီတွေ လိုအပ်နေတယ်လို့ ဒေသတွင်း ကူညီဆောင်ရွက်ပေးနေသူတွေက ပြောပါတယ်။
နွေရာသီကာလ လွိကထိရေထွက်ပေါက် ရေခန်းလာတဲ့အပြင် စစ်ဘေးရှောင် အရေအတွက် များလာတာကြောင့် လာမယ့်မိုးရာသီမှာ ရေသိုလှောင်ဖို့အတွက် မိုးကာ၊ ရေပိုက်၊ အမိုးနဲ့ ရေသယ်ဖို့ ဓါတ်ဆီတွေ လိုအပ်နေတာပါ။
စစ်ဘေးရှောင် တစ်ဦးက “အဝတ်လျှော်ထားတဲ့ ရေကို အိမ်သာမှာ ပြန်သုံးတယ်။ ရေချိုးရင် ဆပ်ပြာမတိုက်ခင် အဲဒီရေနဲ့ အရင်လောင်းရတယ်။ တချို့ရက်တွေဆို နောက်ဆုံးချိုးထားတဲ့ရေကို ပြန်စစ်ပြီး ထမင်းဟင်း ချက်တဲ့နေရာမှာ ပြန်သုံးရတယ်” လို့ ပြောပါတယ်။
ရေကန်တစ်ကန်ကို ရေဂါလန် ၂၀၀၀၀ ဆံ့ပြီး ရေတစ်ခါဖြည့်တဲ့ ကုန်ကျစရိတ် ငွေကျပ် ၄ သိန်းနီးပါး ရှိကာ အိမ်ထောင်တစ်စုကို ၃ ရက်ခြားတခါ ၅ ဂါလံနှုန်းနဲ့ စစ်ဘေးရှောင် အားလုံးအတွက် ဂါလန် ၂၀၀၀ ကျော် ပေးနေရတယ်လို့ ဆိုပါတယ်။
ဒီးမော့ဆိုမြို့နယ် အနောက်ဘက်ခြမ်းက တချို့နေရာတွေမှာလည်း ရေတစ်ဂါလံရဖို့ တောင်အောက်မှာရှိတဲ့ အများသုံး မိုးရေသိုလှောင်ကန်တွေဆီ အသွားအပြန် တစ်နာရီခွဲကြာတဲ့အထိ လမ်းလျှောက်သယ်ယူနေရပြီး ရာသီဥတု ပူပြင်းတဲ့ဒဏ်တွေကြောင့် မူးမေ့လဲတာတွေပါ ကြုံနေရတယ်လို့ စစ်ဘေးရှောင်တွေဆီက သိရပါတယ်။
ဒေသတွင်း ကူညီဆောင်ရွက်ပေးနေသူ တစ်ဦးက “ရေရှားတာကလည်း ပြဿနာပေါ့နော်။ နောက်ဆက်တွဲကလည်း ပြသနာ။ ရေရှားတော့ ကျောက်ကပ်ရောဂါတွေ ယားနာတွေ၊ ခူနာတွေ ဖြစ်ကြတာပေါ့။ ဖြစ်လာရင် ဆေးရုံ၊ ဆေးခန်းလည်း မလွယ်ဘူး။ ကိုယ်ထူကိုယ်ထ ကျန်းမာရေးဌာနတွေမှာလည်း ဆေးတွေက မရှိဘူး။ အဲလိုတွေပေါ့နော်။ ဒါပေမယ့် ရေပြဿနာကို အရင်ရှင်းလိုက်ရင် နောက်ဆက်တွဲက အလိုလို ပြီးသွားမှာပေါ့နော်။ ဒါကြောင့် ရေကန်လုပ်ဖို့အတွက် မိုးကာတွေ၊ ရေသယ်ဖို့ ဓါတ်ဆီဖိုးတွေ လှူပေးစေချင်တာ” လို့ ပြောပါတယ်။
ကရင်နီပြည်နယ်မှာ ဒုတိယ ရေအရှားပါးဆုံး ဒေသဖြစ်တဲ့ ဖရူဆိုမြို့နယ်မှာလည်း ထီးသဲကူး၊ လော်ပလျားလဲ၊ ဒေါကူလီ စတဲ့ကျေးရွာတွေမှာ ရေရှားပါးမှုကြောင့် ကျောက်ကပ်နဲ့ အရေပြား ရောဂါတွေ ဖြစ်ပွားနေပြီး ကလေးသူငယ် တချို့ အသက်သေဆုံးတဲ့အထိ ကြုံနေရတယ်လို့ စစ်ဘေးရှောင်တွေဆီက သိရပါတယ်။
MK-014
