မဲခေါင်၊ ဧပြီ ၂၆
ရှမ်းပြည်တောင်ပိုင်း၊ ဓနုကိုယ်ပိုင် အုပ်ချုပ်ခွင့်ရဒေသ၊ ရွာငံနဲ့ ပင်းတယမြို့နယ်တွေမှာ စစ်မှုထမ်း ဥပဒေ အကောင်အထည်ဖော်သူတွေကို ထိထိရောက်ရောက် အရေးယူသွားမယ်လို့ ဓနုပြည်သူ့ လွတ်မြောက်ရေးတပ်ဦး (DPLF) ဥက္ကဌ ဦးထွန်းထွန်းနိုင်က ပြောပါတယ်။
“အရေးကတော့မယူလို့ မရဘူးပေါ့နော်၊ အရေးကတော့ယူမှာ၊ ကျနော်တို့ကတော့ Page မှာ Public နဲ့စာထုတ်ပြီးတော့မှ မလုပ်ပေမဲ့ ကျွန်တော်တို့ by name နဲ့ သတိပေးစာတွေ ပို့တယ်ဗျ” လို့ သူကပြောပါတယ်။
DPLF အနေနဲ့ စစ်မှုထမ်းဥပဒေအကောင်အထည်ဖော်နေတဲ့ စစ်ကောင်စီလက်အောက်ခံ ပျူစောထီး၊ အုပ်ချုပ်ရေးမှူး၊ ရာအိမ်မှူးတွေကို ကျည်ဆံတစ်တောင့်နဲ့အတူ သတိပေးစာပို့ခဲ့ပြီး ဖြစ်တယ်လို့ ဆိုပါတယ်။
အခုလို သတိပေးပြီးတဲ့နောက်မှာ စစ်မှုထမ်းဥပဒေ အသက်၀င်အောင် အကောင်အထည်ဖော်ပေးနေတဲ့ စစ်ကောင်စီလက်အောက်ခံ ၈၀ ရာခိုင်နှုန်းခန့်ဟာ တာ၀န်ရပ်ဆိုင်းသွားကြပေမဲ့ သူတို့နေရာ အစား၀င်လာသူတွေက ဆက်လက်ဆောင်ရွက်နေကြတယ်လို့ ဒေသခံတွေဆီက သိရပါတယ်။
“သတင်းပေးရော၊ ဒလန်ရော၊ အုပ်ကြီးရော၊ ထွေအုပ်စာရေးတွေရော၊ သူတို့မှမဟုတ်ဘူး၊ သူတို့နဲ့ ပူးပေါင်းတဲ့ဟာတွေရော ဘယ်သူတွေဘာတွေလုပ်နေတယ်ဆိုတာ ကျနော်တို့အားလုံး သတင်းလည်း ရတယ်၊ သိလည်းသိတယ်ပေါ့၊ ကျနော်တို့အနေနဲ့ကတော့ သတိပေးထုတ်ပြန်တာ မလုပ်တော့ဘူးပေါ့၊ သူတို့ရဲ့လုပ်ဆောင်ခဲ့တဲ့အတိုင်း သူတို့ကိုတော့ မဖြစ်မနေ၊ မလွှဲမသွေ အပြစ်ပေးအရေးယူဖို့တော့ စစီစဉ်နေပြီပေါ့” လို့ ဦးထွန်းထွန်းနိုင်က ဆက်ပြောပါတယ်။
ပြီးခဲ့တဲ့ ၂ ပတ်အတွင်း ရွာငံနဲ့ ပင်းတယမြို့နယ်က ကျေးရွာတချို့မှာ စစ်မှုထမ်းဖို့အတွက် မဲနှိုက်ခဲ့ပေမဲ့ အုပ်ချုပ်ရေးမှူး ဆွေမျိုး အသိုင်းဝိုင်းနဲ့ မိသားစုဝင်တွေကတော့ မပါဝင်ခဲ့ဘူးလို့ ဆိုပါတယ်။
ဒါ့အပြင် ဓနုဒေသအတွင်း စစ်မှုမထမ်းလိုသူတွေအတွက် ကိုယ်စားစစ်မှုထမ်းခိုင်းဖို့ လူတစ်ဦးကို သိန်း ၅၀ ပေါက်စျေးရှိနေတယ် လို့ ဒေသခံတွေဆီက စုံစမ်းသိရပါတယ်။
MK-015
