မဲခေါင်၊ ဧပြီ ၂၃
ရှမ်းပြည်တောင်ပိုင်း၊ ဆီဆိုင်၊ ညောင်ရွှေ၊ ဟိုပုံး၊ ပင်လောင်း တို့တွင် တိုက်ပွဲ့ကာလ ၉၁ ရက်အတွင်း အရပ်သားပြည်သူ သေဆုံးမှုမြင့်တက်လာကာ ၆၆ ဦးထိ ရှိလာတယ်လို့ ဧပြီလ ၂၀ ရက်နေ့ထုတ်ပြန်တဲ့ ပအိုဝ်းလူငယ်အစည်းအရုံးရဲ့ ထုတ်ပြန်ချက်အရ သိရပါတယ်။
တိုက်ပွဲများစတင်ခဲ့တဲ့ ဇန်နဝါရီ ၂၁ ရက် ဧပြီလ ၂၀ ရက်အထိ ရက်ပေါင်း ၉၀ ကျော်ကာလအတွင်း ပြည်သူ ၆၆ ဦးသေဆုံးခဲ့ရသလို ဒဏ်ရာရသူ ၇၉ ဦး အထိ ရှိခဲ့တယ်လို့ ထုတ်ပြန်ချက်မှာ ပါရှိပါတယ်။
လက်နက်ကြီးကြောင့် သေဆုံးသူ ၁၈ ဦး၊ လေကြောင်းတိုက်ခိုက်မှုကြောင့် သေဆုံးသူ ၁၆ ဦး၊ အဖမ်းခံရပြီးသေဆုံးသူ ၁၆ ဦးနဲ့မိုင်းထိတာ၊ စစ်ဆေးမေးမြန်းစဉ် ပစ်ခတ်တာတွေကြောင့် သေဆုံးရသူ ၁၆ ဦးရှိတယ်လို့ ထုတ်ပြန်အရ သိရပါတယ်။
ရှမ်းတောင်တိုက်ပွဲဖြစ်ပွားခဲ့တဲ့ မြို့နယ်တွေက စစ်ဘေးရှောင်နေတဲ့အရပ်သားတွေကို နေရပ်ကို ပြန်ဖို့ ဖိအားပေးတဲ့ဖြစ်စဉ်တွေ အများအပြားရှိနေပြီး ဒဏ်ကြေးပေးဆောင်ရမှာ၊ ပိုင်ဆိုင်မှုတွေ သိမ်းယူခံရမှာ စတဲ့ ဖိအားပေးခြိမ်းခြောက်မှုတွေကြောင့် ဒေသတည်ငြိမ်မရှိသည့်တိုင် နေရပ်သို့ပြန်လာရတာ စတဲ့ ကောက်ယူရရှိတဲ့ အချက်အလက်တွေက ဖော်ပြနေတယ်လို့ ဆိုပါတယ်။
ယခုထုတ်ပြန်တဲ့ အချိန်အထိ နေရပ်ပြန်ရင်း စစ်ကောင်စီရဲ့လက်နက်ကြီး ပစ်ခတ်မှုနဲ့ မိုင်းထိဖြစ်စဉ်တွေကြောင့် အရပ်သား ၇ ဦး ပြင်းထန်ထိခိုက်ဒဏ်ရာရရှိခဲ့တဲ့အပြင် နေရပ်သို့ စားနပ်ရိက္ခာပြန်သယ်ယူရာမှာ သတ်ဖြတ်ခံရတဲ့ အရပ်သား ၉ ဦးအထိ ရှိတယ်လို့ သိရပါတယ်။
စစ်ဘေးရှောင် ကြာမြင့်လာတာနဲ့အမျှ စား၊ ဝတ်၊ နေရေး အခြေခံလိုအပ်ချက်တွေအပြင် ကျန်းမာရေးအထောက်အကူပြုမှုလည်းများစွာလိုအပ်လာနေတယ်လို့ သိရပါတယ်။
“ပြန်ချင်တာပေါ့ဗျာ၊ ဒါပေမယ့် တိုက်ခိုက်နေဆဲ စစ်မြေပြင်ဖြစ်နေဆဲအခြေအနေ၊ မြို့ရဲ့ အခြေခံလိုအပ်ချက် ရေ၊ မီး၊ လုံခြုံရေး ဘာတခုမှ မရှိသေးသလို ဘာအာမခံချက်မှလည်း မရှိသေးတာကို ဘယ်လိုပြန်နေကြရမလဲဗျာ၊ တိုက်ပွဲတွေရပ်၊ ပေါက်ကွဲစေတတ်တာတွေရှင်းလင်းပြီးလို့ ရေ၊မီးကအစ အရောင်းအဝယ်တွေ စလုပ်နိုင်တဲ့အခြေအနေရှိပြီဆိုမှ ပြန်ရဲကြမှာပါ၊ ခုတော့ ပြာပုံဖြစ်သွားတဲ့အခြေအနေမှာ ပြန်ရင်တောင် အသက်ဘေးထိခိုက်နိုင်လို့ မပြန်ဝံ့ကြတော့ပါဘူး၊ အဓိကက လာမယ့် မိုးရာသီဆို အမိုးအကာကအစ အားလုံးလိုအပ်လာနေတာပါ” လို့ ဆီဆိုင်မြို့၊ အောင်ချမ်းသာ ရပ်ကွက်သား တစ်ဦးက မဲခေါင်ကို ပြောပါတယ်။
လက်ရှိမှာ စစ်ဘေးရှောင် ဦးရေ ၇၁၁၅၀ ဦးနဲ့အထက် ရှိတယ်လို့ ထုတ်ပြန်ချက်မှာ ဖော်ပြပါရှိပါတယ်။
MK-012
