မဲခေါင်၊ ဧပြီ ၁၈
ကရင်နီပြည်နယ်၊ ဖရူဆိုမြို့နယ် အနောက်ဘက်ခြမ်းမှာ စစ်ရှောင်နေကြတဲ့ စစ်ရှောင်စခန်းတွေမှာ ရေလှူဒါန်းခဲ့တယ်လို့ Karenni Hope က တာဝန်ရှိသူ ကိုလွမ်းက ဧပြီလ ၁၇ ရက်နေ့က ပြောပါတယ်။
ဆိုသယ်စစ်ရှောင်စခန်းအုပ်စုမှာ စစ်ရှောင်စခန်းသေး ၆ ခုရှိကာ ဘူးခူးစစ်ရှောင်စခန်းနဲ့ ဝှယ်သူလျား စစ်ရှောင်တွေက လမ်းပန်းဆက်သွယ်ရေး ခက်ခဲတာကြောင့် လာရောက်လှူဒါန်းသူနည်းပါးပြီး အခက်အခဲတွေ ကြုံနေရတာကြောင့် သွားရောက်လှူဒါန်းဖြစ်တယ်လို့ သိရပါတယ်။
လမ်းပန်းဆက်သွယ်ရေးအခက်အခဲကြောင့် စစ်ရှောင်စခန်းတွေမှာ ဧပြီလ ၁၅ ရက်ကနေ ၁၇ ရက်အထိ အချိန်ပေးပြီး စစ်ရှောင်စခန်းတွေမှာရှိတဲ့ ဘုံဆိုင်ရေလှောင်ကန်တွေထဲကို ရေအပြည့်ဖြည့်ပေးခဲ့တယ်လို့ ဆိုပါတယ်။
” သူတို့က တော်တော်လေး ခက်ခဲနေတဲ့ အနေအထားမှာပေါ့နော်။ သူတို့အတွက် ရေလှူမယ်ဆိုရင်တောင် တရက်လုံးနေမှ နှစ်ခေါက်လောက်ပဲ နှစ်စခန်းလောက်ပဲ ဖြည့်လို့ရတယ်ပေါ့နော်။ အယ့်လောက်ထိကိုဝေးတယ်။စစ်ရှောင်စခန်းနဲ့ ရေရှိတဲ့နေရာနဲ့ကပေါ့နော်။ သူတို့က အကူညီတောင်းတော့ လှူဖြစ်တာပေါ့နော်။ဆိုသယ်အုပ်စုကို ၃ ခေါက်၊ ဘူးခူက ၁ ခေါက်၊ ဝှယ်သူလျားက ၂ ခေါက်။ ရေသယ်ကားနဲ့ပေါ့နော်။ တခေါက်ကို ဂါလံ ၁၂၀၀ လောက်ပါတယ်”
စစ်ဘေးရှောင်ပြည်သူတွေက ဘောလခဲမြို့နယ်နဲ့ ဖရူဆိုမြို့နယ်တွေကနေ စစ်ဘေးရှောင်နေကြပြီး စစ်ရှောင်camp တွေအလိုက် စုဝေးနေထိုင်နေကြကာ စစ်ရှောင်ကာလ ကြာမြင့်တဲ့သူတွေရှိသလို နောက်ထပ်ထပ်တိုးလာတဲ့ စစ်ရှောင်ပြည်သူတွေလည်း ရှိတယ်လို့ သိရပါတယ်။
ကရင်နီပြည်နယ်မှာ စစ်ဘေးရှောင်ပြည်သူ ၃ သိန်းနီးပါးထိရှိပြီး နီးစပ်ရာ တောတောင်တွေနဲ့ ဆွေမျိုးတွေရှိရာနေရာတွေမှာ ကျေးရွာအလိုက် စုပေါင်းနေထိုင်ကြပြီး စစ်ရှောင်ကာလကြာလာတာနဲ့အမျှ စားနပ်ရိက္ခာ၊ သောက်သုံးရေနဲ့ မိုးကာလိုအပ်မှုတွေများပြားပြီး အခက်အခဲတွေလည်း ကြုံနေရတယ်လို့ စစ်ဘေးရှောင်ပြည်သူတွေဆီက သိရပါတယ်။
CJ004
