မဲခေါင်၊ ဧပြီ ၁၈

ရှမ်းပြည်တောင်ပိုင်း၊ ဆီဆိုင်မြို့က တောတောင်ထဲ စစ်ဘေးရှောင်နေရတဲ့ ဟိုခဲရပ်ကွက်က ဒေသခံ ၃၀၀ လောက် စားရေရိက္ခာ အရေးပေါ်လိုအပ်နေတယ်လို့ ယင်းစစ်ဘေးရှောင်တွေရဲ့ ပြောကြားချက်အရ သိရပါတယ်။

ဆီဆိုင်မြို့ပေါ်ရပ်ကွက်ဖြစ်တဲ့ ဟိုခဲရပ်ကွက်က ၁၅၀ ဦးခန့်နဲ့ နောင်ထော်ရေလယ်ကျွန်းက ၁၅၀ ခန့် စုစုပေါင်း ၃၀၀ လောက်ဟာ တောတောင်ထဲ စစ်ဘေးရှောင်ရင်း ရက်ကြာလတာနဲ့အမျှ ရိက္ခာတွေအတွက် အခက်အခဲဖြစ်လာတယ်လို့ စစ်ဘေးရှောင်တစ်ဦးက ပြောပါတယ်။

“ရက်ကြာလာတော့ ဝင်ငွေမရှိ စားစရာကလည်း အိမ်ပြန်ယူရင်တောင်မရှိတော့သလို ရှာဖွေစားသောက်ဖို့တောင် ခက်ခဲလာတယ်၊ တနေ့ လုပ်တနေ့စားဖို့တောင်အနိုင်နိုင်ဖြစ်နေကြပြီ၊ ကျမညီမဆို ခဏပဲစစ်ရှောင်တာဆိုပြီး ဘာမှ မပါခဲ့ဘူး၊ နေဖို့ကလည်း တဲထိုးဖို့တောင် ပိုက်ဆံမရှိလို့ ကျမနဲ့ကပ်နေရတာ၊ မိသားစုများရင်ပိုခက်ခဲကြတယ်၊ အဝတ်အစားကတော့ ဖြစ်သလိုနေလို့ ရသေးတယ်၊ စားစရာက အရေးကြီး အရမ်းကိုလိုနေပြီ၊ ပြန်စရာအိမ်ကလည်း မီးလောင်ပြာကျသွားတော့ နေစရာလဲ မိုးမကျမီလိုအပ်လာကြပြီ၊ အရမ်းခက်ခဲနေကြတယ်” လို့ မဲခေါင်ကို ပြောပါတယ်။

မီးဖွားတော့မယ် ကိုယ်ဝန်ဆောင် ၁ ဦးမှာလည်း အခက်အခဲတွေရှိနေသလို နို့စို့အရွယ်လသား ၂ ဦးနဲ့နို့တိုက်မိခင်တွေ၊ မသန်စွမ်းသက်ကြီးရွယ်အိုတွေလည်း ရှိနေတယ်လို့ ပြောပါတယ်။

“ရေလယ်ကျွန်းက ဦးရေ ၁၅၀ လောက်မှာ လေဖြတ်သူ ၁ ဦးရှိနေတယ်၊ သက်ကြီးရွယ်အိုနဲ့ နာတာရှည်ရောဂါသည်တွေ၊ ကလေးသူငယ်တွေ အများအပြားလဲရှိနေတယ်” လို့ စစ်ဘေးရှောင်တစ်ဦးက ပြောပါတယ်။

ဖျားနေတဲ့သူ၊ ဝမ်းပျက်ဝမ်းလျှော ဖြစ်နေသူတွေနဲ့ ယားနာပေါက်နေတဲ့ကလေးတွေ အများအပြားရှိနေသလို ကျန်းမာရေးစောင့်ရှောက်မှုလည်းမရှိတာဖြစ်လို့ မဖြစ်မနေ အရေးပေါ်အကူအညီတောင်းရတာလို့ ပြောပါတယ်။

ပအိုဝ်းလူငယ်အစည်းအရုံးက ဧပြီ ၁၅ ရက်မှာ ထုတ်ပြန်တဲ့စာရင်းအရ စစ်ဘေးရှောင် ၇ သောင်းကျော်ရှိပြီး ယင်းအနက် ရွာတွေက စစ်ဘေးရှောင်တွေဟာ အခြေအနေအရ ပြန်လို့ရနေပေမယ့် ဆီဆိုင်မြို့ပေါ် ၆ ရပ်ကွက်ဒေသခံတွေကတော့ ပြန်စရာအိမ်မရှိသူများပြားနေပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)