မဲခေါင်၊ မတ် ၂၁
ရှမ်းပြည်တောင်ပိုင်း၊ မိုင်းပန်၊ မိုးနဲ၊ မောက်မယ်နဲ့ လင်းခေးမြို့နယ်တွေက ရွာတွေမှာ စစ်ကောင်စီရဲ့ စစ်သားစုဆောင်းမှုကို မလိုလားလက်မခံတဲ့ အသက်ဘောင်ဝင်တဲ့ လူငယ်တွေဟာ မြို့ရွာတွေကနေ စွန့်ခွာသွားနေကြတာ ရာထောင်ချီနေပြီလို့ ဒေသအရင်းအမြစ်တွေထံက သိရပါတယ်။
မိုင်းပန် က လူငယ်တစ်ဦးကတော့ “ရွာဖက်ကော မြို့ပေါ်ကော တော်တော်များများတော့ ဆင့်ခေါ်စာမရောက်ခင် RCSS ဖက် သင်တန်းတက်ဖို့ သွားကြလေရဲ့၊ ရှောင်တဲ့သဘောပေါ့၊ RCSS ဖက်က သင်တန်းသွားတက်ရင် အနည်းဆုံးအိမ်တော့ ပြန်လာလို့ရသေးတယ်ဆိုပြီး သွားကြတာ များတယ်” လို့ မဲခေါင်ကို မတ်လ ၂၀ ရက်က ပြောပါတယ်။
မဲနှိုက်ဖို့ခေါ်တဲ့ နှုန်းထားဦးရေက တစ်ရပ်ကွက်နဲ့ တစ်ရပ်ကွက်မတူကြောင်းနဲ့ တချို့ရပ်ကွက်က ခေါ်ပြီး တချို့ရပ်ကွက်က မခေါ်သေးဘူးလို့ ပြောပါတယ်။
အလားတူ မိုးနဲ၊ မောက်မယ် ဘက်က အသက်အကျုံုးဝင်တဲ့ လူငယ်တွေ ရာချီမက မြို့တွေပေါင်းရင် ထောင်ချီပြီး လွတ်ရာကျွတ်ရာပြေးကုန်ကြပြီလို့ ဒေသခံတွေက ပြောပါတယ်။
“ထိုင်းဖက်ပြေးတာများတယ်၊ ဗမာတပ်ဝင်မယ့်အစား ရှမ်းတပ်ထဲဝင်မယ်ဆိုပြီး RC နဲ့ SSPP ထဲ အများဆုံးသွားကြတယ်၊ စစ်ထဲမဝင်ချင်လို့ ရှောင်တာက ထိုင်းဖက်သွားတာများပြီး ထိုင်းဖက်မသွားနိုင်တဲ့ သူတွေက တော့ ရှမ်းတပ်တွေထဲ ကိုယ့်လူမျိုးအချင်းချင်းဆိုပြီးဝင်တာများတယ်” လို့ လင်းခေးဒေသခံ တစ်ဦးက ပြောပါတယ်။
လင်းခေးက ပုန်းတွန်ရွာမှာဆိုရင် ဗမာတစ်ယောက်ပဲ တပ်ထဲဝင်ပြီး ကျန် လူငယ်ရာကျော်က ရှမ်းတပ်ထဲ ကိုယ့်ထမင်းစားပြီးဝင်မယ်လို့ အစည်းအဝေးမှာကို ပြောပြီး သွားကြတယ်လို့ သိရပါတယ်။
စစ်ကောင်စီက လူသစ်စုသလိုပဲ RCSS က လူသစ်စုရာမှာ ၆ နှစ်တာဝန်ထမ်းဆောင်ရမယ်လို့ ထုတ်ပြန်ချက်ထုတ်ထားပြီး RCSS ဟာ နိုင်ငံရေးကို နိုင်ငံရေးနည်းလမ်းနဲ့ပဲဖြေရှင်းမယ်ဆိုတဲ့ မူကိုလက်ကိုင်ထားဆဲ NCA လက်မှတ်ထိုးထားတဲ့ အဖွဲ့ဖြစ်ပါတယ်။
ယင်း မိုင်းပန်၊ မိုးနဲ၊ မောက်မယ်၊ လင်းခေးမြို့တွေက RCSS ဌာနချုပ်ရှိတဲ့ လွယ်တိုင်းလျန်းကို သွားမယ်ဆိုရင် ဟိုမိန်းကနေတဆင့် သံလွင်မြစ်တာဆွတ်တိန်း ကနေ လမ်းသင့်တယ်လို့ သိရပါတယ်။
MK-012
