မဲခေါင်၊ မတ် ၂၁
ရှမ်းပြည်တောင်ပိုင်း၊ ရွှေညောင်၊ အေးသာယာမှာ ရာအိမ်မှူးနဲ့ပျူစောထီးတွေက စစ်ကောင်စီက ပေးထားတဲ့လက်နက်တွေနဲ့ ရပ်ကွက်ထဲမှာ ပြည်သူတွေကို ခြိမ်းခြောက်ကာ စစ်သားစုဆောင်းရေး လုပ်နေတယ်လို့ မြေပြင်သတင်းအရင်းအမြစ်ထံမှ သိရပါတယ်။
ယမန်နေ့ မတ်လ ၂၀ ရက်မှာ အေးသာယာ ရပ်ကွက် ၄ က ရာအိမ်မှူးတစ်ဦးဟာ မနက် ၅ နာရီလောက်ကတည်းက အိမ်တွေကို လိုက်နှိုးပြီး စာရင်းလိုက်ကောက်နေတယ်လို့ သိရသလို ယင်း ရပ်ကွက် ၄ ရဲ့ ပျူစောထီးတွေဟာလည်း စစ်ကောင်စီကပေးထားတဲ့ လက်နက်တပြပြနဲ့ ရပ်ကွက်ထဲ ခြိမ်းခြောက်နေတယ်လို့ သိရပါတယ်။
အလားတူ ရပ်ကွက် ၆ မှာလဲ မဲနှိုက်တဲ့အချိန် တအိမ်ထဲ ၄ ယောက်နှိုက်ခိုင်းတာမျိုးလုပ်သလို တအိမ်ထောင် ကျပ် ၅၀၀၀ ကို အတင်းအကြပ်ကောက်နေလို့ ရပ်ကွက်ကလူတွေနဲ့ တုတ်ဆွဲ ဓားဆွဲဖြစ်ကြတယ်လို့ သိရပါတယ်။
မဲနှိုက်တဲ့အချိန် ပြည်သူတွေကို လက်ပစ်ဗုံးထောင်ပြခဲ့တဲ့ ရပ်ကွက် ၇ အုပ်ချုပ်ရေးမှူး ဓားထိုးခံရတယ်လို့သတင်းရင်းမြစ်က ဆိုပေမယ့် မဲခေါင်အနေနဲ့ သီးခြားအတည်ပြုလို့ မရခဲ့ပါဘူး။
အေးသာယာမှာ ရပ်ကွက် ၁၂ ရပ်ကွက်ရှိပြီး အများစုဟာ စစ်တပ်ထွက်တွေနဲ့ သာမာန်လက်လုပ်လက်စားတွေ၊ စက်မှုဇုံ လုပ်ငန်းလုပ်ဆောင်သူတွေ ဦးရေ ၂ သောင်းကျော်နေထိုင်ကြတဲ့ မြို့လေးဖြစ်ပါတယ်။
MK-012
