မဲခေါင်၊ မတ် ၅
ရှမ်းပြည်တောင်ပိုင်း၊ ပအိုဝ်းဒေသ ၊ ဆီဆိုင်မြို့ကို မနေ့ မတ် ၄ ရက်က လက်နက်ကြီး ကြိမ်ရေ ၄၀ ကျော်ပစ်ခတ်တဲ့အထိ တိုက်ပွဲပြင်းထန်ခဲ့တယ် လို့ ဒီနေ့ မတ်လ ၅ ရက်မှာ PNLA က သတင်းထုတ်ပြန်ပါတယ်။
စစ်ကြောင်းထိုးလာတဲ့ စစ်ကောင်စီနဲ့အပေါင်းပါတွေကို မနေ မတ်လ ၄ ရက် မနက် ၆ နာရီက ညနေ ၅ နာရီထိ ဆီဆိုင်မြို့ရဲ့မြောက်ဘက်မှာ တိုက်ပွဲပြင်းပြင်းထန်ထန်ဖြစ်ပွားပြီးတဲ့နောက် စစ်ကောင်စီတပ်တွေ အထိအခိုက်များစွာနဲ့ ပြန်ဆုတ်သွားတယ်လို့ ဆိုပါတယ်။
အထိနာသွားတဲ့ စစ်ကောင်စီဟာ လက်နက်ကြီးနဲ့ ကြိမ်ရေ ၄၀ ကျော်ပစ်ခတ်တိုက်ခိုက်ခဲ့တာမှာ နေအိမ်အချို့ ထိခိုက်ပျက်စီးခဲ့တယ်လို့ ပြောပါတယ်။
ဒါ့အပြင် ယမန်နေ့မှာပဲ မဲနယ်တောင်ဒေသကို ဟိုပုံးမြို့ဘက်ကနေ လက်နက်ကြီးနဲ့ ကြိမ်ရေ ၂၀ ကျော် ပစ်ခတ်ခဲ့တယ်လို့ပြောပါတယ်။
မြေပြင်သတင်းအရလည်း ဆီဆိုင်မြို့အနောက်ဘက် မဲဟဲရွာဘက်မှာ တိုက်ပွဲတွေ ဒီနေ့မှာ ပြင်းထန်နေဆဲလို့ သိရပါတယ်။
ဆီဆိုင်မြို့ဟာ လေယာဉ်၊ လက်နက်ကြီး၊ ဒရုန်းဗုံးတွေကြောင့် ၈၀ ရာခိုင်နှုန်း ပျက်စီးနေခဲ့ပြီးဖြစ်တာကို ထပ်မံပစ်ခတ်တဲ့ လက်နက်ကြီးဒဏ်တွေကို ပျက်စီးမှု ရာခိုင်နှုန်း ပိုမိုများပြားလာနေတာဟာ ပြန်လည်ထူထောင်ရေးလုပ်နိုင်စွမ်းတောင် မရှိနိုင်လောက်အောင် ဖြစ်နေပြီလို့ ဆီဆိုင်စစ်ဘေးရှောင်တွေက ပြောဆိုနေကြတယ်လို့ သိရပါတယ်။
ပအိုဝ်းလူငယ်အစည်းအရုံးရဲ့ မတ်လ ၂ ရက်အထိ ဆီဆိုင်၊ လွိုင်လင်၊ ဟိုပုံး ၃ မြို့နယ်ရဲ့ စစ်ရေးမှတ်တမ်းမှာ လက်နက်ကြီး ကြိမ်ရေ ၁၁၃၅ ကြိမ်ရှိခဲ့တယ်လို့ ဖော်ပြပါတယ်။
MK-012
